އައިވަރީ ކޯސްޓް ބަލިކޮށް ޖަރުމަނުން ދެވަނަ ބުރުގެ ޖާގައެއް ކަށަވަރުކޮށްފި

ފީފާ ވޯލްޑް ކަޕް 2026ގެ ގްރޫޕް އީގައި ކެނެޑާގެ ޓޮރޮންޓޯ ސްޓޭޑިއަމްގައި ކުޅުނު ފޯރިގަދަ މެޗުން، ފަހަތުން އަރައި އައިވަރީ ކޯސްޓް 2-1ގެ ނަތީޖާއަކުން ބަލިކޮށް ޖަރުމަނުން މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފިއެވެ.

މި މެޗުން ލިބުނު ތިން ޕޮއިންޓާއެކު ޖަރުމަނަށް ވަނީ ޖުމްލަ ހަ ޕޮއިންޓް ލިބިފައެވެ. މިއާއެކު އެޓީމުން ވަނީ އެންމެ ފަހުން ބޭއްވި ދެ ވޯލްޑް ކަޕް ކަމަށްވާ 2018ވަނަ އަހަރުގެ ރަޝިއާ ވޯލްޑް ކަޕާއި 2022ވަނަ އަހަރުގެ ގަތަރު ވޯލްޑް ކަޕްގެ ގްރޫޕް ސްޓޭޖުން ކެޓުމުގެ މާޔޫސްކަމަށް ނިމުމެއް ގެނެސްފައެވެ.

މިރޭގެ މެޗުގެ ފުރަތަމަ ހާފުގައި މޮޅަށް ކުޅުނީ އައިވަރީ ކޯސްޓުންނެވެ. އެގޮތުން މެޗުގެ 30ވަނަ މިނެޓުގައި އެ ޓީމުގެ ކެޕްޓަން ފްރޭންކް ކެސިއޭ ކާމިޔާބުކޮށްދިން ލަނޑާއެކު އެޓީމުން ވަނީ މެޗުގެ ލީޑު ނަގާފައެވެ. ޖަރުމަނު ބަލިވެދާނެ ފަދަ ނުރައްކާތެރި ހާލަތެއްގައި އޮއްވައި، މެޗުގެ އޮއިވަރު ބަދަލުކޮށްލީ 60ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ކުރީގެ ބްރައިޓަންގެ ފޯވާޑް ޑެނިޒް އުންޑާވްއެވެ.

ކުޅެން ނުކުތްތާ އެންމެ އަށް މިނެޓުގެ ތެރޭގައި، ބަދަލު ކުޅުންތެރިއެއްގެ ގޮތުގައި ކުޅެން އެރި ނަޑިއެމް އަމީރީ ނަގައިދިން ހުރަހަކުން އުންޑާވް ވަނީ ޖަރުމަނަށް ނަތީޖާ އެއްވަރުކޮށްދީފައެވެ. އަދި މެޗުގެ އިތުރު ވަގުތުގައި ފެލިކްސް ނެމެޗާ ތަނަވަސްކޮށްދިން ފުރުސަތަކުން އުންޑާވް ވަނީ އޭނާގެ ދެވަނަ ލަނޑު ޖަހައި ޖަރުމަނު މޮޅުކޮށްދީފައެވެ. މިއީ ގައުމީ ޓީމަށް އޭނާ ކުޅުނު 11މެޗުން ކާމިޔާބުކުރި 10ވަނަ ލަނޑެވެ.

މި ގްރޫޕްގެ ފުރަތަމަ މެޗުތަކުން ދެ ޓީމު ވެސް ވަނީ މޮޅުވެފައެވެ. ޖަރުމަނުން ފުރަތަމަ މެޗުގައި ކްރަސާއޯ އަތުން 7-1އިން މޮޅުވިއިރު، އައިވަރީ ކޯސްޓުން ވަނީ އެކުއަޑޯ އަތުން 1-0އިން މޮޅުވެފައެވެ. ގްރޫޕްގެ ފަހު މެޗުގައި ޖަރުމަނު ނުކުންނާނީ އެކުއަޑޯއާ ދެކޮޅަށެވެ. މިހާތަނަށް ޖަރުމަނުގެ އިތުރުން ދެވަނަ ބުރުގެ ޖާގަ ކަށަވަރުކޮށްފައިވަނީ މުބާރާތް ބާއްވާ ގައުމުތައް ކަމަށްވާ އެމެރިކާ އަދި މެކްސިކޯއެވެ.