ލުބުނާނާއި ކިރްގިސްޠާނާ ދެކޮޅަށް ޤައުމީ ޓީމު ނުކުންނަނީ

ދިވެހި ފުޓުބޯޅައިގެ ފެންވަރު ރަނގަޅުކޮށް ތަޖުރިބާ ހޯދުމުގެ މަޤުޞަދުގައި، ކުރިއަށް އޮތް ބައިނަލްއަޤްވާމީ ބްރޭކުގެ ތެރެއިން ލުބުނާނާއި ކިރްގިސްޠާނާ ދެކޮޅަށް އެކުވެރިކަމުގެ މެޗުތަކެއް ކުޅުމަށް ދިވެހިރާއްޖޭގެ ސީނިއަރ ޤައުމީ ފުޓުބޯޅަ ޓީމުން ތާވަލުކޮށްފިއެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އިން މަޢުލޫމާތު ދެއްވާފައިވާ ގޮތުގައި، މި ދެ މެޗުގެ ތެރެއިން ފުރަތަމަ މެޗުގައި މި މަހުގެ 28ވަނަ ދުވަހު ރާއްޖެ ނުކުންނާނީ ކިރްގިސްޠާނާ ދެކޮޅަށެވެ. އަދި އޭގެ ފަހުން އަންނަ އޮކްޓޯބަރު މަހުގެ ފުރަތަމަ ދުވަހު ލުބުނާނާ ދެކޮޅަށް ދިވެހި ޓީމު ނުކުންނާނެއެވެ. މި މެޗުތަކަކީ ރާއްޖެއަށްވުރެ ފެންވަރު ރަނގަޅު، ވާދަވެރި ޤައުމުތަކަކާ ދެކޮޅަށް ކުޅެ ކުޅުންތެރިންނަށް މުހިންމު ފިލާވަޅުތަކެއް ލިބިގެންދާނެ ކަމެއްކަމަށް އެ އިދާރާއިން ދެކެއެވެ. އަދި މިއީ ފުޓުބޯޅަ ކުރިއެރުވުމަށް އެފްއޭއެމްއިން ރާވައިގެން ހިންގާ މަސައްކަތްތަކަށް ލިބޭނެ އިތުރު ކުރިއެރުމެކެވެ.

ފީފާގެ ދުނިޔޭގެ ރޭންކިންއަށް ބަލާއިރު، ދިވެހިރާއްޖެއަށްވުރެ މި ދެ ޤައުމުވެސް އުޅެނީ މާ ކުރީގައެވެ. ދުނިޔޭގެ 106ވަނައިގައި އަދި އޭޝިއާގެ 19ވަނައިގައި ކިރްގިސްޠާން އޮތްއިރު، ލުބުނާން އޮތީ ދުނިޔޭގެ 107ވަނަ އަދި އޭޝިއާގެ 20ވަނައިގައެވެ. ރާއްޖެ މިވަގުތު އޮތީ ފީފާ ރޭންކިންގެ 173ވަނައިގައެވެ. އަދި އޭޝިއާ ބައްރުން ރާއްޖެއަށް ލިބެނީ 33ވަނައެވެ.

ހަންގޭރީއަށް ނިސްބަތްވާ ތަޖުރިބާކާރު ކޯޗު އިސްޓަވާން އުރުބާނީގެ އިރުޝާދުގެ ދަށުން ޤައުމީ ޓީމު ތައްޔާރުވަމުން އަންނައިރު، ރާއްޖެއިން އެންމެ ފަހުން ބައިނަލްއަޤްވާމީ މެޗުތަކެއް ކުޅެފައިވަނީ މިދިޔަ ޖޫން މަހުއެވެ. އެއީ ރާއްޖޭގައި ކުރިއަށްދިޔަ ޑައިމަންޑް ޖުބިލީ އިންޓަނޭޝަނަލް މުބާރާތުގައެވެ. އެ މުބާރާތުގައި ބަންގްލަދޭޝްއާ އެއްވަރުކޮށްފައިވާއިރު، ޕާކިސްޠާނާއި އަފްޣާނިސްޠާން އަތުން ވަނީ ބަލިވެފައެވެ. ނަމަވެސް އޭގެ ކުރިން އޭއެފްސީ އޭޝިއަން ކަޕް ކޮލިފިކޭޝަންގައި މާޗު މަހުގެ 31ވަނަ ދުވަހު ޓިމޯ ލެސްޓޭއާ ވާދަކޮށް 1-3ގެ ނަތީޖާއަކުން ދިވެހި ޓީމު ވަނީ މޮޅުވެފައެވެ.