ސިޓީން ދައުވާތައް އިސްތިއުނާފުކޮށްފި

އިންގްލިޝް ޕްރިމިއަރ ލީގުގެ ފަރާތުން މެންޗެސްޓަރ ސިޓީއާ ދެކޮޅަށް އުފުލި މާލީ އޮޅުވާލުމުގެ 114ދައުވާއެއް ސާބިތުވާކަމަށް މިނިވަން ކޮމިޝަނަކުން ކަނޑައެޅުމާ ގުޅިގެން، އެ ނިންމުން ބާތިލުކުރުމަށް އެދި ބުރާސްފަތި ދުވަހުގެ ރޭ އެ ކުލަބުން ރަސްމީކޮށް އިސްތިއުނާފަށް ހުށަހަޅައިފިއެވެ. 

އިސްތިއުނާފުގެ މަރުހަލާ ކުރިއަށް ގެންދިއުމަށް ޓަކައި ޕްރިމިއަރ ލީގުން މުޅިން އާ ޕެނަލެއް އެކުލަވާލާނެއެވެ. ލީގުގެ ގަވާއިދުތައް ބަޔާންކުރާ ގޮތުން، މި މަރުހަލާގައި މުޅި މައްސަލަ އަލުން ތަހުގީގެއް ނުކުރާނެއެވެ. އޭގެ ބަދަލުގައި އޮންނާނީ ފުރަތަމަ ނިންމުން ނިންމި ގޮތް މުރާޖާކުރުމެވެ. މި މައްސަލަ ހުށަހަޅާތާ 12ހަފުތާގެ ތެރޭގައި އިސްތިއުނާފީ އަޑުއެހުންތައް ނިންމަންޖެހޭއިރު، އޭގެ ފަހުން 30ދުވަހުގެ ތެރޭގައި އެ ޕެނަލެއްގެ ނިންމުން އާންމުކުރަން ލާޒިމުވާނެއެވެ.

ސިޓީގެ މައްޗަށް ސާބިތުވެފައިވާ މައިގަނޑު ކުށްތަކުގެ ތެރޭގައި، ކުލަބުގެ އާމްދަނީ ބޮޑުކޮށް ދެއްކުމަށް ޓަކައި ސްޕޮންސަރުންނާ އެކު ހަދާފައިވާ ވަގު އެއްބަސްވުންތަކެއް ހިމެނެއެވެ. އެގޮތުން، ސްޕޮންސަރުންގެ އަތުން ލިބުނު ފައިސާގެ ގޮތުގައި ދައްކާފައިވާ 800މިލިއަނަށް ވުރެ ގިނަ ޕައުންޑަކީ ހަގީގަތުގައި ކުލަބުގެ ވެރިންގެ އަމިއްލަ ޖީބުން ޚަރަދުކޮށްފައިވާ ފައިސާކަމަށް ކޮމިޝަނުގެ ރިޕޯޓުގައި ފާހަގަކޮށްފައިވެއެވެ. ހަތަރު އަހަރަށް ދެމިގެންދިޔަ ތަހުގީގަކަށް ފަހު، އަޑުއެހުންތައް ނިމުނުތާ 22މަސް ފަހުން ކޮމިޝަނުން ނިންމުން އާންމުކުރުމުން ގިނަ ބަޔަކު ވަނީ އެހާ ގިނަ ދުވަސް ހޭދަވުމުން އެކަމަށް ފާޑުކިޔާފައެވެ.

ކުޅިވަރުގެ ގާނޫނީ މާހިރުން ލަފާކުރައްވާ ގޮތުގައި، އިސްތިއުނާފުން ސިޓީއަށް ކާމިޔާބު ހޯދުމަކީ ނާދިރު ކަމެކެވެ. ސަބަބަކީ ފުރަތަމަ ނިންމުމަކީ ގިނަ ހެކިތަކަކާއި ބަޔާންތަކެއްގެ މައްޗަށް ބިނާކޮށް ނިންމާފައިވާ ފުރިހަމަ ނިންމުމަކަށް ވުމެވެ. ސިޓީއަށް ސަލާމަތްވެވެން އޮތް ހަމައެކަނި މަގަކީ ކޮމިޝަނުގެ ނިންމުމުގައި ގާނޫނީ ފުށުއެރުންތަކެއް ހުރިކަން ސާބިތުކޮށްދިނުމެވެ. ދާދި ފަހުން އެވަޓަން އަދި ނޮޓިންގހަމް ފޮރެސްޓުން ކުރި މިފަދަ އިސްތިއުނާފުތައް ވެސް ވަނީ ނާކާމިޔާބުވެފައެވެ. އެހެން ނަމަވެސް ސިޓީން މެދުކެނޑުމެއްނެތި ބުނަމުންދަނީ އެއްވެސް ގަވާއިދަކާ ޚިލާފުވެފައި ނުވާނެ ކަމަށެވެ. ބެލެވޭ ގޮތުގައި މިފަހަރުގެ އިސްތިއުނާފު މަރުހަލާ ކުރިއަށްވުރެ މާ އަވަހަށް ނިމިގެންދާނެއެވެ.