މިދިޔަ އަހަރުގެ ޗެމްޕިއަންސް ލީގު ކާމިޔާބީއަށް ފަހު ވެސް ޕެރިސް ސެއިންޓް-ޖާމަން (ޕީއެސްޖީ)ގެ ކާމިޔާބީއަށް އޮތް ފެންބޮވައިގަތުން ކުޑައެއް ނުވެއެވެ. ކެޕްޓަން މާކީނިއޯސްއާއި ކޯޗު ލުއިސް އެންރީކޭ ބުނާ ގޮތުގައި ކްލަބުން ހޯދި ތާރީޚީ ކާމިޔާބީގެ ސަބަބުން އިތުރު ތަށިތައް ހޯދުމަށް އޮތް ޝައުގުވެރިކަން ވަނީ އިތުރަށް ވަރުގަދަވެފައެވެ.
ބުޑަޕެސްޓްގެ ޕުސްކަސް އެރީނާގައި މިރޭ ކުޅޭ ފައިނަލް މެޗުގައި ޕީއެސްޖީ ނުކުންނާނީ އާސެނަލްއާ ދެކޮޅަށެވެ. މިދިޔަ ސީޒަނުގައި އެންމެ ފަހުން ތަށި އުފުލާލުމަށް ފަހު، ޔޫރަޕްގެ އެންމެ މޮޅު ކްލަބުތަކުގެ ތެރޭގައި އެޓީމުގެ މަގާމު ވަރުގަދަކުރުމަށް ޕީއެސްޖީން ދަނީ މަސައްކަތް ކުރަމުންނެވެ.
ނަމަވެސް މާކީނިއޯސް ބުނީ މިދިޔަ ސީޒަނުގެ ފައިނަލް މެޗުގައި އިންޓަ މިލާން އަތުން 5-0އިން އެޓީމު މޮޅުވި މެޗުން ލިބުނު އުފާވެރިކަމުގެ ސަބަބުން، އެ އިހުސާސް އަލުން ތަޖުރިބާކުރުމަށް މުޅި ސްކޮޑުގެ އަޒުމް އިތުރަށް ވަރުގަދަވެފައިވާ ކަމަށެވެ.
"އެ މޯޓިވޭޝަން (ހިތްވަރު) ހުރުމަކީ ވަރަށް މުހިންމު ކަމެއް،" ނޫސްވެރިންގެ ބައްދަލުވުމެއްގައި މާކީނިއޯސް ބުންޏެވެ.
"މިދިޔަ އަހަރު އަހަރެމެން އެ ވާހަކަ ދެއްކިން، އަދި ދަނޑުމަތީގައި އެކަން ދައްކައިދިނިން. އެއްފަހަރު ޗެމްޕިއަންސް ލީގު ކާމިޔާބުކޮށް، އެ ތަށީގެ ރަހަޔާއި އެ ވަގުތުތައް ތަޖުރިބާކުރުމުން، އަލުން އެކަން ތަޖުރިބާކުރަން ބޭނުންވާނެ،" އޭނާ ބުންޏެވެ.
ބްރެޒިލްގެ ޑިފެންޑަރު ބުނީ ޕީއެސްޖީން މިދިޔަ ސީޒަނުގެ ތަޖުރިބާއިން ގިނަ ކަންތައްތަކެއް ދަސްކޮށްފައިވާ ކަމަށާއި، ޗެމްޕިއަންސް ލީގުގެ ފައިނަލަކާ ގުޅިގެން ކުރިމަތިވާ ޕްރެޝަރާއި އަޑުގަދަވުންތަކާ ކުރިމަތިލުމަށް މިހާރު އެޓީމު މާ ބޮޑަށް ތައްޔާރުވެފައިވާ ކަމަށެވެ.
"މިފަދަ މެޗުތަކުގެ ވަށައިގެން ގިނަ ކަންތައްތަކެއް ހުރޭ، އުއްމީދުތަކާއި ޕްރެޝަރުތައް،" އޭނާ ބުންޏެވެ.
"ޑްރެސިން ރޫމްގައި ދެވުނު މެސެޖަކީ އެއްވެސް ކަމެއް ބަދަލުނުކޮށް، ކުރިއެކޭ ވެސް އެއްގޮތަށް މަސައްކަތް ކުރިއަށް ގެންދިއުމަށާއި، މިދިޔަ އަހަރު ހުރި ފެންބޮވައިގަތުން އެގޮތުގައި ހިފެހެއްޓުމަށް.
"މިއަދު ވެސް، އަހަރެންގެ ހިތުގައި ހުރީ މިދިޔަ ސީޒަނުގައި ހުރި ފަދަ އިހުސާސްތަކާއި ޖަޒުބާތުތައް،" އޭނާ ބުންޏެވެ.
މިދިޔަ ސީޒަނުގައި ޕީއެސްޖީއަށް ފުރަތަމަ ޗެމްޕިއަންސް ލީގު ތަށި ހޯދައިދިން ލުއިސް އެންރީކޭ ބުނީ، އެޓީމުގެ މޯޓިވޭޝަނަކީ ތާރީޚެއް ބިނާކުރުމަށް ވުރެ ބޮޑަށް، ޔޫރަޕްގެ އެންމެ މޮޅު ޓީމުގެ ގޮތުގައި ދެމިއޮތުން ކަމަށެވެ.
"އަހަރެމެންގެ މޯޓިވޭޝަނަކީ ތާރީޚު ލިޔުމެއް ނޫން، ސަބަބަކީ މިދިޔަ އަހަރު އަހަރެމެން އެކަން ކޮށްފިން. އަހަރެމެންގެ މޯޓިވޭޝަނަކީ ޔޫރަޕާއި ދުނިޔޭގެ އެންމެ މޮޅު ޓީމުތަކުގެ ތެރޭގައި ދެމިއޮތުން،" އޭނާ ބުންޏެވެ.
ތައްޓަށް ޓަކައި ޕީއެސްޖީ ނުކުންނާނީ އާސެނަލްއާ ދެކޮޅަށެވެ. މީގެ އަހަރެއް ކުރިން ޕީއެސްޖީން ކުރި ފަދައިން، ގަނާސް (އާސެނަލް) ވެސް މިހާރު ދަނީ އެޓީމުގެ ފުރަތަމަ ޗެމްޕިއަންސް ލީގު ތަށި ހޯދުމަށް މަސައްކަތް ކުރަމުންނެވެ.
ކޯޗު ވަނީ އާސެނަލްއާއި މިކޭލް އާޓެޓާއަށް ތައުރީފުކޮށްފައެވެ. އޭނާ ބުނީ އެއްވަރެއްގައި ކުޅުނު ޓީމަކީ އާސެނަލް ކަމަށްވުމުން، ޕްރިމިއާ ލީގުގެ ތަށި ހޯދުމަށް އެޓީމު ހައްގު ކަމަށެވެ.
ފައިގެ ކޮނޑުމަހަށް ދިމާވި އަނިޔާއިން މުޅިން ފަސޭހަވެފައިވާ ޕީއެސްޖީގެ ފޯވާޑް އުސްމާން ޑެމްބެލޭ ބުނީ، ބެލޮންޑިއޯއާ ގުޅޭގޮތުން ދެކެވޭ ވާހަކަތަކާ އެކު އޭނާގެ އަމިއްލަ އުންމީދުތަކަކީ ކްލަބުގެ ލަނޑުދަނޑިތަކަށް ވުރެ މާކުޑަ ކަމެއް ކަމަށެވެ.
"އޭގެ ސަބަބުން އަހަރެންގެ އުޅުމަކަށް ނުވަތަ ކުޅުމުގެ ވައްޓަފާޅިއަކަށް ބަދަލެއް ނާދޭ،" ޑެމްބެލޭ ބުންޏެވެ.
"އަހަރެން އަބަދުވެސް ބޭނުންވަނީ މި ކްލަބާއި، މި ސްކޮޑާއި އަދި މި ސްޓާފުންނާ އެކު ތަށިތައް ހޯދަން. އަމިއްލަ ތަށިތައް ލިބޭނީ އޭގެ ފަހުން. އެންމެ މުހިންމު ކަމަކީ ޕީއެސްޖީއާ އެކު ކާމިޔާބީ ހޯދުން،" އޭނާ ބުންޏެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.