ފަހު ވަގުތު ސިޓީން މޮޅެއް ހޯދައިފި

 އާދީއްތަ ދުވަހު އިއްތިހާދު ސްޓޭޑިއަމްގައި ބޯންމައުތު އަތުން 2-1 އިން މޮޅުވެ، މެންޗެސްޓަރ ސިޓީން 2026/27 ގެ ޕްރިމިއާ ލީގު ސީޒަން ފަހަތުން އަރައި މޮޅަކާ އެކު ފަށައިފިއެވެ.

 ބޯންމައުތުން މެޗުގެ ކުރިހޯދައި ހޯސްޓުން ސިއްސުވާލީ 26 ވަނަ މިނެޓުގައި މާކަސް ޓެވަނިއާ ލަނޑެއް ޖެހުމުންނެވެ. މިއާ އެކު މެޗުގެ ބޮޑު ބައެއްގައި ސިޓީ އޮތީ ފަހަތުގައެވެ. ގިނަ ފުރުސަތުތަކެއް ތަނަވަސްކުރި ނަމަވެސް، ބޯންމައުތުގެ ދިފާއީ ފާރު ފޫއަޅުވާލުމަށް ސިޓީއަށް ވަރަށް ބޮޑަށް އުނދަގޫވިއެވެ.

ސިޓީއަށް މެޗުގެ ނަތީޖާ ހަމަހަމަކުރެވުނީ ފަހު ވަގުތު، 84 ވަނަ މިނެޓުގައެވެ. ބަދަލު ކުޅުންތެރިޔާ ރަޔާން ޗެރްކީ ނަގައިދިން ކޯނަރަކުން، މާކް ގޭހީ ބޮލުން ފޮނުވާލި ހަމަލާއަކުން ސިޓީއަށް ނަތީޖާ ހަމަހަމަކޮށްދީ، މެޗުގެ ފަހު މިނެޓުތައް ފޯރިގަދަކޮށްލިއެވެ. އޭގެ ފަހުން އިތުރު ވަގުތުގެ ތެރޭގައި ސިޓީން މެޗުގެ ނަތީޖާ އެއްކޮށް އަނބުރާލިއެވެ. ޗެރްކީ ތަނަވަސްކޮށްދިން ފުރުސަތަކުން ޔޮސްކޯ ގްވާޑިއޯލް ވަނީ ގާތުން ފޮނުވާލި ހަމަލާއަކުން ސިޓީ މޮޅުކޮށްދިން ލަނޑު ޖަހައިދީފައެވެ. ފުރަތަމަ މި ލަނޑަކީ އޮފްސައިޑް ލަނޑެއް ކަމަށް ނިންމި ނަމަވެސް، ވީއޭއާރްއިން ބެލުމަށް ފަހު އެ ނިންމުން ބަދަލުކޮށް، ސިޓީ މޮޅުވި ލަނޑު ކަމަށް ކަށަވަރުކުރިއެވެ.

 މި މޮޅާއެކު، ސިޓީގެ އާ ކޯޗު އެންޒޯ މަރެސްކާ ވަނީ އެ ކްލަބާއެކު ޕްރިމިއާ ލީގުގައި ކުޅުނު ފުރަތަމަ މެޗުން މޮޅަކާއެކު ފެށުން ރަނގަޅުކޮށްފައެވެ. ޕެޕް ގާޑިއޯލާ ކްލަބް ދޫކޮށް ދިއުމަށްފަހު ކްލަބުން އާ ދައުރެއް ފަށާއިރު، މި މޮޅަކީ ޓީމަށް ލިބުނު ވަރަށް ބޮޑު ހިތްވަރެކެވެ.

ލީގުގެ ދެވަނަ ދުވަހުގައި އަންނަ ހޮނިހިރު ދުވަހު ސިޓީ ކުޅޭނީ ޕެލަސްއާ ދެކޮޅަށެވެ.