ޕީއެސްޖީ ބަލިކޮށް ސުޕަރކަޕްގެ ތަށި ލެންސްއިން އުފުލާލައިފި

ފްރާންސްގެ ފުޓްބޯޅަ ސީޒަން ފެށުމުގެ ގޮތުން ރޭ ލެންސްގެ އަމިއްލަ ދަނޑުގައި ކުޅުނު ފްރެންޗް ސުޕަރ ކަޕް މެޗުގައި، އެއް ކުޅުންތެރިއަކު މަދުކޮށް ކުޅެމުންދިޔަ ނަމަވެސް، ޕީއެސްޖީގެ މައްޗަށް 1-0ގެ ނަތީޖާއަކުން ކުރިހޯދައި އެ މުބާރާތުގެ ޗެމްޕިއަންކަން ލެންސްއިން ހޯދައިފިއެވެ.

ވޭތުވެދިޔަ ހަތަރު އަހަރުވެސް މި މުބާރާތުގެ ތަށި ދިފާޢުކުރި ފްރެންޗް ލީގުގެ ޗެމްޕިއަން ޕީއެސްޖީ ސިއްސާލުމަށް ފަހު، ފްރެންޗް ކަޕްގެ ޗެމްޕިއަން ލެންސްއަށް މެޗުގެ ހަމައެކަނި ލަނޑު ކާމިޔާބުކޮށްދިނީ ފުރަތަމަ ހާފުގެ 32ވަނަ މިނެޓުގައި ފްލޮރިއަން ތައުވިންއެވެ. މި ލަނޑު އޭނާ ކާމިޔާބުކުރީ މަތިއު އުޑޯލް ފޮނުވާލި ހަމަލާއެއްގެ އެހީތެރިކަމާއެކުގައެވެ.

މެޗުގެ ބޮޑުބައި ލެންސްއިން ފުރިހަމަކުރީ ދިހަ ކުޅުންތެރިންނާއެކުގައެވެ. އެއީ މެޗުގެ 39ވަނަ މިނެޓުގައި ޕީއެސްޖީގެ މަގްނެސް އަކްލިއޫޝްއަށް ކުރި ނުރައްކާތެރި ފައުލަކާ ގުޅިގެން ލެންސްގެ ކިލިއަން އެންޓޯނިއޯއަށް ސީދާ ރަތް ކާޑެއް ދައްކައި ދަނޑުން ފޮނުވާލުމާ ގުޅިގެންނެވެ. ނަމަވެސް މެޗު ނިމެން ކައިރިވެފައި ވަނިކޮށް ޕީއެސްޖީގެ ނޫނޯ މެންޑޭޒްއަށް ވެސް ވަނީ ރަތް ކާޑު ދައްކާފައެވެ. 87ވަނަ މިނެޓުގައި އޭނާއަށް ރަތް ކާޑު ދެއްކީ ލެންސްގެ މިކަލް ސްކޯރަސްގެ މޫނުމަތީގައި އުޅަނބޮށިން ޖެހި މައްސަލައިގައެވެ.

ޔުއެފާ ސުޕަރ ކަޕްގައި ދާދި ފަހުން އެސްޓަން ވިލާ ބަލިކޮށް ތަށި ހޯދި ޕީއެސްޖީން ނަތީޖާ ހަމަހަމަކުރުމަށް ގިނަ މަސައްކަތްތަކެއް ކުރިއެވެ. މިގޮތުން 75ވަނަ މިނެޓުގައި ފަބިއަން ރުއިޒް ގޯލެއް ކާމިޔާބުކުރި ނަމަވެސް، ރެފުރީ ވަނީ އެއީ އޮފްސައިޑް ލަނޑެއް ކަމަށް ކަނޑައަޅައި އެ ލަނޑު ބަލައިނުގަންނަން ނިންމާފައެވެ.