ދެ ވޯލްޑްކަޕްގެ މާޔޫސްކަމަށް ފަހު ޖަރުމަނަށް ވަރުގަދަ ފެށުމެއް

ގްރޫޕް ސްޓޭޖުގައި އާދީއްތަ ދުވަހު ކުޅުނު މެޗުގައި، ވޯލްޑް ކަޕްގައި އަލަށް ވާދަކުރާ ކުރަސާއޯ ކޮޅަށް ކައި ހާވަރޓްޒް ޖެހި  ދެ ލަނޑާއެކު 7-1 ގެ ބޮޑު މޮޅެއް ހޯދައިފިއެވެ.

މެޗުގެ ވަރަށް ކުރީކޮޅު ޖަރުމަނުން ލީޑް ނެގި ނަމަވެސް 21 ވަނަ މިނެޓުގައި ކުރަސާއޯގެ ލިވާނޯ ކޮމެނެންސިއާ އޭރިއާގެ މެދުން ވައަތު ފައިން ފޮނުވާލި ހަމަލާއަކުން ނަތީޖާ 1-1އަށް އެއްވަރުކޮށް، ޖަރުމަނު ސިއްސުވާލިއެވެ. މިއީ ވޯލްޑް ކަޕްގެ ތާރީޚުގައި ކިއުރަސާއޯ އިން ޖެހި ފުރަތަމަ ލަނޑަށް ވުމާއެކު، ކެރީބިއަންގެ މި ކުޑަ ގައުމުގެ ސަޕޯޓަރުންގެ މެދުގައި ބޮޑު އުފާވެރިކަމެއް އުފެދުނެވެ.

ޖަރުމަނުން ވަނީ ވަރުގަދަ ކުޅުމަކާއެކު ރައްދުދީ، 38 ވަނަ މިނެޓުގައި ނަތަނިއަލް ބްރައުން ނަގައިދިން ކޯނަރަކުން ނިކޯ ޝްލޮޓަރބެކް ބޮލުން ޖެހި ލަނޑާއެކު އަލުން ލީޑު ހޯދާފައެވެ. އޭގެ ފަހުން، ފުރަތަމަ ހާފުގެ އިތުރު ވަގުތުގައި ރީޗެޑްލީ ބަޒޯއާ، ފީލިކްސް އެންމެޗާ އަށް ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބުކޮށް ހާވަރޓްޒް ވަނީ ނަތީޖާ 3-1އަށް ބަދަލުކޮށްފައެވެ.

ދެވަނަ ހާފު ފެށިގެން މާގިނަ އިރުތަކެއް ނުވެ، 47 ވަނަ މިނެޓުގައި ޖަމާލް މުސިއާލާ ވަނީ ޖަރުމަނުގެ ހަތަރުވަނަ ލަނޑު ޖަހާފައެވެ. ބްރައުން 68 ވަނަ މިނެޓުގައި ފަސްވަނަ ލަނޑު ޖެހިއިރު، 78 ވަނަ މިނެޓުގައި ޑެނިޒް އުންޑާވް ވަނީ ހަވަނަ ލަނޑު ޖަހާފައެވެ. އަދި 88 ވަނަ މިނެޓުގައި ހާވަރޓްޒް ވަނީ އޭނާގެ ދެވަނަ ލަނޑާއެކު މެޗުގެ ނަތީޖާ 7-1 އަށް ބަދަލުކޮށްފައެވެ.

 2014ވަނަ އަހަރުގެ ޗެމްޕިއަންކަން ހޯދުމަށް ފަހު، ރަޝިޔާ އަދި ގަތަރު ވޯލްޑް ކަޕްގެ ކުރީކޮޅު ކެޓުމުގެ ސަބަބުން ލިބުނު މާޔޫސްކަމުން އަރައިގަތުމަށް މަސައްކަތްކުރާ ޖަރުމަނަށް މި ނަތީޖާއަކީ ވަރަށް އުންމީދީ ފެށުމެކެވެ. 

ވޯލްޑްކަޕްގައި އެންމެ ތަފާތު ބޮޑު މޮޅެއް މިހާތަނަށް އޮންނަނީ 1982ވަނަ އަހަރު ހަންގޭރީއިން އެލް ސަލްވަޑޯރ އަތުން 10-1އިން މޮޅުވި މެޗެވެ.