ސަލީބާ ދިގު މުއްދަތަކަށް ދަނޑާ ދުރަށް!

ފީފާ ވޯލްޑް ކަޕް 2026ގައި ފްރާންސްގެ ޤައުމީ ޓީމަށް ކުޅެމުންދަނިކޮށް ބުރަކައްޓަށް ލިބުނު ސީރިއަސް އަނިޔާއަކާ ގުޅިގެން، އާސެނަލްގެ މުހިންމު ޑިފެންޑަރު ވިލިއަމް ސަލީބާއަށް ދިގު މުއްދަތަކަށް ކުޅުމާ ދުރަށްދާން މަޖުބޫރުވެއްޖެކަން އެ ކުލަބުން ރަސްމީކޮށް ކަށަވަރުކޮށްދީފިއެވެ.

އާސެނަލުން އާންމުކުރި ބަޔާނެއްގައި ހާމަކޮށްފައިވާ ގޮތުން، މުބާރާތަށް ފަހު އެނބުރި ލަންޑަނަށް އައުމާއެކު ޚާއްސަ ޑޮކްޓަރުންގެ ޓީމަކުން ވަނީ ސަލީބާގެ ހާލަތު ވަރަށް ގާތުން ބަލައި ތަހުލީލުތައް ކޮށްފައެވެ. މި ބެލުންތަކަށް ފަހު އޭނާގެ ބުރަކަށީގެ މައްސަލަ ހައްލުކުރުމަށް ޓަކައި އޮޕަރޭޝަނެއް ކުރަން ނުޖެހުނު ނަމަވެސް، ޚާއްސަ ރިކަވަރީ އަދި ރިހެބިލިޓޭޝަން ޕްރޮގްރާމެއް ފުރިހަމަކުރަން ޖެހޭނެކަން ކުލަބުން ވަނީ ފާހަގަކޮށްފައެވެ. އަދި އޭނާ އަލުން ފިޓުކުރުމަށް ކުލަބުގެ މެޑިކަލް ޓީމުން ފުރިހަމައަށް އެހީތެރިކަން ފޯރުކޮށްދޭނެކަމުގެ ޔަގީންކަން ވެސް އެ ބަޔާނުގައި ދީފައިވެއެވެ.

އެމެރިކާ، މެކްސިކޯ އަދި ކެނެޑާގައި ކުރިއަށްދިޔަ މި އަހަރުގެ ވޯލްޑް ކަޕްގެ ތެރެއިން ސަލީބާއަށް މި އަނިޔާގެ އުނދަގޫތައް ފުރަތަމަ ފެންނަން ފެށީ ފަރިތަކުރުންތަކުގެ ތެރެއިންނެވެ. އޭގެ ފަހުން މުބާރާތުގެ ސެމީ ފައިނަލްގައި ސްޕެއިން އަތުން ފްރާންސް ބަލިވި މެޗުގެ 30ވަނަ މިނެޓުގައި އޭނާ ބަދަލުކުރަން ޖެހުނުއިރު، އިނގިރޭސިވިލާތާ ދެކޮޅަށް ކުޅުނު ތިންވަނަ ހޮވާ މެޗުގައި ވެސް އޭނާއަށް ކުޅެވޭ ގޮތެއް ނުވިއެވެ.

މި އަނިޔާގެ ސަބަބުން، ކުރިއަށް އޮތް އިނގިރޭސި ޕްރިމިއަރ ލީގުގެ އާ ސީޒަން ފަށާއިރު ސަލީބާ ޓީމުގައި ނުހިމެނޭނެއެވެ. ލީގުގެ ޗެމްޕިއަންކަން ދިފާއުކުރުމަށް އާސެނަލުން ނުކުންނަ ފުރަތަމަ މެޗުގައި އޮގަސްޓް 21ވަނަ ދުވަހު އަމިއްލަ ދަނޑުގައި ނުކުންނާނީ އަލަށް ޕްރޮމޯޓްވި ކޮވެންޓްރީ ސިޓީއާ ދެކޮޅަށެވެ.