ލިިވަޕޫލުން ފަހަތުން އަރައި އެތުލެޓިކޯ ބަލިކޮށްފި

ޔުއެފާ ޗެމްޕިއަންސް ލީގުގައި ރޭ އެންފީލްޑް ސްޓޭޑިއަމްގައި ކުޅުނު ފޯރިގަދަ މެޗުގައި ފުރަތަމަ ލަނޑު ވަދެފައި ވަނިކޮށް، ފަހަތުން އަރައި 2-1ގެ ނަތީޖާއަކުން އެތުލެޓިކޯ މެޑްރިޑް ބަލިކޮށް ލިވަޕޫލުން މުހިންމު މޮޅެއް ހާސިލުކޮށްފިއެވެ.

މި މެޗުގެ ފުރަތަމަ ހާފުގެ 17ވަނަ މިނެޓުގައި މާކޯސް ޔޮރެންޓޭ ކާމިޔާބުކުރި ލަނޑާއެކު ސްޕެއިންގެ އެތުލެޓިކޯ އިން މެޗުގެ ލީޑު ނެގި ނަމަވެސް، ފުރަތަމަ ހާފު ނިމުމުގެ ކުރިން ޑޮމިނިކް ސޮބޯސްލާއީ ވަނީ ލިވަޕޫލަށް ނަތީޖާ ހަމަހަމަކޮށްދީފައެވެ. އޭގެ ފަހުން، ދެވަނަ ހާފު ފެށިގެން ފަސްވަނަ މިނެޓުގައި ޕެނަލްޓީ އޭރިއާގެ ބޭރުން ފޮނުވާލި ބާރު ހަމަލާއަކުން ލިވަޕޫލްގެ މޮޅުވުމުގެ ލަނޑު ޖަހައިދިނީ ހުނަރުވެރި މިޑްފީލްޑަރު އެލެކްސިސް މެކް އެލިސްޓާއެވެ.

މެޗަށްފަހު ނޫސްވެރިންނާ ވާހަކަދައްކަމުން ލިވަޕޫލްގެ ފުރަތަމަ ލަނޑު ޖަހައިދިން ސޮބޯސްލާއީ ފާހަގަކުރި ގޮތުގައި، އެތުލެޓިކޯ ފަދަ ނުރައްކާތެރި އަދި ވަރުގަދަ ޓީމަކާ ދެކޮޅަށް ކުޅުމަކީ ވަރަށް އުނދަގޫ ކަމެކެވެ. ނަމަވެސް މެޗުގެ އެންމެ ފަހު ވަގުތާ ޖެހެންދެން ޓީމުން ދެއްކި ހިތްވަރާއި ކުރި ބުރަ މަސައްކަތުގެ ސަބަބުން މި މޮޅު އެ ޓީމަށް ޙައްޤުވާކަމަށް އޭނާ ބުންޏެވެ.

މީގެ އިތުރުން، ޗެމްޕިއަންސް ލީގުގައި ރޭ ކުޅުނު އެހެން މެޗަކަށް ބަލާއިރު، ޕޯޗުގަލްގެ ލިޒްބަންގައި ތުރުކީގެ ގަލަތަސާރާއި އާ ދެކޮޅަށް ކުޅުނު ސްޕޯޓިންގް ވެސް ވަނީ ފަހަތުން އަރައި މޮޅުވެފައެވެ. މެޗުގެ ފަސްވަނަ މިނެޓުގައި ލަނޑެއް ގެއްލިފައި ވަނިކޮށް، ސްޕޯޓިންގް އިން ވަނީ ކުޅުން ރަނގަޅުކޮށް 3-1ގެ ނަތީޖާއަކުން ގަލަތަސާރާއިގެ މައްޗަށް ކުރިހޯދާފައެވެ.