ޔަމަނުގެ ހޫތީންގެ ހަމަލާތަކާ ގުޅިގެން އޭޝިއަން ކަޕް ފަސްކުރުމުގެ ބިރު ބޮޑުވެއްޖެ

ޔަމަނުގެ ހޫތީ ހަނގުރާމަވެރިން ސައުދީ އަރަބިއްޔާއަށް އަމާޒުކޮށް ދެމުންގެންދާ ނުރައްކާތެރި ހަމަލާތަކާ ގުޅިގެން، އަންނަ އަހަރު ބޭއްވުމަށް ތާވަލުކޮށްފައިވާ އޭޝިއަން ކަޕް ފުޓްބޯޅަ މުބާރާތް ފަސްކުރަން ޖެހިދާނެކަމުގެ އިންޒާރު އޭޝިއަން ފުޓްބޯލް ކޮންފެޑެރޭޝަން (އޭއެފްސީ)އިން ދީފިއެވެ.

ފީފާ ކައުންސިލްގެ ބައްދަލުވުމެއްގެ ތެރެއިން މީޑިއާތަކަށް މައުލޫމާތު ދެއްވަމުން އޭއެފްސީގެ ރައީސް ޝައިޚް ސަލްމާން ބިން އިބްރާހީމް އަލް ޚަލީފާ ވިދާޅުވީ، ސައުދީގެ ސަލާމަތީ ކަންކަން މިހާރު އޮތް ގޮތް އެ އިދާރާއިން ވަރަށް ގާތުން ބަލަމުން އަންނަ ކަމަށެވެ. އަދި ހާލަތު ނިޔާކުރާ ގޮތުން މުބާރާތް އެއް އަހަރަށް ފަސްކުރަން ޖެހުމަކީ އެކަށީގެންވާ ކަމެއްކަން ފާހަގަކުރައްވައި އޭނާ ވިދާޅުވީ، އަވަސްއަރުވާލައިގެން ގޮތެއް ނިންމުމުގެ ބަދަލުގައި އެންމެ ފަހުގެ ނިންމުމެއް ނިންމާނީ އަންނަ ނޮވެމްބަރު މަހުގެ ފަހުކޮޅުގައި ކަމަށެވެ. 

ކޮންމެ ހަތަރު އަހަރަކުން އެއްފަހަރު ބާއްވާ މި ބޮޑު މުބާރާތް ފެށުމަށް މިހާރު ހަމަޖެހިފައިވަނީ ކުރިއަށް އޮތް ޖެނުއަރީ މަހުގެ 7ވަނަ ދުވަހުގައެވެ. ޝައިޚް ސަލްމާން ވިދާޅުވި ގޮތުގައި، ކަންކަން ކުއްލިއަކަށް ބަދަލުވުމަކީ އެކަށީގެންވާ ކަމަކަށްވާއިރު، މަސްރަހު ގޯސްވުމާއި ރަނގަޅުވުމުގެ ފުރުސަތުވެސް އެބައޮތެވެ. އެހެންކަމުން މުބާރާތުގެ ތާރީޚަށް ބަދަލު ގެންނަން ޖެހިއްޖެ ހާލަތެއްގައި، ދެން މި މުބާރާތް ބާއްވާނީ 2028ވަނަ އަހަރުގައި ކަމަށް އޭނާ އިޝާރާތްކުރެއްވިއެވެ.

ސަލާމަތީ ސަބަބުތަކަށްޓަކައި ސައުދީ ޕްރޮފެޝަނަލް ލީގުގެ ބައެއް މެޗުތަކުގެ ޝެޑިއުލަށްވެސް މިހާރު ވަނީ ބަދަލުތަކެއް ގެނެސްފައެވެ. އެގޮތުން، އަލް ރިޔާދާއި އަލް ހިލާލް ބައްދަލުކުރާ މެޗުގެ އިތުރުން، އަންނަ ހުކުރު ދުވަހު ކުޅުމަށް ހަމަޖެހިފައި އޮތް އަލް އިއްތިހާދާއި އައްޝަބާބްގެ މެޗު މިހާރު ވަނީ ޑިސެމްބަރު މަހުގެ 19ވަނަ ދުވަހަށް ފަސްކޮށްފައެވެ. ހަމައެއާއެކު، މިއަދު ކުޅުމަށް ތާވަލުކުރި އަލް އަހްލީ އާއި އައް ނަސްރުގެ މެޗު ދެން ކުޅޭނީ އަންނަ މާޗު މަހުގެ 6ވަނަ ދުވަހުއެވެ. މި މެޗުތައް ފިޔަވައި އެހެން މެޗުތައް ތާވަލާއެއްގޮތަށް ކުރިއަށްދާނެއެވެ. މީގެ އިތުރުން، އޭއެފްސީ ޗެމްޕިއަންސް ލީގުގައި އައް ނަސްރާއި އުޒްބެކިސްތާނުގެ ފެރްގާނާ ސައުދީގެ ވެރިރަށް ރިޔާދުގައި ކުޅެން އޮތް މެޗުވެސް މިދިޔަ ހޯމަ ދުވަހު ވަނީ ވަރަށް ބޮޑަށް ލަސްވެފައެވެ.

ހޫތީންގެ އިންޒާރުތައް މިހާރު އިތުރުވެފައިވާއިރު، މައްކާ އާއި މަދީނާ ފިޔަވައި ސައުދީގެ އެހެން ބޮޑެތި ސިޓީތަކަށް ކުރިއަށް އޮތް ދުވަސްތަކުގައި ހަމަލާދޭނެކަމުގެ އިންޒާރު އެމީހުން ވަނީ ދީފައެވެ. އެމީހުން އެންމެ ފަހުން ދިން ހަމަލާތަކުގައި 13މީހެއްގެ ފުރާނަ ގޮސްފައިވާއިރު، މިއީ 2015ވަނަ އަހަރުގެ ފަހުން ސައުދީއަށް އަމާޒުކޮށް ދިން އެންމެ ވަރުގަދަ ހަމަލާތަކެވެ. އިއްޔެ ޖިއްދާއަށް އަމާޒުކޮށް ފޮނުވާލި މިސައިލެއް ސައުދީ ކޯލިޝަނުން ވައްޓާލާފައިވީ ނަމަވެސް، ސައުދީގެ ތެޔޮ ކާރުޚާނާތަކަށް ހަމަލާދޭނެކަމުގެ ބިރު އަދިވެސް ވަނީ ބޮޑުވެފައެވެ.