ޝޫޓަރު އީޝަލް ޤައުމީ ރިކޯޑު އާކޮށްފި

ޖަޕާނުގެ އައިޗީ-ނަގޯޔާގައި މިހާރު ކުޅެވެމުންދާ 20ވަނަ އޭޝިއަން ގޭމްސްގެ އަންހެނުންގެ 10މީޓަރު އެއަރ ޕިސްޓަލް އިވެންޓުގައި މޮޅު ހުނަރެއް ދައްކައި، ދިވެހިރާއްޖޭގެ ޝޫޓިންގ އެތުލީޓު މަރިޔަމް އީޝަލް މިސްބާހު މިއަދު އައު ޤައުމީ ރިކޯޑެއް ޤާއިމުކޮށްފިއެވެ.

އީޝަލް މި ތާރީޚީ ކާމިޔާބީ ހާސިލުކުރީ މިއަދު ކުރިއަށްދިޔަ އިވެންޓުގައި ޖުމްލަ 558ޕޮއިންޓު ހޯދައިގެންނެވެ. މީގެކުރިން މި ރިކޯޑު ދަމަހައްޓަމުން އައީ 2019ވަނަ އަހަރު ނޭޕާލްގައި ބޭއްވުނު 13ވަނަ ސައުތު އޭޝިއަން ގޭމްސްގައި 546ޕޮއިންޓު ހޯދި ރިއުޝާ މުޙައްމަދެވެ. އެހެންކަމުން އީޝަލް މިވަނީ ބޮޑު ތަފާތަކުން ކުރީގެ ރިކޯޑު މުގުރާލާފައެވެ.

ނަގޯޔާ ޖެނެރަލް ޝޫޓިންގ ގެލެރީގައި ބޭއްވި މި އިވެންޓުގައި ދުނިޔޭގެ އެކި ކަންކޮޅުތަކުން 55އެތުލީޓުން ވާދަކުރިއިރު، ރާއްޖޭގެ އިތުރު ދެ ޝޫޓަރުން ކަމަށްވާ މަލަކް މުޙައްމަދު މުސްލިޙް އަދި ފާތިމަތު ފައިހާ ފަޒީލް ވެސް ވަނީ ބައިވެރިވެފައެވެ. މިގޮތުން މަލަކް 516ޕޮއިންޓު ހޯދިއިރު، ފައިހާއަށް ލިބުނީ 510ޕޮއިންޓެވެ. މީގެ އިތުރުން، ފިރިހެނުންގެ 10މީޓަރު އެއަރ ޕިސްޓަލް ކެޓަގަރީގައި ދިވެހި ޓީމު މާދަމާ ވާދަކުރުމަށް ވަނީ ހަމަޖެހިފައެވެ.

އޮކްޓޫބަރު މަހުގެ 4ވަނަ ދުވަހުގެ ނިޔަލަށް ޖަޕާނުގައި ކުރިއަށްދާ މި ބޮޑު މުބާރާތަކީ އޭޝިއާ ބައްރުގެ 45ޤައުމަކުން އެތުލީޓުން ބައިވެރިވާ މުބާރާތެކެވެ. މޯލްޑިވްސް އޮލިމްޕިކް ކޮމިޓީ (އެމްއޯސީ)އިން ހާމަކޮށްފައިވާ ގޮތުގައި، މިފަހަރުގެ ގޭމްސްގައި ރާއްޖެއިން 81މެންބަރުންގެ މައްޗަށް އެކުލެވޭ ބޮޑު ކޮންޓިންޖެންޓެއް ބައިވެރިވާއިރު، ޝޫޓިންގގެ އިތުރުން އެތުލެޓިކްސް، ފެތުން، ސާފިންގ، ބެޑްމިންޓަން، ޓޭބަލް ޓެނިސް އަދި ބީޗް ވޮލީބޯޅައިގައި ދިވެހި ކުޅުންތެރިން ވާދަކުރާނެއެވެ.