ބައިނަލްއަޤްވާމީ ދެ މުބާރާތަކަށް ޕެރަ ޓީމު ތައްޔާރުވެއްޖެ

ޖަޕާނުގައި މި މަހު ބާއްވާ ފަސްވަނަ އޭޝިއަން ޕެރަ ގޭމްސްގެ އިތުރުން، ބައިނަލްއަޤްވާމީ ގިނަ ހަރަކާތްތަކެއްގައި ވާދަކޮށް ރާއްޖެއަށް ކާމިޔާބީ ހޯދައިދިނުމުގެ މަތިވެރި އަމާޒުގައި ޤައުމީ ޕެރަ ޓީމުގެ އެތުލީޓުން ވަރުގަދަ ފަރިތަކުރުންތަކެއް ފަށައިފިއެވެ.

މޯލްޑިވްސް ޕެރަލިމްޕިކް ކޮމިޓީގެ ސެކްރެޓަރީ ޖެނެރަލް އަހުމަދު މުހައްމަދު، ދައުލަތުގެ މީޑިއާއަށް މައުލޫމާތު ދެއްވަމުން ހާމަކުރެއްވި ގޮތުގައި، ދިވެހި ޕެރަ އެތުލީޓުން އެންމެ އަވަހަށްވެސް ކުރިމަތިލާނީ އޭޝިއަން ޕެރަ ގޭމްސްއާއެވެ. މި މަހުގެ 18އިން 24އަށް ޖަޕާނުގެ އައިޗީ ނަގޯޔާ ސިޓީގައި ކުރިއަށްދާ މި ބޮޑު ކުޅިވަރު އީދުގައި ރާއްޖެ ތަމްސީލުކުރާނީ ފާޠިމަތު އިބްރާހީމާއި، ޢަބްދުﷲ އަޔާން އަސްގަރުގެ އިތުރުން ޢަބްދުއްރައްޒާޤެވެ.

އޭޝިއަން ޕެރަ ގޭމްސްގެ އިތުރުންވެސް މުހިންމު މުބާރާތްތަކެއްގައި ދިވެހި ކުޅުންތެރިން ބައިވެރިވުމަށް ވަނީ ހަމަޖެހިފައެވެ. އެގޮތުން، އަންނަ ނޮވެމްބަރު މަހުގެ 24އިން 29އަށް ބޭއްވުމަށް ތާވަލުކޮށްފައިވާ ތައިލެންޑް އޯޕަން ޕެރަ ބެޑްމިންޓަން ޗެމްޕިއަންޝިޕްގައި ވާދަކުރާނީ ޢާއިޝަތު ނަޒާހާއެވެ. ހަމައެއާ އެކު، ނޮވެމްބަރު 16އިން ފެށިގެން ދިހަ ދުވަހުގެ މުއްދަތަށް ދެކުނު ކޮރެއާގައި ކުރިއަށްގެންދާ ޚާއްޞަ ތަމްރީނު ޕްރޮގްރާމެއްގައި ޙައްވާ އީޝަލް ރިޔާޒާއި ޓީމާ އަލަށް ގުޅުނު އާޔަން ބައިވެރިވާނެކަމަށް ވެސް ކޮމިޓީން ވަނީ ކަށަވަރުކޮށްދީފައެވެ.

ރާއްޖޭގެ ޕެރަ އެތުލީޓުންނަށް ފެންވަރު ރަނގަޅު ތަމްރީނުތަކާއި ބައިނަލްއަޤްވާމީ ފުރުސަތުތައް ފަހިކޮށްދިނުމަށް ޕެރަލިމްޕިކް ކޮމިޓީން އަންނަނީ ކެނޑިނޭޅި މަސައްކަތްކުރަމުންނެވެ. މި މަސައްކަތުގެ ތެރެއިން، އޭޝިއަން ޕެރަ ގޭމްސްއަށް ފުރިހަމައަށް ތައްޔާރުވުމުގެ ގޮތުން ޤައުމީ ޓީމުގެ އެތުލީޓު އަޔާން ވަނީ ދާދި ފަހުން އުޒްބެކިސްތާނުގައި "ރޯޑް ޓު ނަގޯޔާ"ގެ ނަމުގައި ކުރިއަށްގެންދިޔަ ހައި ޕާފޯމަންސް ތަމްރީނު ކޭމްޕެއްވެސް ކާމިޔާބުކަމާ އެކު ފުރިހަމަކޮށްފައެވެ.