އަލަށް ވާދަކުރާ ކުޑަކުޑަ ،ކޭޕް ވާޑުން ޔޫރަޕްގެ ޗެމްޕިއަން ސްޕެއިން ހިފަހައްޓައިފި

ވޯލްޑް ކަޕް ފުޓްބޯޅަ މުބާރާތުގައި މުޅިން އަލަށް ވާދަކުރާ ކޭޕް ވާޑުން، ޔޫރަޕްގެ ޗެމްޕިއަން ސްޕެއިން ހައިރާންކޮށްލުމަށް ފަހު 0-0އިން މެޗު އެއްވަރުކޮށްފިއެވެ.

ގްރޫޕް އެޗްގެ ފުރަތަމަ މެޗުގައި ސްޕެއިންއިން ގިނަ ހަމަލާތަކެއް އުފެއްދި ނަމަވެސް، ކޭޕް ވާޑުން ވަނީ ދިފާއީ ގޮތުން ފުރިހަމަ ކުޅުމެއް ދައްކައި ސްޕެއިން ހުއްޓުވާފައެވެ.

މުޅި މެޗުގައި ވެސް އެންމެ ފާހަގަކޮށްލެވުނީ ކޭޕް ވާޑްގެ އުމުރުން 40އަހަރުގެ ތަޖުރިބާކާރު ގޯލްކީޕަރު ވޮޒީނިއާ ޖޯސީމާރް ޑީއާޒް ގެ މޮޅު ކުޅުމެވެ. ފުރަތަމަ ހާފުގައި އެކަނި ވެސް ސްޕެއިންގެ ނުރައްކާތެރި 6ހަމަލާއެއް އޭނާ ދިފާއުކުރިއެވެ. ފުރަތަމަ ހާފުގައި ސްޕެއިންއިން ޖުމްލަ 15ހަމަލާ އުފެއްދިއިރު، ފެރާން ޓޮރޭޒް ފޮނުވާލި ބާރު ހަމަލާ އަމާޒުވީ ގޯލުގެ ހުރަސް ދަނޑިއަށެވެ. އަދި ރީބައުންސްވެގެން އައި ބޯޅަ ވެސް ކީޕަރު ވޮޒީނިއާ ވަނީ ހުޝިޔާރުކަމާއެކު ދިފާއުކޮށްފައެވެ. މީގެ އިތުރުން، ފުރަތަމަ ހާފުގެ ފަހު ސިކުންތުކޮޅުގައި އައިމެރިކް ލަޕޯޓް ބޮލުން ފޮނުވާލި ހަމަލާ ވެސް އޭނާ ސަލާމަތްކުރިއެވެ.

މި މެޗަކީ އޮކްޓޯބަރު 2024ގެ ފަހުން، ރަސްމީ މުބާރާތެއްގެ ފުރަތަމަ ހާފުގައި ސްޕެއިންއަށް ލަނޑެއް ނުޖެހި ނިންމާލަންޖެހުނު ފުރަތަމަ މެޗެވެ. ކޭޕް ވާޑްގެ ޑިފެންޑަރުން ކަމަށްވާ ސިޑްނީ ލޮޕޭޒް ކަބްރާލް އާއި ޖޮވާނޭ ކަބްރާލް ވަނީ އެ ޓީމުގެ ވައަތް ފަޅި ވަރުގަދައަށް ބަންދުކޮށް، ސްޕެއިންއިން އަރިމަތިން އުފައްދަން އުޅުނު ހަމަލާތައް ހުއްޓުވުމުގައި މުހިންމު ދައުރެއް އަދާކޮށްފައެވެ.

ލަނޑެއް ޖަހައި މެޗުން މޮޅުވުމަށް ޓަކައި ސްޕެއިންގެ ކޯޗު ލުއިސް ޑި ލަ ފުއެންޓޭ ވަނީ މެޗުގެ 70ވަނަ މިނެޓުގައި ލަމީން ޔަމާލްއާއި މިކެލް މޮރީނޯ ކުޅެން އަރުވާފައެވެ. އަދި މެޗުގެ ފަހުކޮޅު ޑެނީ އޮލްމޯ އާއި ނިކޯ ވިލިއަމްސް ވެސް ކުޅެން ނެރުނު ނަމަވެސް، ކޭޕް ވާޑްގެ ބަދަހި ދިފާއު ފޫއަޅުވާލެވޭ ގޮތެއް ނުވިއެވެ. މެޗުގެ 93ވަނަ މިނެޓުގައި ކޭޕް ވާޑުން އުފެއްދި ނުރައްކާތެރި ކައުންޓަ އެޓޭކެއް ހުއްޓުވަން އުޅުމުގެ ތެރޭގައި، މާޔޫސްވެފައި ހުރި ސްޕެއިންގެ މިޑްފީލްޑަރު ޕެޑްރީއަށް ވަނީ ފައުލެއް ކުރަން ޖެހިފައެވެ.