ޗެކް ބަލިކޮށް ދެކުނު ކޮރެއާއިން ވަރުގަދަ ފެށުމެއް

ވޯލްޑް ކަޕް ގްރޫޕް އޭގެ ދެވަނަ މެޗްގައި ޗެކް ރިޕަބްލިކް ބަލިކޮށް ދެކުނު ކޮރެއާއިން ވަރުގަދަކޮށް މުބާރާތް ފަށައިފިއެވެ.

މި މެޗްގައި ފުރަތަމަ ލަނޑު ޖަހައި ކުރިހޯދީ ޗެކުންނެވެ. 58 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ އިސްކޮޅުން ދިގު ޑިފެންޑަރު ލަޑިސްލާވް ކްރެއިޗީއެވެ. މި ލަނޑާ އެކު މެކްސިކޯގެ ގުއަޑަލަހާރާ ސްޓޭޑިއަމްގައި ތިބި ދެކުނު ކޮރެއާގެ ސަޕޯޓަރުން މާޔޫސްވިއެވެ.

ނަމަވެސް، އޭޝިއާގެ ގަދަބާރު ދެކުނު ކޮރެއާއިން ހިތްވަރު ދޫކޮށެއް ނުލައެވެ. މިޑްފީލްޑަރު ހުވަންގް އިން-ބިއޮމް 66 ވަނަ މިނެޓުގައި ފޮނުވާލި ހަމަލާއަކުން ނަތީޖާ ހަމަހަމަކޮށް، މެޗުގެ ފޯރި ގަދަކޮށްލިއެވެ. މެޗުން ދެކުނު ކޮރެއާ މޮޅުކޮށްދިން ލަނޑު 80ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ފޯވާޑް އޯ ހިޔޮން-ގްޔޫއެވެ. އޭނާ ވަނީ އޭރިއާ ތެރެއިން ޑިފެންޑަރު ކައިރިން ނައްޓާލުމަށް ފަހު ހިތްގައިމު ލަނޑެއް ޖަހައި، ގައުމަށް 3 ޕޮއިންޓް ކަށަވަރުކޮށްދީފައެވެ.

މި ނަތީޖާއާ އެކު މުބާރާތް ބާއްވާ އެއް ގައުމު ކަމަށްވާ މެކްސިކޯ ލަނޑުގެ ތަފާތުން (+2) ގްރޫޕްގެ އެއްވަނައިގައި އޮތްއިރު ދެކުނު ކޮރެއާ އޮތީ 3 ޕޮއިންޓާ އެކު (+1 ގެ ތަފާތުން) ތާވަލުގެ ދެވަނައިގައެވެ.

މިއާއެކު، ފުރަތަމަ މެޗަށް ފަހު ޗެކް ރިޕަބްލިކް އަދި ދެކުނު އެފްރިކާ އޮތީ ގްރޫޕް އޭގެ ފުލުގައެވެ. ދެވަނަ ބުރަށް ދިއުމުގެ އުންމީދު ދެމެހެއްޓުމަށް ޓަކައި މި ދެ ޓީމަށް ކުރިއަށް އޮތީ އުނދަގޫ ދަތުރެކެވެ.