ވޯލްޑް ކަޕްގެ ނޮކައުޓް މަރުހަލާގައި އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް ކީލިއަން އެމްބާޕޭ މުގުރާލިއިރު، ސްވިޑަން އަތުން 3-0 އިން މޮޅުވެ ފްރާންސް އިން ގަދަ 16ގައި ޕެރަގުއޭއާ ދެކޮޅަށް ކުޅެން ތައްޔާރުވެއްޖެއެވެ.
ކޮންމެ ހާފެއްގައި ޖެހި ލަނޑާ އެކު އެމްބާޕޭ ވަނީ ނޮކައުޓް ސްޓޭޖުގައި ޖެހި ލަނޑުގެ އަދަދު 10އަށް އިތުރުކޮށްފަ އެވެ. އަދި މި މުބާރާތުގެ ރަން ބޫޓުގެ ރޭހުގައި އޭނާ މިހާރު އުޅެނީ އާޖެންޓީނާގެ ލިއޮނަލް މެސީއާ އެއްވަރަކަށް ހަ ލަނޑު ޖަހައިގެން އެއްވަނައިގައެވެ.
ނިއު ޖާޒީގެ ހޫނުގަދަ މާހައުލުގައި ދެ ޓީމުން ވެސް ކުރިމަތިލާން ޖެހުނު ނަމަވެސް، ފްރާންސް (ލެ ބްލޫސް)އިން އިދިކޮޅު ޓީމުގެ ގޯލަށް ނުރައްކާ ކުރަން މާ ގިނަ ވަގުތެއް ނުނަގައެވެ.
މެޗުގެ 20 ވަނަ މިނެޓުގައި އެމްބާޕޭ ޖެހި ލަނޑެއް އޮފްސައިޑް ކަމަށް ނިންމިއިރު، އޭގެ ފަހުން ޖޫލްސް ކޫންޑޭ ނަގައިދިން ހުރަހަކުން ހުސްކޮށް ހުރެ އެމްބާޕޭ ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.
އޭގެ ކުޑަ ވަގުތުކޮޅެއް ފަހުން، ޕެނަލްޓީ އޭރިއާ ތެރެއިން މައިކަލް އޮލީސޭ ފޮނުވާލި ހިތްގައިމު ސިޒާ ކިކެއް ވެސް ދަނޑިއަށް އަމާޒުވިއިރު، ރީބައުންސްވި ބޯޅަ އޮސްމާން ޑެމްބެލޭ ފޮނުވާލީ ބޭރަށެވެ.
ސްވިޑަންގެ ކީޕަރު ޖޭކޮބް ވައިޑެލް ޒެޓަސްޓްރޯމް މޮޅު ސޭވްތަކެއްކޮށް ފްރާންސް ހިފަހައްޓަމުން ދިޔަ ނަމަވެސް، ފުރަތަމަ ހާފު ނިމެން ދަނިކޮށް އެމްބާޕޭ ޖެހި ލަނޑު ހުއްޓުވޭ ގޮތެއް ނުވި އެވެ.
ފްރާންސްގެ ކުޅުންތެރިން މާޔޫސްވާން ފެށި ދަނޑިވަޅެއްގައި، ޑެމްބެލޭ ދިން ރީތި ޕާހަކުން ބޯޅަ ހޯދައި، ވިކްޓާ ޔޮކަރެސް ކައިރިން ނައްޓާލުމަށް ފަހު އެމްބާޕޭ ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
އޭގެ ވަގުތުކޮޅެއް ފަހުން ސްވިޑަންއަށް ނަތީޖާ އެއްވަރުކުރަން ރަނގަޅު ފުރުސަތެއް ލިބުނު ނަމަވެސް، ގޯލާ 12 ޔާޑު ދުރުން އެލިއަޓް ސްޓްރައުޑް ފޮނުވާލި ބޯޅަ ދިޔައީ ހުރަސް ދަނޑިމަތިން ބޭރަށެވެ.
އެއީ ސްވިޑަންއަށް މެޗުގައި ދެއްކުނު އެންމެ ވަރުގަދަ ކުޅުމެވެ. ދެވަނަ ހާފު ފެށިގެން އަށްވަނަ މިނެޓުގައި އޮލީސޭ ދިން ޕާހަކުން ބްރެޑްލީ ބާކޯލާ ވަނީ ގޯލުގެ ކައިރި ކަނަށް ބޯޅަ ފޮނުވާލައި ފްރާންސްގެ ދެވަނަ ލަނޑު ޖަހައިދީފަ އެވެ.
ކަނާތްފަރާތުން ޑެމްބެލޭ ފޮނުވާލި ބާރު ހަމަލާއެއް ކީޕަރު ޒެޓަސްޓްރޯމް ދިފާއުކުރިއިރު، އޭގެ ފަހުން އޮލީސޭ ހުސްކޮށް ހުރެ ފޮނުވާލި ހަމަލާ ވެސް އޭނާ ދިފާއުކުރިއެވެ.
މެޗުގެ 74 ވަނަ މިނެޓުގައި އެމްބާޕޭ އޭނާގެ ދެވަނަ ލަނޑު ޖެހީ އޮލީސޭ ދިން ފުރިހަމަ ޕާހަކުން ބޯޅަ ހޯދައި، ކީޕަރަށް ފުރުސަތެއް ނުދީ ގޯލުގެ ތެރެއަށް ފޮނުވާލައިގެންނެވެ.
ގަދަ 16ގައި އިއްޔެ ޕެނަލްޓީ ޖަހައިގެން ޖަރުމަނު ބަލިކުރި ޕެރަގުއޭއާ ދެކޮޅަށް ފްރާންސް ކުޅޭ މެޗު އޮންނާނީ އަންނަ ހޮނިހިރު ދުވަހުއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.