ނައިޖީރިއާގެ މައްޗަށް ކުރިހޯދައި ސްޕެއިނުން ފެށުން ރަނގަޅުކޮށްފި

ޕޯލަންޑުގައި މިހާރު ކުޅެވެމުންދާ 20އަހަރުން ދަށުގެ ފީފާ އަންހެނުންގެ ވޯލްޑް ކަޕްގެ ގްރޫޕް އެފްގައި ނައިޖީރިއާއާ ދެކޮޅަށް ކުޅުނު މެޗު 2-0ގެ ނަތީޖާއަކުން ކާމިޔާބުކޮށް، މުބާރާތުގެ ފެށުން ސްޕެއިނުން އުފާވެރިކޮށްފިއެވެ. 

ސޮސްނޯވިއެކްގައި ކުޅެވުނު މި ފޯރިގަދަ މެޗުގެ ވަރަށް ކުރީކޮޅު ސްޕެއިނުން ވަނީ ލީޑު ނަގާފައެވެ. އެގޮތުން، މެޗުގެ 13ވަނަ މިނެޓުގައި މަރީސާ ގާސިއާ ކާމިޔާބުކޮށްދިން ލަނޑާއެކު އެ ޓީމަށް އިތުބާރު ލިބިގެންދިޔައެވެ. ސްޕެއިނަށް ނަތީޖާ ކަށަވަރުކޮށްދިން ދެވަނަ ލަނޑު މެޗުގެ 73ވަނަ މިނެޓުގައި ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރިތާ އެންމެ ހަތް މިނެޓު ތެރޭގައި އަލްބާ ސެރާޓޯއެވެ. 

ހަމަ މި ގްރޫޕުގައި ދެން ކުޅެވުނު މެޗުގައި ޗައިނާއިން ވަނީ 5-0ގެ ތަފާތު ބޮޑު ނަތީޖާއަކުން ނިއު ކެލެޑޯނިއާ ބަލިކޮށްފައެވެ. ފާހަގަކޮށްލެވޭ ގޮތުގައި ޗައިނާގެ ހުރިހާ ލަނޑެއްވެސް ފެނިގެންދިޔައީ ފަހު ހާފުގައެވެ. ދެވަނަ ހާފު ފެށިގެން ފުރަތަމަ މިނެޓުގައި ޒިއާއޮ ޔަފެއި އެ ޓީމަށް ކުރިހޯދައިދިންއިރު، ހުއާންގ ޖިއާޒިން ވަނީ މެޗުގެ 71، 80އަދި 83ވަނަ މިނެޓުގައި ލަނޑުޖަހައި ހެޓްރިކް ފުރިހަމަކޮށްފައެވެ. ޗައިނާގެ އަނެއް ލަނޑު 74ވަނަ މިނެޓުގައި ކާމިޔާބުކޮށްދިނީ ޒޫ ޒިންޔީއެވެ. 

މުބާރާތުގެ ގްރޫޕް އީ އަށް ބަލާއިރު، ޕޯޗުގަލްގެ މައްޗަށް 2-0އިން އުތުރު ކޮރެއާ ކުރިހޯދިއިރު، ކޮސްޓަރީކާގެ މައްޗަށް ކޮލޮމްބިއާއިން ވަނީ 3-1އިން ކާމިޔާބު ހޯދާފައެވެ. މީގެ އިތުރުން، މި ފަހަރުގެ މުބާރާތުގައި މިހާތަނަށް ފެނުނު އެންމެ ބޮޑު އެއް ސަޕްރައިޒަކީ، ތިން ފަހަރު މުބާރާތް ކާމިޔާބުކޮށްފައިވާ އެމެރިކާގެ މައްޗަށް 2-1އިން އިޓަލީވިލާތް ކުރިހޯދުމެވެ. ފުރަތަމަ ހާފުގައި އެމެރިކާއިން ލީޑު ނަގާފައިވަނިކޮށް، ފަހަތުން އަރައި އިޓަލީން ޖެހި ދެ ލަނޑާއެކު އެ ޓީމުން ވަނީ މުހިންމު މޮޅެއް ކަށަވަރުކޮށްފައެވެ.