ވިކްޓަރީއަށް ދިއްދޫ މެޗަކީ އުނދަގޫ އިމްތިހާނަކަށް ވާނެކަމަށް މޯހަން ބުނެފި

ދިރާގު ދިވެހި ޕްރިމިއާ ލީގުގައި މިއަދު ހަވީރު ގަލޮޅު ދަނޑުގައި ދިއްދޫއާ ދެކޮޅަށް ނުކުންނައިރު، ފުރަތަމަ މެޗުގައި ދިއްދޫން ދެއްކި މޮޅު ކުޅުމުގެ ސަބަބުން މި މެޗަކީ ވިކްޓަރީ ސްޕޯޓްސް ކުލަބަށް އުނދަގޫ އިމްތިހާނަކަށް ވާނެކަމަށް އެ ޓީމުގެ ކޯޗު މުހައްމަދު ޝިޔާޒް (މޯހަން)ބުނެފިއެވެ.

މޯހަން ފާހަގަކުރި ގޮތުގައި، ލީގުގެ ފުރަތަމަ މެޗުގައި ބުރު ސްޕޯޓްސް ކްލަބްގެ މައްޗަށް 1-0އިން ކުރިހޯދިއިރު، ދިއްދޫ ޓީމުން ވަނީ ވަރަށް ފެންވަރު ރަނގަޅު އަދި ހަމަލާއަށް އިސްކަންދޭ ފުޓުބޯޅައެއް ކުޅެފައެވެ. އެހެންކަމުން، ބޮޑު އިތުބާރަކާއެކު ދިއްދޫން މިއަދު ނުކުންނައިރު، ވިކްޓަރީގެ ކުޅުންތެރިން މެޗަށް ވަރަށް ބޮޑަށް ސަމާލުކަން ދޭންޖެހޭނެކަމަށް އޭނާ ވަނީ އިރުޝާދުދީފައެވެ.

ޓީސީ ސްޕޯޓްސް ކްލަބް 5-1އިން ބަލިކޮށް ވިކްޓަރީން ލީގު ތާވަލުގެ އެންމެ ކުރީގައި އޮތް ނަމަވެސް، މޯހަން ދެކޭގޮތުގައި 18މެޗު ހިމެނޭ މުބާރާތެއްގެ އެންމެ މެޗަކުން ތާޖަށް ވާދަކުރާނެ ކުލަބުތައް ނިންމުމަކީ އަދި މާ އަވަސް ކަމެކެވެ. މީގެ އިތުރުން، ވިކްޓަރީގެ ސްކޮޑުގައި ތިބީ ގަލޮޅު ދަނޑުގެ މާހައުލަށް ފަރިތަ ކުޅުންތެރިން ކަމަށްވުމުން، މެޗުގެ ޕްރެޝަރާ ކުރިމަތިލުމުގެ ގާބިލުކަން އެ ކުޅުންތެރިންގެ ކިބައިގައި ހުންނާނެކަން އޭނާ ފާހަގަކުރިއެވެ.

ވިކްޓަރީއަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމަކީ އެ ޓީމުގެ އެއްވަނަ ގޯލްކީޕަރު މުހައްމަދު ޝަފީއު (ޗެކް)ގެ އިނގިއްޔަށް ލިބުނު އަނިޔާއަކާ ގުޅިގެން ތިން ހަފްތާއަށް ކުޅުމާ ދުރަށް ދާންޖެހުމެވެ. އެހެންނަމަވެސް، ޓީމުގައި ދެން ތިބި ދިވެހި ކީޕަރުންނަށް ފުރިހަމައަށް އިތުބާރުކުރާކަމަށް މޯހަން ވަނީ ބުނެފައެވެ.