ދިރާގު ދިވެހި ޕްރިމިއާ ލީގުގެ ތާރީޚުގައި ފުރަތަމަ ފަހަރަށް މާލެއިން ބޭރުގައި ކުޅުނު މެޗުގައި ގައްދޫ ރެކްރިއޭޝަން ކްލަބުން ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ރަނގަޅު ކުޅުމެއް ދައްކައި، 2-0އިން ބަލިވި ނަމަވެސް، އެ ޓީމުގެ ކުޅުންތެރިންނާއި ސަޕޯޓަރުންނަށް އާ ހިތްވަރަކާއި އުންމީދެއް ލިބިއްޖެކަމަށް ކޯޗު މުހައްމަދު ނަޒީހު ބުނެފިއެވެ.
ތާރީޚީ ގޮތުން ފާހަގަކޮށްލެވޭ މި ކުރިމަތިލުން ގައްދޫގައި ކުޅެފައިވާއިރު، ނަޒީހު ފާހަގަކުރި ގޮތުގައި މުބާރާތަށް އެންމެ ފުރިހަމައަށް ތައްޔާރުވެފައިވާ ނިއު ރޭޑިއަންޓް ފަދަ ވަރުގަދަ ޓީމަކާ ދެކޮޅަށް ނުކުމެ ގައްދޫ ކުޅުންތެރިން ދެއްކި ހިތްވަރަކީ ތައުރީފު ހައްގު މަސައްކަތެކެވެ. މެޗުގެ ކުރިންވެސް ނަޒީހު ވައުދުވި ފަދައިން، ބޮޑު ތަފާތަކުން ބަލިނުވެ، ވިސްނުންތެރިކަމާ އެކު ކުޅެ، ސަޕޯޓަރުން މާޔޫސް ނުވާނެ ފަދަ ނަތީޖާއެއް ނެރުމަކީ ކުރިއަށް ހުރި މެޗުތަކަށް ޓީމަށް ލިބުނު ވަރަށް ބޮޑު ކުރިއެރުމެއްކަމަށް އޭނާ ސިފަކުރިއެވެ.
ބައިކޮޅަށް ގިނަ ލަނޑުތަކެއް ވަދެގެން ބަލިވިނަމަ ކުޅުންތެރިންގެ ނަފްސާނިއްޔަތަށް ނޭދެވޭ އަސަރުތަކެއް ކުރާނެކަން ފާހަގަކުރަމުން ކޯޗު ބުނީ، މި ނަތީޖާގެ ސަބަބުން ލީގުގައި ދެން ހުރި މެޗުތަކުގައި މިއަށްވުރެ އެދެވޭ ނަތީޖާއެއް ނެރުމުގެ ރޫހު ކުޅުންތެރިންގެ ކިބައިގައި އަށަގަނެފައިވާ ކަމަށެވެ. މީގެ އިތުރުން، މި މެޗުގައި ބޭނުންކުރީ ގަވާއިދުން ފަރިތަކުރުންތަކަށް ހާޒިރުވި ކުޅުންތެރިންކަން ފާހަގަކޮށް، މިއީ ފުރަތަމަ ޑިވިޝަނުގައި ވާދަކުރުމުގެ ގާބިލުކަން ހުރި ސްކޮޑެއްކަން ސާބިތުކޮށްދީފިކަމަށް ވެސް ނަޒީހު ބުންޏެވެ.
މިއަހަރުގެ ލީގަށް ގައްދޫ ޓީމުން ކުރިމަތިލިއިރު، އެ ޓީމުގެ އެންމެ ބޮޑު އަމާޒަކީ ރެލިގޭޓް ނުވެ، ރާއްޖޭގެ އެންމެ މަތީ ފަންތީގެ ފުޓުބޯޅަ ލީގުގައި ދެމިއޮތުންކަން ނަޒީހު ވަނީ ތަކުރާރުކޮށްފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.