ދެއްވަދޫގައި ހޭންޑްބޯޅަ ކޯޓެއް އެޅުން އެމްޓީސީސީއަށް

ދެކުނުގެ ގއ. ދެއްވަދޫގެ ޒުވާނުންނަށް ކުޅިވަރުގެ ފުރުސަތުތައް ފަހިކޮށްދީ ދުޅަހެޔޮ މުޖުތަމައުއެއް ބިނާކުރުމުގެ މަގުސަދުގައި، އެ ރަށުގައި ޒަމާނީ ފެންވަރުގެ ހޭންޑްބޯޅަ ކޯޓެއް އެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ މިއަދު ހަވާލުކޮށްފިއެވެ.

މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައި، ދައުލަތުގެ ފަރާތުން މި އެއްބަސްވުމުގައި ސޮއިކުރެއްވީ ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާގެ ނައިބު މުޙައްމަދު ކިނާނެވެ. ކުންފުނީގެ ފަރާތުން ސޮއިކުރެއްވީ އެމްޓީސީސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ޖަމްޝީދެވެ. މިއީ 120ދުވަހުގެ ތެރޭގައި މަސައްކަތް އެއްކޮށް ނިންމާގޮތަށް، 1.81މިލިއަން ރުފިޔާއަށް ހަވާލުކުރެވުނު ޕްރޮޖެކްޓެކެވެ.

މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި، ކޯޓު ސަރަހައްދުގައި ކުރަންޖެހޭ ކޮންކްރީޓާއި ދަގަނޑުގެ މަސައްކަތްތައް ނިންމުމާއި، ކުޅުމަށް ބޭނުންވާ އެންމެހާ ވަސީލަތްތައް ހަރުކުރުން ހިމެނެއެވެ. މީގެ އިތުރުން މުޅި ކޯޓުގައި ޓާފް އެޅުމާއި، ރޭގަނޑުވެސް ކުޅެވޭނެހެން ކަރަންޓު ވަޔަރުކޮށް ދިއްލުން މި އެއްބަސްވުމުގެ ދަށުން ފުރިހަމަކުރާނެއެވެ.

ގާތްގަނޑަކަށް 1400އެއްހާ މީހުންގެ އާބާދީއެއް އޮންނަ ދެއްވަދޫގައި މި ކޯޓު ނިމުމާއެކު، އެ ރަށުގެ ޒުވާނުން ދެކެމުން އައި ހުވަފެންތަކަށް ހަގީގީ ކުލަވަރު އަންނާނެކަމަށް އެމްޓީސީސީން ފާހަގަކުރެއެވެ. އަދި މިއީ ރައްޔިތުންގެ ސިއްހަތާއި އިޖުތިމާޢީ ގުޅުން ބަދަހިކުރުމަށް ވެސް ލިބިގެންދާނެ ބޮޑު ކުރިއެރުމެއްކަމަށް އެ ކުންފުނިން ވަނީ ބުނެފައެވެ. 1980ވަނަ އަހަރު ވުޖޫދަށް އައި އެމްޓީސީސީއަކީ ވޭތުވެދިޔަ 45އަހަރުގެ ތެރޭގައި ރާއްޖޭގެ ތަރައްޤީއާ ގުޅުންހުރި ގިނަގުނަ މަޝްރޫޢުތަކެއް ކާމިޔާބުކަމާ އެކު ނިންމާފައިވާ ކުންފުންޏެކެވެ.