ބާކީ އޮތް ދެ މުބާރާތް ކާމިޔާބުކުރަން ވެމްކޯއިން އަމާޒު ހިފައިފި

ރާއްޖޭގެ އަންހެން ވޮލީބޯޅައިގެ އެންމެ ބާރުގަދަ ޓީމު ކަމަށްވާ ކުލަބް ވެމްކޯއިން، އެސޯސިއޭޝަން ކަޕްގައި ހޯދި ފަޚުރުވެރި ކާމިޔާބީއާ ގުޅިގެން، މި ސީޒަނުގައި ދެން ކުރިއަށް އޮތް ދެ މުބާރާތުގެ ތަށި ވެސް އުފުލާލުމުގެ ވަރުގަދަ އަޒުމަކާއެކު ނުކުންނަން ތައްޔާރުވެއްޖެ ކަމަށް އެ ޓީމުގެ އިސް ކޯޗު އަހުމަދު އަދީލް (ބޭބެ)ހާމަކޮށްފިއެވެ.

ޕީއެސްއެމް ނިއުސްއަށް މައުލޫމާތު ދެމުން އަދީލް ބުނެފައި ވަނީ، ކުރިއަށް ހުރި މުބާރާތްތަކާ ކުރިމަތިލާނީ ވަރަށް ކުރީއްސުރެ ރޭވިގެން، ފުރިހަމަ ތައްޔާރީތަކަކާ އެކު އެންމެ ވަރުގަދަ ފޯމުގައި ކަމަށެވެ. އަދި ޓީމުގެ ނަތީޖާ ނެރުމުގައި ބިދޭސީ ކުޅުންތެރިންގެ ދައުރު ބޮޑުކަން ފާހަގަކުރަމުން އޭނާ ބުނީ، އެންމެ ފަހުން ކުޅުނު މުބާރާތުގައި ޓީމަށް ކުޅުނު ބިދޭސީ ދެ ކުޅުންތެރިންގެ ފަރާތުން މޮޅު ކުޅުމެއް ފެނިގެންދިޔަ ކަމަށާއި، ކުރިއަށް އޮތް ތަނުގައި ވެސް އެ ކުޅުންތެރިން ޓީމުގައި މަޑުކުރާނެ ކަމަށް އުއްމީދުކުރާ ކަމަށެވެ.

ވެމްކޯއިން ވިދިވިދިގެން އެތައް ފަހަރަކު މުބާރާތްތައް ކާމިޔާބުކުރުމުގެ އަސްލަކީ މުޅި ޓީމު އެކަތިގަނޑެއްގެ ގޮތުގައި ކުރާ ބުރަ މަސައްކަތްކަން ކޯޗު ފާހަގަކުރިއެވެ. މީގެ އިތުރުން، ޓީމުގެ ކެޕްޓަން އައިޝަތު މާޖިދާ އަދި ތަޖުރިބާކާރު ކުޅުންތެރިޔާ ފާތިމަތު ޖޫޒާން ޒަރީރުގެ ފަރާތުން ފެނިގެންދިޔަ ހަރުދަނާ ލީޑަރޝިޕަށް އޭނާ ވަނީ ވަރަށް ބޮޑަށް ތައުރީފުކޮށްފައެވެ.

ފާއިތުވި ފަސް އަހަރަށް ނަޒަރު ހިންގާލާއިރު، ވެމްކޯއަކީ ރާއްޖޭގެ އަންހެން ވޮލީގައި އެންމެ ނުފޫޒުގަދަ ބާރެވެ. އެ ކުލަބުން ވަނީ މިހާތަނަށް ހަ ފަހަރު އެސޯސިއޭޝަން ކަޕް އަދި ހަތަރު ފަހަރު ގައުމީ މުބާރާތް ކާމިޔާބުކޮށްފައެވެ. ގައުމީ ލީގުގެ ތަށި ތިން ފަހަރު އުފުލާލާފައިވާއިރު، ނިމިދިޔަ ސީޒަނުގައި ވެސް އެ ޓީމުން ވަނީ ލީގު ފިޔަވައި އެހެން ހުރިހާ މުބާރާތެއްގެ ޗެމްޕިއަންކަން ހޯދާފައެވެ.