ހުރިހާ މެޗަކުން މޮޅުވެ މެކްސިކޯއިން ގްރޫޕްގެ އެއްވަނަ ހޯދައިފި

މެޗުގެ ދެވަނަ ހާފުގައި މެކްސިކޯއިން ޖެހި ތިން ލަނޑާއެކު ޗެކް ރިޕަބްލިކް ވޯލްޑް ކަޕުން ކަޓުވާލައި، ގްރޫޕް ސްޓޭޖުގެ ހުރިހާ މެޗަކުން މޮޅުވެ މެކްސިކޯއިން ގްރޫޕްގެ އެއްވަނަ ހޯދައިފިއެވެ.

މުބާރާތް ބާއްވާ އެއް ގައުމު ކަމަށްވާ މެކްސިކޯ، މެކްސިކޯ ސިޓީގައި ކުޅުނު ފަހު މެޗުގެ ކުރިން ވެސް ގްރޫޕްގެ އެއްވަނަ ޔަގީންކޮށްފައި ވަނީ މީގެ ކުރިން ދެކުނު އެފްރިކާއާއި ދެކުނު ކޮރެއާ ބަލިކޮށްގެންނެވެ.

މިއާއެކު ކޯޗު ހާވިއޭ އަގީރޭއަށް ޓީމަށް ބަދަލުތަކެއް ގެނައުމުގެ ފުރުސަތު ލިބުނުއިރު، ކުރީ މެޗުގެ ފެށި އެގާރައަށް ގެނައި ފަސް ބަދަލުގެ ތެރޭގައި ހިމެނޭ ލެފްޓް ބެކް މަޓެއޯ ޗާވޭޒް ވަނީ ހާފް ޓައިމަށް ފަހު މާގިނައިރެއް ނުވެ އޭނާގެ ފުރަތަމަ ބައިނަލްއަގުވާމީ ލަނޑު ޖަހައިދީފައެވެ.

މި މުބާރާތުގައި ފުރަތަމަ ފަހަރަށް ފެށި އެގާރައިގައި ހިމެނުނު ޒުވާން ކުޅުންތެރިޔާ ހިލްބާޓޯ މޯރާ ވަނީ މެދުތެރޭގައި މޮޅު ކުޅުމެއް ދައްކައި، ހޫލިއަން ކީނިއޯނޭސް މެކްސިކޯގެ ދެވަނަ ލަނޑު ޖެހުމަށް މަގުފަހިކޮށްދީފައެވެ.

މޯރާ ތަނަވަސްކޮށްދިން ފުރުސަތަކުން ހޯހޭ ސަންޗޭޒް ފޮނުވާލި ހަމަލާ ޗެކްގެ ގޯލްކީޕަރު މަޓެޖް ކޮވާރް ދިފާއުކުރި ނަމަވެސް، އޭރިއާ ތެރޭގައި އުފެދުނު ހަލަބޮލިކަމެއްގެ ތެރެއިން ލިބުނު ބޯޅަ ކީނިއޯނޭސް ވަނީ ގޯލުގެ ތެރެއަށް ފޮނުވާލައި، މި ފަހަރުގެ ވޯލްޑް ކަޕްގައި އޭނާގެ ދެވަނަ ލަނޑު ކާމިޔާބުކޮށްފައެވެ.

އުމުރުން 17 އަހަރާއި 253 ދުވަހުގައި މޯރާ ވެގެން ގޮސްފައިވަނީ ފިރިހެނުންގެ ވޯލްޑް ކަޕް މެޗެއްގައި ފެށި އެގާރައިގައި ހިމެނުނު ތާރީޚީ ހަވަނައަށް އެންމެ ޒުވާން ކުޅުންތެރިޔާއަށެވެ. އަދި އޭނާއަކީ މެކްސިކޯގެ ތާރީޚުގައި ވެސް މި ޝަރަފް ހޯދި އެންމެ ޒުވާން ކުޅުންތެރިޔާއެވެ.

މެޗުގެ 72 ވަނަ މިނެޓުގައި އޭނާ ބަދަލުކުރި ވަގުތު ސަޕޯޓަރުންގެ ބޮޑު ތަރުހީބެއް ލިބުނުއިރު، އޭނާގެ ބަދަލުގައި ކުޅެން އެރި އަލްވާރޯ ފިޑަލްގޯ ވަނީ 15 ޔާޑު ބޭރުން ގޯލުގެ މަތީ ކަނަށް ބޯޅަ ފޮނުވާލައި މެކްސިކޯގެ ތިންވަނަ ލަނޑު ޖަހައިދީފައެވެ.

ލަނޑުތަކުގެ އިތުރުން، އަޒްޓެކާ ސްޓޭޑިއަމްގައި އެންމެ ބާރަށް ސަޕޯޓަރުން ހަޅޭއްލަވައިގަތީ މެޗުގެ ފަހުކޮޅު ބަދަލު ކުޅުންތެރިއެއްގެ ގޮތުގައި މެކްސިކޯގެ 40 އަހަރުގެ ގޯލްކީޕަރު ގިލްރްމޯ އޮޗޯއާ ކުޅެން އެރުމުންނެވެ.

މިއީ އޮޗޯއާގެ ހަވަނަ ވޯލްޑް ކަޕް ކަމަށްވާއިރު، މިއާ އެކު އޭނާ ވަނީ ޕޯޗުގަލްގެ ކްރިސްޓިއާނޯ ރޮނާލްޑޯއާއި އާޖެންޓީނާގެ ލިއޮނަލް މެސީގެ ރެކޯޑާ ހަމަކޮށްފައެވެ. ނަމަވެސް 2006 އަދި 2010 ވަނަ އަހަރުގެ މުބާރާތްތަކުގައި ބެންޗުގައި އިނުމުގެ ސަބަބުން އޭނާއަށް ކުޅުމުގެ ފުރުސަތު ލިބުނީ މީގެ ތެރެއިން ހަތަރު މުބާރާތެއްގައެވެ.