ހިލޭ ޓްރާންސްފާއެއްގައި އެންޓޯނިއޯ ވަޓްފޯޑާ ގުޅިއްޖެ

ނުރައްކާތެރި އެކްސިޑެންޓަކަށް ފަހު ފަރުވާ ހޯދުމަށް ފަހު އަދި ގަތަރުގައި ކުރު މުއްދަތެއް ހޭދަކުރުމަށް ފަހު، ވެސްޓް ހޭމް ޔުނައިޓެޑަށް ކުރިން ކުޅުނު ފޯވާޑް މިކޭލް އެންޓޯނިއޯ ހިލޭ ޓްރާންސްފާއެއްގެ ދަށުން އެއް އަހަރު ދުވަހުގެ އެއްބަސްވުމެއްގައި އިނގިރޭސި ޗެމްޕިއަންޝިޕްގެ ވަޓްފޯޑަށް ސޮއިކޮށްފިއެވެ.

އިނގިރޭސި ޕްރިމިއަރ ލީގުގައި ވެސްޓް ހޭމަށް އެންމެ ގިނަ ގޯލު ކާމިޔާބުކޮށްދިނުމުގެ ޝަރަފު ހޯދާފައިވާ އުމުރުން 36އަހަރުގެ ކުޅުންތެރިޔާއަށް ވަނީ ޑިސެމްބަރު 2024ގައި ކާރު އެކްސިޑެންޓަކާ ކުރިމަތިލާން ޖެހިފައެވެ. ފަރިތަކުރުންތައް ނިންމާލުމަށް ފަހު ގެއަށް ދިޔަ މަގުމަތީގައި ހިނގި މި ހާދިސާގައި އޭނާގެ ފަލަމަސްގަނޑުގެ ކަށިގަނޑު ހަތަރު ތަނަކުން ބިންދައިގެން ގޮސް، ވެސްޓް ހޭމްގައި އޭނާގެ ކެރިއަރަށް ހުއްޓުމެއް އައެވެ. 

މިދިޔަ ސީޒަނުގައި ވެސްޓް ހޭމް ޕްރިމިއަރ ލީގުގެ 18ވަނައަށް ވެއްޓި ޗެމްޕިއަންޝިޕަށް ރެލިގޭޓްވުމާ އެކު، އެ ކުލަބުން އޭނާގެ ކޮންޓްރެކްޓް އާނުކުރަން ނިންމުމުން 2025ވަނަ އަހަރުގެ އޮގަސްޓްގައި އެންޓޯނިއޯ ވަނީ ޓީމާ ވަކިވެފައެވެ. އޭގެ ފަހުން އޮޕަރޭޝަނުން ރަނގަޅުވެ، މިއަހަރުގެ މާޗު މަހުގެ ތެރޭގައި އޭނާ ކުޅެފައިވަނީ ގަތަރުގެ އަލް-ސައިލިޔާއަށެވެ.

ކުލަބާ ގުޅުމަށް ފަހު ނޫސްވެރިންނާ ވާހަކަދައްކަމުން އެންޓޯނިއޯ ފާހަގަކުރި ގޮތުގައި، ވަޓްފޯޑަކީ މޮޅެތި ކުޅުންތެރިންތަކެއް ހިމެނޭ، ނަތީޖާ ނެރުމަށް އުންމީދުކުރާ ބޮޑު ކުލަބެކެވެ. މީގެ ކުރިން ވަޓްފޯޑް ކޮޅަށް ލަނޑުތަކެއް ޖަހާފައިވާނެކަން ހަނދާންކޮށްދެމުން އޭނާ ބުނީ، މިހާރުގެ އަމާޒަކީ ފުރިހަމައަށް ފިޓުވެ، މި ޓީމަށް ގޯލުތަކެއް ކާމިޔާބުކޮށްދީ ކާމިޔާބީއާ ހަމައަށް ގެންގޮސްދިނުން ކަމަށެވެ.

ޗެމްޕިއަންޝިޕްގައި ވަޓްފޯޑް މިވަގުތު އޮތީ ކުޅުނު ހަ މެޗުން ހޯދި އަށް ޕޮއިންޓާއެކު ތާވަލުގެ 12ވަނައިގައެވެ.