ރެއާލްގެ ކުރީގެ ކުޅުންތެރިޔާ ރޮޑްރިގޭޒް އޮޑިއާ ގުޅެނީ

ކުރިއަށް އޮތް ދިވެހި ޕްރިމިއާ ލީގަށް ޓީމު ވަރުގަދަ ކުރުމުގެ ގޮތުން، ސްޕެއިންގެ ގަދަބާރު ރެއާލް މެޑްރިޑަށް ކުރިން ކުޅުނު ހުނަރުވެރި މިޑްފިލްޑަރު ހޯސޭ ރޮޑްރިގޭޒް، އޮޑި ސްޕޯޓްސް ކްލަބާ ރަސްމީކޮށް ގުޅުމަށް ޓަކައި ރާއްޖެ އަތުވެއްޖެއެވެ.

ޕީއެސްއެމް ނިއުސްއަށް މައުލޫމާތު ދެއްވަމުން އޮޑި ސްޕޯޓްސް ކްލަބްގެ އިސް އޮފިޝަލަކު ހާމަކުރެއްވި ގޮތުގައި، ކުޅުންތެރިޔާގެ އެއްބަސްވުމުގައި ސޮއިކުރުމުގެ ކުރިން ފުރިހަމަކުރަންޖެހޭ އިދާރީ އަދި ސިއްހީ ކަންކަން މިހާރު ދަނީ ކުރިއަށެވެ. މި ސީޒަނުގެ ނިޔަލަށް ހަދާ މި ކޮންޓްރެކްޓުގައި އަންނަ އާދީއްތަ ނުވަތަ ހޯމަ ދުވަހު އޭނާ ސޮއިކުރާނެކަމަށް ބެލެވޭއިރު، އެ ކްލަބްގެ ރަސްމީ ސޯޝަލް މީޑިއާ އެކައުންޓްތަކުން ވެސް ވަނީ ރޮޑްރިގޭޒް ރާއްޖެ އައިސްފައިވާކަން އާންމުންނަށް ކަށަވަރުކޮށްދީފައެވެ. މީގެ ކުރިން ރޮޑްރިގޭޒް ވެސް ވަނީ އޭނާ އޮޑިއާ ގުޅެން އުޅޭކަމުގެ އިޝާރާތެއް އަމިއްލަ އެކައުންޓްތައް މެދުވެރިކޮށް ދީފައެވެ.

ދުނިޔޭގެ އެންމެ ޝަރަފުވެރި ކްލަބް މުބާރާތް ކަމަށްވާ ޔުއެފާ ޗެމްޕިއަންސް ލީގާއި ސްޕެނިޝް ލީގު ކާމިޔާބުކުރި ރެއާލް މެޑްރިޑްގެ ސްކޮޑުގައި ރޮޑްރިގޭޒް ހިމެނުނު ނަމަވެސް، އެ މުބާރާތްތަކުގައި އޭނާއަށް ގިނައިން ފުރުސަތު ލިބުނީ ބަދަލު ކުޅުންތެރިއެއްގެ ގޮތުގައެވެ. އޭނާގެ ފުޓުބޯޅަ ކެރިއަރުގައި އެންމެ ފާހަގަކޮށްލެވޭ އެއް ކަމަކީ، 2012ވަނަ އަހަރު މަޝްހޫރު ކޯޗު ހޯސޭ މޮރީނިއޯގެ އިރުޝާދުގެ ދަށުން އުމުރުން އެންމެ 17އަހަރުގައި ޗެމްޕިއަންސް ލީގުގައި ކުޅުމަށް ފުރުސަތު ލިބުމެވެ. މިއާ އެކު އޭނާ ވެފައި ވަނީ ރެއާލްގެ ތާރީޚުގައި ޗެމްޕިއަންސް ލީގު މެޗެއް ކުޅުނު އެންމެ ހަގު ކުޅުންތެރިޔާއަށެވެ. 

އަންނަ ސެޕްޓެމްބަރު މަހުގެ 10ވަނަ ދުވަހު ފެށުމަށް ހަމަޖެހިފައިވާ ރާއްޖޭގެ އެންމެ ބޮޑު ފުޓުބޯޅަ ލީގަށް ތައްޔާރުވުމުގެ ގޮތުން އޮޑިއިން ދަނީ ޓީމު ވަރަށް ބޮޑަށް ވަރުގަދަ ކުރަމުންނެވެ. އެގޮތުން ބިދޭސީ ދެ ކުޅުންތެރިއަކު މިހާރު ވެސް އެ ކްލަބާއެކު ފަރިތަކުރުންތައް ކުރިއަށްގެންދާއިރު، ކުރިއަށް އޮތް މަދު ދުވަސްކޮޅެއްގެ ތެރޭގައި ބްރެޒިލްއަށް ނިސްބަތްވާ އިތުރު ކުޅުންތެރިއަކު ވެސް ޓީމާ ގުޅޭނެކަމުގެ މައުލޫމާތު ވަނީ ލިބިފައެވެ.