އައިއެޗްއެފް ޓްރޮފީ: ބަންގްލަދޭޝް އަތުން ރާއްޖެ ބަލިވެއްޖެ

އައިއެޗްއެފް ޓްރޮފީ ޒޯން 2މެންސް ޖޫނިއާ ޗެމްޕިއަންޝިޕް 2026ގައި ރާއްޖޭގެ 18އަހަރުން ދަށުގެ ފިރިހެން ހޭންޑްބޯޅަ ޓީމު ކުޅުނު ދެވަނަ މެޗުގައި ބަންގްލަދޭޝް އަތުން 23-32އިން ބަލިވެއްޖެއެވެ. 

މި ބަލިވުމާއެކު ވެސް، ވަރުގަދަ ބަންގްލަދޭޝްއާ ދެކޮޅަށް ދިވެހި ޒުވާން ކުޅުންތެރިން ވަނީ ދޫނުދީ ހިތްވަރާ އެކު މޮޅު ކުޅުމެއް ދައްކައިފައެވެ.

މުބާރާތުގެ ފުރަތަމަ މެޗުގައި އަފްޣާނިސްތާނާ ބައްދަލުކޮށް 38-21ގެ ތަފާތު ބޮޑު ނަތީޖާއަކުން ރާއްޖެ ވަނީ މޮޅުވެފައެވެ. އެ މޮޅާއެކު ބޮޑު އިތުބާރަކާ އެކު ދެވަނަ މެޗަށް ނުކުތް ނަމަވެސް، މި ފަހަރުގެ ނަތީޖާ ރާއްޖެ ކޮޅަށް އަނބުރާލެވޭ ގޮތެއް ނުވިއެވެ. އެހެންނަމަވެސް، މެޗުގެ ފަހު ސިކުންތާ ހަމައަށް ވެސް ދިވެހި ކުޅުންތެރިން ވަނީ ކޮންމެ ބޯޅައަކަށް ވެސް ފައިޓްކޮށް، ގިނަ ފުރުސަތުތަކެއް ތަނަވަސްކޮށްފައެވެ.

މިހާތަނަށް ކުޅުނު ދެ މެޗުން އެއް މެޗުން މޮޅުވެ، އަނެއް މެޗުން ބަލިވެފައިވާއިރު، މުބާރާތުގެ ކުރިއަށް ހުރި މަރުހަލާތަކަށް ދިއުމުގެ އުއްމީދު ރާއްޖެއަށް އަދިވެސް އެބައޮތެވެ. ޓީމުގެ އޮފިޝަލުން ވަނީ ކުޅުންތެރިން ދެއްކި ހިތްވަރަށާއި ކުރި މަސައްކަތަށް ވަރަށް ބޮޑަށް ތައުރީފުކޮށްފައެވެ. އަދި ސަރަހައްދީ ފެންވަރުގެ ވަރުގަދަ ޓީމުތަކާ ދެކޮޅަށް ކުޅެގެން ލިބުނު ތަޖުރިބާއަކީ ކުޅުންތެރިންގެ ކުރިއެރުމަށް ލިބުނު މުހިންމު ފުރުސަތެއްގެ ގޮތުގައި އޮފިޝަލުން ފާހަގަކުރިއެވެ.

ދިވެހި ޓީމުން މިހާރު ތައްޔާރުވަމުންދަނީ މާދަމާ ނޭޕާލާ ދެކޮޅަށް ކުޅޭ މުހިންމު މެޗަށެވެ. މި މެޗުން މޮޅުވެ، އަލުން މޮޅުވުމުގެ މަގަށް އެޅުމަކީ ޒުވާން ޓީމުގެ އަމާޒެކެވެ. މީގެ އިތުރުން، ގްރޫޕް ސްޓޭޖުގެ ފަހު މެޗުގައި 14 ޖޫން ގައި ރާއްޖެ ނުކުންނާނީ އިންޑިއާއާ ދެކޮޅަށެވެ.

ބަންގްލަދޭޝް އަތުން ބަލިވި ނަމަވެސް، ޓީމުގެ ރޫހު ހުރީ ވަރަށް މަތީގައެވެ. އަދި މި މެޗުން ލިބުނު ފިލާވަޅުތަކުގެ ބޭނުން ހިފައި، ކުރިއަށް ހުރި މެޗުތަކުގައި އިތުރު ކުރިއެރުންތަކެއް ހޯދުމަށް ކުޅުންތެރިން ތިބީ ވަރަށް ބޮޑަށް އަޒުމް ކަނޑައަޅައިގެންނެވެ.