ހަމަނުޖެހުންތަކާ ގުޅިގެން އާޖެންޓީނާއަށް ބޮޑެތި އަދަބުތަކެއް

ފީފާ ވޯލްޑް ކަޕް 2026ގެ ފައިނަލް މެޗަށް ފަހު އާޖެންޓީނާ އަދި ސްޕެއިން ކުޅުންތެރިންގެ މެދުގައި ހިނގި ބޮޑެތި ހަމަނުޖެހުންތަކާއި ސުލޫކީ މައްސަލަތަކާ ގުޅިގެން، ދުނިޔޭގެ ފުޓްބޯޅައިގެ މައި އިދާރާއިން އާޖެންޓީނާގެ ކުޅުންތެރިންނާއި ކޯޗުންގެ އިތުރުން އެ ގައުމުގެ ފުޓްބޯޅަ އެސޯސިއޭޝަނަށް ބޮޑެތި ސަސްޕެންޝަންތަކަކާއި ޖޫރިމަނާތަކެއް މިއަދު ކުރިމަތިކުރުވައިފިއެވެ.

މި ފިޔަވަޅުތަކުގެ ތެރެއިން އެންމެ ބޮޑު އަދަބެއް ލިބިފައި ވަނީ އާޖެންޓީނާގެ މިޑްފީލްޑަރު ލެއަންޑްރޯ ޕަރެޑޭސް އަދި ޑިފެންޑަރު ނަހުއެލް މޮލީނާއަށެވެ. މެޗު ނިމުނު ވަގުތު ސްޕެއިންގެ ގަވީއަށް ހަމަލާދީ މާރާމާރީ ފެށުމުގެ ސަބަބުން ޕަރެޑޭސް 10މެޗަށް ސަސްޕެންޑްކޮށްފައިވާއިރު، މޮލީނާ ވަނީ 7މެޗަށް ސަސްޕެންޑްކޮށްފައެވެ. މީގެ އިތުރުން، މި ދެ ކުޅުންތެރިންގެ މައްޗަށް މީހަކަށް ހަމަލާދިނުމުގެ ދައުވާ ސާބިތުވެ، ކޮންމެ ކުޅުންތެރިއަކު 90،000އެމެރިކާ ޑޮލަރުން ވަނީ ޖޫރިމަނާކޮށްފައެވެ.

ހަމަނުޖެހުމުގައި ބައިވެރިވި އާޖެންޓީނާގެ ތިއާގޯ އަލްމާޑާއާއި ސްޕެއިންގެ ގަވީ އެއް މެޗަށް ސަސްޕެންޑްކޮށް، ކޮންމެ ކުޅުންތެރިއަކު 30،000ޑޮލަރުން ޖޫރިމަނާކޮށްފައިވެއެވެ. އަދި އާޖެންޓީނާގެ އެސިސްޓަންޓް ކޯޗު ރޮބާޓޯ އަޔާލާ ކަންތައް ހިނގިގޮތާމެދު މާފަށް އެދުނު ނަމަވެސް، އޭނާގެ މައްޗަށް ހަމަލާދިނުމުގެ ކުށް ސާބިތުވެ 3މެޗަށް ސަސްޕެންޑްކުރުމާއެކު 30،000ޑޮލަރުން ވަނީ ޖޫރިމަނާކޮށްފައެވެ.

މުބާރާތުގެ ތެރޭގައި ތަކުރާރުކޮށް ހިނގާދިޔަ ސުލޫކީ މައްސަލަތަކުގެ ސަބަބުން އާޖެންޓީނާގެ ފުޓްބޯޅަ އެސޯސިއޭޝަން (އޭއެފްއޭ)އަށް ވެސް ވަނީ ބޮޑެތި އަދަބުތަކެއް ދީފައެވެ. ސެމީ ފައިނަލްގައި އިންގްލެންޑް އަތުން މޮޅުވި މެޗަށްފަހު ފޯކްލެންޑް ޖަޒީރާއަކީ އާޖެންޓީނާގެ ބައެއްކަމަށް ދޭހަވާ ފަދަ ސިޔާސީ ބެނާއެއް ދެއްކި މައްސަލައާއި އެހެނިހެން ކަންކަމާ ގުޅިގެން އޭއެފްއޭ ވަނީ ޖުމްލަ 321،000ޑޮލަރުން ޖޫރިމަނާކޮށްފައެވެ. ފީފާއިން އަންގާފައި ވަނީ ކުޅިވަރާ ނުގުޅޭ ސިޔާސީ ޝުއޫރުތައް ދަނޑުމަތީގައި ފާޅުކުރުމަކީ ހަރުކަށިކޮށް މަނާކުރެވިފައިވާ ކަމެއް ކަމަށެވެ.

މާލީ ޖޫރިމަނާތަކުގެ އިތުރުން، އާޖެންޓީނާގެ އަމިއްލަ ގައުމުގައި ކުޅޭ ކުރިއަށް އޮތް ދެ މެޗަށް ވަދެވޭނީ ދަނޑުގެ ޖާގައިގެ ދެބައިކުޅަ އެއްބައި ސަޕޯޓަރުންނަށް ކަމުގައި ފީފާއިން ވަނީ ކަނޑައަޅާފައެވެ. ފީފާގެ ޑިސިޕްލިނަރީ ކޮމިޓީން ނިންމާފައިވާ ގޮތުގައި މި ޖޫރިމަނާ ފައިސާގެ ތެރެއިން 100،000ޑޮލަރު ޚަރަދުކުރާނީ ނަސްލީ ތަފާތުކުރުންތައް ނައްތާލުމުގެ ޚާއްސަ މަޝްރޫއުތަކަށެވެ. މިވަގުތަށް ބައެއް އަދަބުތައް ތަންފީޒުކުރުން ފަސްކޮށްފައިވާއިރު، މި ނިންމުންތައް އިސްތިއުނާފު ކުރުމުގެ ހައްގު އާޖެންޓީނާއަށް ލިބިގެންވާކަމަށް އެ އިދާރާއިން ބުނެފައިވެއެވެ.