އޭއެފްސީ ޖަވާބާ ގުޅިގެން ގަތަރުގެ ކަންބޮޑުވުންތައް އިތުރު

ފީފާގެ ރައީސް ޖިއާނީ އިންފަންޓީނޯއާ ދެކޮޅަށް އޭއެފްސީން ނެރުނު ބަޔާނާ ގުޅިގެން މެންބަރު ގައުމުތަކުގެ މަޝްވަރާ ހޯދާފައިނުވާ މައްސަލައިގައި އޭއެފްސީގެ ރައީސް ޝެއިޚް ސަލްމާން ދެއްވި ޖަވާބުން އަސްލު މައްސަލައަށް ހައްލެއް ނުލިބޭކަމަށް ބުނެ، ގަތަރު ފުޓްބޯޅަ އެސޯސިއޭޝަނުން އަނެއްކާ ވެސް ބޮޑެތި ކަންބޮޑުވުންތަކެއް ފާޅުކޮށްފިއެވެ.

ގަތަރު ފުޓްބޯޅަ އެސޯސިއޭޝަންގެ ރައީސް ހަމަދު ބިން ޚަލީފާ އަލްޘާނީ މިއަދު ފޮނުއްވި އައު ސިޓީއެއްގައި ފާހަގަކުރެއްވި ގޮތުގައި، ޔުއެފާ އަދި ކޮންކާކަފްއާ ގުޅިގެން އޭއެފްސީން ނެރުނު ބަޔާނަކީ އެކްސްކޯ އަދި މެންބަރު ގައުމުތަކަށް އެނގުމަކާ ނުލައި ނެރެފައިވާ ބަޔާނެއްކަން ޝެއިޚް ސަލްމާންގެ ޖަވާބުން ވަރަށް ސާފުކޮށް އެނގެއެވެ. ފީފާގެ ސިޔާސަތުތަކާ ގުޅޭގޮތުން އޭއެފްސީން ދިގު ތަފުސީލުތަކެއް ދިން ނަމަވެސް، މެންބަރުންގެ ރުހުން ނުހޯދައި އިންފަންޓީނޯގެ ގާބިލުކަމާ މެދު ސުވާލުއުފައްދައި ބަޔާންނެރުނު ސަބަބާ ގުޅޭގޮތުން ކުރެވުނު މުހިންމު ސުވާލަށް އެއްވެސް ޖަވާބެއް ދީފައިނުވާކަމަށް އަލްޘާނީ ވިދާޅުވިއެވެ.

މީގެ ކުރިން ޝެއިޚް ސަލްމާން ވަނީ، އޭޝިއާގެ ފުޓްބޯޅައިގެ މަސްލަހަތު ހިމާޔަތްކުރުމުގެ ފުރިހަމަ ބާރު އޭނާއަށް ލިބިގެންވާކަމަށް ވިދާޅުވެ، ގަތަރުން އިދާރީ އުސޫލުތަކަށް މާބޮޑަށް އިސްކަންދޭކަމަށް ތުހުމަތުކުރައްވާފައެވެ. އެހެންނަމަވެސް، ފީފާ ކައުންސިލްގެ މެންބަރުކަން ވެސް ކުރައްވާ އަލްޘާނީ ވަނީ، 47މެންބަރުންގެ ނަމުގައި ބަސްބުނުމުގެ އަމިއްލަ އިހުތިޔާރު އޭއެފްސީގެ ރައީސަށް ލިބިގެން ނުވާކަމަށާއި، ރައީސްގެ ބާރުތައް ކަނޑައަޅަނީ ހިންގާ ކޮމިޓީންކަން ހަނދާންކޮށްދެއްވާފައެވެ.

އަމިއްލަ ނިންމެވުންތަކުގެ ދިފާއުގައި ޝެއިޚް ސަލްމާން ވަނީ، 2022ވަނަ އަހަރުގެ ވޯލްޑް ކަޕް ގަތަރުގައި ބޭއްވުމަށް ދުނިޔޭގެ އެކި ކަންކޮޅުތަކުން ފިއްތުންތައް ކުރިމަތިވި ދަނޑިވަޅުގައިވެސް އޭއެފްސީން އަމިއްލައަށް ބަޔާން ނެރުނުކަން ފާހަގަކުރައްވާފައެވެ. މިއަށް ރައްދުދެއްވަމުން އަލްޘާނީ ވިދާޅުވީ، އެއީ މުޅި އޭޝިއާގެ ފަޚުރަކަށްވާތީ އެކަމުގައި އޭއެފްސީގެ ވެސް ބޮޑު މަސްލަހަތެއް އޮތުމުން ކުރި ކަމެއް ކަމަށާއި، މިހާރު ދިމާވެގެން އުޅޭ މައްސަލައާ އެކަމާ ނުބައްދަލު ކަމަށެވެ. އަދި އޭއެފްސީގެ ފަރާތުން ލިބުނު ޖަވާބަކީ ގަތަރުން އުފެއްދި މުހިންމު ސުވާލުތަކަށް އެކަށީގެންވާ ޖަވާބެއް ނޫންކަމަށް އޭނާ ވިދާޅުވިއެވެ.

މުޅި މި މައްސަލައިގެ ފެށުމަކީ ކޮންފެޑެރޭޝަންތައް އެއްފަރާތްކުރުމަށްފަހު ފީފާގެ 211މެންބަރުންނާ ސީދާ މުއާމަލާތްކުރަން އިންފަންޓީނޯ މަސައްކަތްކުރެއްވުމެވެ. އިންފަންޓީނޯގެ މި ނިންމެވުމަށް ފުރަތަމަ ތާއީދުކުރި އޭޝިއާގެ ހަ ގައުމުގެ ތެރޭގައި ގަތަރު ހިމެނެއެވެ. އާންމުކޮށް ސިއްރުވެރިކޮށް ކަންކަން ނިންމާ އޭއެފްސީގެ އިސްވެރިންގެ މެދުގައި މިފަދަ ހާމަކަންބޮޑު ގޮތެއްގައި ބަހުގެ ހަމަލާތަކެއް ބަދަލުކުރުމަކީ ފުޓްބޯޅައިގެ ދުނިޔޭގައި ވަރަށް މަދުން ނޫނީ ނުފެންނަ ކަމެކެވެ.