ޝޫޓިން އިވެންޓުން ދިވެހި ޓީމު އައު ޤައުމީ ރިކޯޑެއް މުގުރާލައިފި

ޖަޕާނުގެ އައިޗީ-ނަގޯޔާގައި މިހާރު ކުޅެވެމުންދާ 20ވަނަ އޭޝިއަން ގޭމްސްގެ 10މީޓަރު އެއަރ ރައިފަލް މިކްސް ޓީމު އިވެންޓުގައި މިއަދު ވާދަކޮށް، އަޙްމަދު މާއިދު މުޙައްމަދާއި އައިޝަތު އީޝާ ޝަހީދުގެ ޕެއާއިން ރާއްޖޭގެ ޝޫޓިންގެ އައު ޤައުމީ ރިކޯޑެއް ގާއިމުކޮށްފިއެވެ. 

ނަގޯޔާގެ ޖެނެރަލް ޝޫޓިން ގެލެރީގައި ކުރިއަށްދިޔަ މި އިވެންޓުގައި ދިވެހި ޕެއާއިން ވަނީ ޖުމްލަ 617.6ޕޮއިންޓު ހޯދައިގެން، ކުރިން އޮތް ރިކޯޑު ބޮޑު ތަފާތަކުން މުގުރާލާފައެވެ. މީގެ ކުރިން މި ރިކޯޑު ހިފަހައްޓަމުން އައީ ތައިލެންޑުގެ ބެންކޮކްގައި ބޭއްވުނު 2025ވަނަ އަހަރުގެ އޭޝިއަން ކަޕްގައި 601.6ޕޮއިންޓު ހާސިލުކުރި އިބްރާހީމް ޝިފާން އާއި އައިޝަތު ޔޫހާ އިމްތިޔާޒްއެވެ.

މި ފަހަރުގެ އޭޝިއަން ގޭމްސްގައި މާއިދާއި އީޝާ ދަނީ ތަފާތު މޮޅު ކުޅުމެއް ދައްކަމުންނެވެ. އެގޮތުން، 10މީޓަރުގެ އެއަރ ރައިފަލް އިންޑިވިޖުއަލް ބައިން ވެސް މި ދެ އެތުލީޓުން ވަނީ ދާދި ފަހުން ޤައުމީ ރިކޯޑުތައް އައުކޮށްފައެވެ. މީގެ އިތުރުން، މާދަމާ އޮންނަ 10މީޓަރުގެ އެއަރ ޕިސްޓަލް އިވެންޓުގައި ވެސް ދިވެހިރާއްޖޭގެ ޝޫޓަރުން ވާދަކުރުމަށް ވަނީ ހަމަޖެހިފައެވެ.

އަންނަ އޮކްޓޫބަރު މަހުގެ 4ވަނަ ދުވަހުގެ ނިޔަލަށް ޖަޕާނުގައި ކުރިއަށްދާ މި ބޮޑު ކުޅިވަރު ޢީދުގައި އޭޝިއާގެ 45 ޤައުމަކުން އެތުލީޓުން ބައިވެރިވެއެވެ. މޯލްޑިވްސް އޮލިމްޕިކް ކޮމިޓީ (އެމްއޯސީ)އިން ހާމަކޮށްފައިވާ ގޮތުގައި، 81މެންބަރުންގެ މައްޗަށް އެކުލެވޭ ދިވެހި ކޮންޓިންޖެންޓުން މި ފަހަރު 7ކުޅިވަރެއްގައި ވާދަކުރާނެއެވެ. އޭގެ ތެރޭގައި ޝޫޓިންގެ އިތުރުން ފެތުމާއި، އެތުލެޓިކްސް، ސާފިން، ބެޑްމިންޓަން، ޓޭބަލް ޓެނިސް އަދި ބީޗް ވޮލީބޯޅަ ހިމެނެއެވެ.