އީންއާއި އީޝާ ޝޫޓިންގެ ގައުމީ ރެކޯޑު މުގުރާލައިފި

ޖަޕާނުގައި މިހާރު ކުރިއަށްދާ 2026ވަނަ އަހަރުގެ އޭޝިއަން ގޭމްސްގެ 10މީޓަރުގެ އެއަރ ރައިފަލް އިވެންޓުގައި ވާދަކޮށް، ރާއްޖޭގެ ހުނަރުވެރި ދެ ޝޫޓަރުން ކަމަށްވާ އައިޝަތު އީން އަސްލަމް އަދި އައިޝަތު އީޝާ ޝަހީދު، އެ ކުޅުންތެރިންގެ އަމިއްލަ ނަމުގައި އޮތް ގައުމީ ރެކޯޑުތައް އައުކޮށް ބޮޑު ކާމިޔާބީއެއް ހޯދައިފިއެވެ. 

މި މުބާރާތުގައި އީޝާ ވަނީ 624.1ޕޮއިންޓް ހޯދައިގެން އޭނާގެ ކުރީގެ ރެކޯޑު ކަމަށްވާ 609.6ޕޮއިންޓް ފަހަތަށް ޖައްސާލާފައެވެ. ހަމައެއާ އެކު، ކުރިން 601.2ޕޮއިންޓާއެކު ރެކޯޑު ހަދާފައިވާ އީން ވަނީ މި ފަހަރު 609.9ޕޮއިންޓް ސްކޯކޮށް، އޭނާގެ ކުރީގެ ނަތީޖާ ވަރަށް ބޮޑަށް ފުރިހަމަކޮށްފައެވެ. މި ދެ ކުޅުންތެރިން ވެސް މުގުރާލާފައި ވަނީ މީގެ ކުރިން ވެސް އެ ކުޅުންތެރިން އަމިއްލައަށް ގާއިމުކޮށްފައިވާ ރެކޯޑުތަކެވެ.

ރާއްޖޭގައި އެންމެ ހަލުވިކަމާ އެކު ކުރިއަރަމުން އަންނަ އެއް ކުޅިވަރު ކަމަށްވާ ޝޫޓިންގައި، މި ފަހަރުގެ ގޭމްސްއަށް ރާއްޖެއިން 12އެތުލީޓުންގެ މައްޗަށް އެކުލެވޭ ބޮޑު ޓީމެއް ވަނީ ފޮނުވާފައެވެ. މިއީ މިއަހަރުގެ މުބާރާތުގައި އެއް ކުޅިވަރަކުން ރާއްޖެ ތަމްސީލުކުރާ އެންމެ ބޮޑު ކޮންޓިންޖެންޓެވެ. އަންހެން ކުޅުންތެރިން ހޯދި މި ކާމިޔާބީގެ ފަހަތުގައި ވަނީ މުބާރާތް ފެށުމުގެ ކުރިން ޖަޕާނުގައި ގައުމީ ޝޫޓިން ޓީމުން ފުރިހަމަކުރި ޚާއްސަ ތަމްރީނުތަކުގެ ނަތީޖާކަމަށް އެސޯސިއޭޝަނުން ފާހަގަކުރެއެވެ. 

މި ގޭމްސްގެ ފިރިހެން ކެޓަގަރީގެ އެއަރ ރައިފަލް ކޮލިފައިން މެޗުތައް މި މަހުގެ 21ވަނަ ދުވަހު ބޭއްވުމަށް ހަމަޖެހިފައިވާއިރު، މިއަދު ފިރިހެން ޕްރީ-އިވެންޓުތައް ކުރިއަށްދާނެއެވެ. އޭޝިއަން ގޭމްސްގައި ޝޫޓިންގެ އިތުރުން އެތުލެޓިކްސް، ފެތުން، ބެޑްމިންޓަން، ބީޗް ވޮލީ، ސާފިންގ އަދި ޓޭބަލް ޓެނިސް ހިމެނޭހެން ޖުމްލަ 7ކުޅިވަރަކުން ދިވެހިރާއްޖެ ވާދަކުރެއެވެ.