ކޯނޭގެ ފައި ބިންދައިގެން ދިޔަ އަޑު ބެންޗަށް އިވުނު: ކޯޗު

ފީފާ ވޯލްޑް ކަޕްގެ ގްރޫޕް ބީގައި ރޭ ކެނެޑާ އާއި ޤަތަރު ބައްދަލުކުރި މެޗުން 6-0އިން މޮޅުވެ، ކެނެޑާއިން ތާރީޚީ ފުރަތަމަ މޮޅު ހޯދި ނަމަވެސް، އެޓީމުގެ މެދުތެރެއަށް ކުޅޭ އިސްމާއީލް ކޯނޭއަށް ލިބުނު ސީރިއަސް އަނިޔާއާ ގުޅިގެން މުޅި ޓީމަށް ވަނީ ސިހުމެއް ލިބިފައެވެ.

ކެނެޑާގެ ކޯޗު ޖެސީ މާޝް ހާމަކުރި ގޮތުގައި، ކޯނޭގެ ފައި ބިންދައިގެން ދިޔަ ބާރު އަޑު އެޓީމުގެ ބެންޗަށް ވެސް ވަނީ އިވިފައެވެ.

މެޗަށްފަހު ނޫސްވެރިންނާ ވާހަކަދައްކަމުން މާޝް ބުނީ، މި ހާދިސާ ހިނގީ ސީދާ ކެނެޑާގެ ބެންޗު ކުރިމަތީގައި ކަމަށެވެ. ޤަތަރުގެ އާސިމް މަޑީބޯ ކުރި ނުރައްކާތެރި ޓެކްލަކާ އެކު ކޯނޭގެ ފައިގެ ކަށިގަނޑު ބިންދައިގެން ދިޔަ އަޑު އިވުމުން، އެއީ 2024ވަނަ އަހަރުގެ ތެރޭގައި ފަރިތަކުރުންތަކުގައި ޓަހޯން ބުޗަނަންއަށް ލިބުނު ފަދަ ސީރިއަސް އަނިޔާއެއްކަން ވަގުތުން އިހުސާސްވި ކަމަށް މާޝް ބުންޏެވެ. ކޯނޭއަކީ ޓީމުގެ މުހިންމު ކުޅުންތެރިއަކަށް ވުމުން، މި އަނިޔާގެ ސަބަބުން މުޅި ޓީމަށް ބޮޑު އަސަރެއް ކޮށްފައިވާ ކަމަށް ވެސް އޭނާ ފާހަގަކުރިއެވެ.

ކޯނޭ މިހާރު ހޮސްޕިޓަލަށް ގެންގޮސްފައިވާ އިރު، ވަރަށް އަވަހަށް އޭނާގެ އޮޕަރޭޝަނެއް ކުރެވޭނެ ކަމަށް ކޯޗު ބުންޏެވެ. އަދި ޤަތަރުގެ މަޑީބޯ ކެނެޑާގެ ޗޭންޖިންގ ރޫމަށް ގޮސް ކޯނޭގެ ކިބައިން މައާފަށް އެދިފައިވާ ކަމަށާއި، އެކަން ކޯނޭ ޓީމާ ހިއްސާކޮށްފައިވާތީ އެއީ ގަސްދުގައި ކުރި ކަމެއް ކަމަށް ގަބޫލުނުކުރާ ކަމަށް މާޝް ބުންޏެވެ. ނަމަވެސް، އެ ފައުލާ ގުޅިގެން މަޑީބޯއަށް ރަތް ކާޑު ދެއްކުމުން ޤަތަރުގެ ބެންޗުން އަމަލުކުރި ގޮތް އެއްވެސް ވަރަކަށް ބަލައިނުގަނެވޭ ކަމަށް އޭނާ ހާމަކުރިއެވެ.

މެޗަށްފަހު ވާހަކަދައްކަމުން ޤަތަރުގެ ކޯޗު ހޫލެން ލޮޕެޓެގޫ ވަނީ ކޯނޭއަށް އަވަސް ޝިފާއަކަށް އެދިފައެވެ. އޭނާ ބުނީ ރެފްރީގެ ނިންމުންތަކާ މެދު ވާހަކަދެއްކުމުގެ ބަދަނުގައި އޭނާ ބޭނުންވަނީ ކުރިއަށް އޮތް މެޗަށް ކުޅުންތެރިން ތައްޔާރުކުރުމަށް ވިސްނުން ބަހައްޓަން ކަމަށެވެ. މި މެޗުން ބޮޑު ތަފާތަކުން ބަލިވި ނަމަވެސް، ދެން އޮތް މެޗުގައި ރަނގަޅު ކުޅުމެއް ދެއްކުން މުހިންމު ކަމަށް ލޮޕެޓެގޫ ފާހަގަކުރިއެވެ. މުބާރާތުގެ ފަހު މެޗުގައި ޤަތަރު ނުކުންނާނީ ބޮސްނިއާއާ ދެކޮޅަށެވެ. އަދި ކެނެޑާ ބައްދަލުކުރާނީ ސްވިޓްޒަލަންޑާއެވެ.