ކެނެޑާއިން ގަތަރު ބަލިކުރި ތާރީޚީ މޮޅު ފަނޑުކޮށްލީ ކޯނޭގެ އަނިޔާ!

ނުވަ ކުޅުންތެރިންނާއެކު ކުޅުނު ގަތަރު 6-0އިން ބަލިކޮށް ކެނެޑާ އިން ވޯލްޑް ކަޕްގެ ތާރީޚުގައި ހޯދި ފުރަތަމަ މޮޅު ފަނޑުވެއްޖެއެވެ.

ކެނެޑާގެ ތާރީޚީ މޮޅުގެ އުފާވެރިކަން ފަނޑުވީ އެ ޓީމުގެ އިސްމާއިލް ކޯނޭއަށް ލިބުނު ސީރިއަސް އަނިޔާއެއްގެ ސަބަބުންނެވެ. އެ ހާދިސާ ހިނގި ވަގުތު ކެނެޑާގެ ކޯޗު ޖެސީ މާޝްގެ ލޮލުން ކަރުނަ ހިލުނު ތަން ވެސް ފެނިގެން ދިޔައެވެ.

ވެންކޫވާގައި ކުޅުނު މި މެޗުގައި ކެނެޑާ 3-0އިން ކުރީގައި އޮވެ، އެއް ކުޅުންތެރިއަކު އިތުރުކޮށް ކުޅެމުން ދަނިކޮށް، ގަތަރުގެ އާސިމް އުމަރު މަދީބޯއާއި ކޯނޭ ބޯޅަ ހޯދަން އުޅުމުގެ ތެރޭގައި ލިބުނު އަނިޔާއާ ގުޅިގެން ކުޅުން ވަރަށް ގިނަ އިރަށް މެދުކަނޑާލަން ޖެހުނުއިރު، ކެނެޑާގެ މި ކުޅުންތެރިޔާ ދަނޑުން ބޭލީ އަށިގަނޑުގައެވެ.

މަދީބޯއަށް ފުރަތަމަ ރީނދޫ ކާޑެއް ދެއްކި ނަމަވެސް، ވީއޭއާރް ބެލުމަށް ފަހު އެ ނިންމުން ވަނީ ރަތް ކާޑަކަށް ބަދަލުކޮށްފައެވެ.

ވަޓްފޯޑްގެ ކުރީގެ ކުޅުންތެރިޔާ ކޯނޭ ދަނޑުން ބޭލިއިރު ކެނެޑާގެ ސަޕޯޓަރުން އޭނާގެ ނަމުން ގޮވަމުން ދިޔައިރު، ކޯނޭ ވަނީ އަށިގަނޑުގައި އޮވެގެން ތަދުކަނޑުވާ ބޭސް ބޭނުންކުރަމުން، ސަޕޯޓަރުންނަށް އަތް ހޫރާލިއެވެ.

ކެނެޑާ މިހާރު ނޮކްއައުޓް ބުރަށް ދިއުމުގެ ފުރުސަތު ބޮޑު ނަމަވެސް، ކޯނޭއަށް ލިބުނު އަނިޔާއަކީ ގަދަ 32ގެ ބުރަށް ވުރެ ކުރިއަށް ދިއުމަށް އެ ގައުމުން ކުރާ އުންމީދުތަކަށް ލިބުނު ބޮޑު ހީނަރުކަމެކެވެ.

މި ބިރުވެރި އަނިޔާގެ ސަބަބުން، ކެނެޑާ އަށް ލިބުނު ތާރީޚީ ކާމިޔާބީގެ އުފާވެރިކަން ވަނީ ވަރަށް ބޮޑަށް ގެއްލިފައެވެ.

ހަ ލަނޑުގެ ތަފާތުން ހޯދި މި މޮޅާއެކު ކެނެޑާ އޮތީ ގްރޫޕް ބީ ގެ އެއްވަނައިގައެވެ. އެއީ ސުވިޒަލޭންޑާ ޕޮއިންޓުގެ ގޮތުން އެއްވަރުވި ނަމަވެސް، ފައިދާ ތިން ލަނޑު އިތުރަށް ލިބިގެންނެވެ.