ރޭގަނޑުގެ ވަގުތުތަކުގައި ވެސް ކުޅެވޭނެ ފަދަ ޒަމާނީ ވަސީލަތްތަކާ އެކު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން ހއ. ދިއްދޫގައި ތަރައްޤީކުރި އައު އައުޓްޑޯ ވޮލީ ކޯޓުގެ ހުރިހާ މަސައްކަތެއް އެއްކޮށް ނިންމާލައިފިއެވެ.
ސަރުކާރުން އެމްޓީސީސީއާ ހަވާލުކުރައްވައިގެން ކުރިއަށްގެންދިޔަ މި މަޝްރޫޢު ފުރިހަމަކޮށްފައި ވަނީ ގާތްގަނޑަކަށް ހަތް މަސް ދުވަހުގެ ތެރޭގައެވެ. މި ކޯޓު ބިނާކޮށްފައިވަނީ ދިއްދޫގެ ކުޅިވަރު އެރީނާ ތަރައްޤީކުރުމަށް ކަނޑައަޅާފައިވާ ޚާއްޞަ ބިމުގައެވެ. މިއީ އެންމެ ފެންވަރު ރަނގަޅު ލައިޓިންގ ސިސްޓަމްތައް ހަރުކުރެވިފައިވާ، ކުޅިވަރު މުބާރާތްތަކާއި މެޗުތައް ފޯރީގައި ކުރިއަށްގެންދެވޭ ގޮތަށް ފަރުމާކޮށްފައިވާ ކޯޓެކެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ދިއްދޫ ކައުންސިލްގެ ރައީސް އުސްމާން ރަޝީދު ވަނީ، މި ވަސީލަތުގެ ސަބަބުން އެރަށުގެ ކުޅިވަރުގެ ދާއިރާއަށް އިންޤިލާބީ ކުރިއެރުމެއް ލިބިގެންދާނެކަން ފާހަގަކުރައްވާފައެވެ. އޭނާ ވިދާޅުވި ގޮތުގައި މިއީ އެރަށުގެ ވޮލީ ކުޅުންތެރިންގެ ވަރަށް ދުވަސްވީ ހުވަފެނެއް ޙަޤީޤަތަކަށް ވެގެންދިޔުމެވެ. އަދި މިފަދަ ފުރިހަމަ ކޯޓެއްގެ ސަބަބުން މުސްތަޤުބަލުގައި ހުނަރުވެރި މޮޅެތި އެތުލީޓުންތަކެއް ދިއްދޫން އުފެދިގެންދާނެކަމުގެ ޔަޤީންކަން އޮތްކަމަށް ވެސް އުސްމާން ވިދާޅުވިއެވެ.
މި އައުޓްޑޯ ކޯޓު ނިމުމުގެ ކުރިން، ދިއްދޫގެ ޒުވާނުން ވޮލީ ކުޅުމަށް ބޭނުންކުރަމުން އައީ ރަށުގެ ޒުވާނުންގެ މަރުކަޒުގައި ހަދާފައިވާ އިންޑޯ ކޯޓެވެ. ނަމަވެސް، ކުޅިވަރަށް ލޯބިކުރާ ބޮޑު އާބާދީއެއް އޮންނަ އެރަށަށް މި އައު ކޯޓާއެކު އިތުރު ފަސޭހަތަކެއް ލިބިގެންދާނެއެވެ. މީގެ އިތުރުން، އެމްޓީސީސީން މިހާރު ވެސް ތިލަދުންމަތީ އުތުރުބުރީގައި އުމްރާނީ ތަރައްޤީގެ 8މަޝްރޫޢެއް ހިންގަމުން އަންނައިރު، އިތުރު 6 މަޝްރޫޢެއްގެ މަސައްކަތް ސަރުކާރުން ވަނީ ދާދި ފަހުން އެ ކުންފުންޏާ ހަވާލުކޮށްފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.