ރެއާލް ސޮސިއެޑާޑްއާ ދެކޮޅަށް ކުޅުނު އެކުވެރިކަމުގެ މެޗުގައި އާޖެންޓީނާގެ މިޑްފީލްޑަރު އެންޒޯ ފެނާންޑޭޒް ކުޅެން އެރުމާ އެކު، އޭނާ ކުލަބު ދޫކޮށްލަން ބޭނުންވާކަން ހާމަކުރުމާ ގުޅިގެން ޗެލްސީގެ ސަޕޯޓަރުން އޭނާއަށް ވަރަށް ބޮޑަށް ފާޑުކިޔައި ނުރުހުން ފާޅުކޮށްފިއެވެ.
ފަހު ހާފުގައި އޭނާ ބަދަލު ކުޅުންތެރިއެއްގެ ގޮތުގައި ދަނޑަށް ނުކުތް ވަގުތުން ފެށިގެން، ބޯޅައިގައި ފައިޖެހޭ ކޮންމެ ފަހަރަކު ސަޕޯޓަރުން ދިޔައީ އަޑުގަދަކޮށް މަލާމާތްކުރަމުންނެވެ. މިކަމުގެ މައިގަނޑު ސަބަބަކީ، ޗެލްސީއާ އެންމެ ބޮޑަށް ވާދަކުރާ މެންޗެސްޓަރ ސިޓީއަށް ބަދަލުވުމަށް އެންޒޯ މަސައްކަތްކުރަމުންދާ ކަމަށް ފެތުރިފައިވާ ހަބަރުތަކެވެ.
ރިޕޯޓުތައް ބުނާގޮތުގައި ސިޓީއަށް ބަދަލުވުމަށް އޭނާ މިހާރުވަނީ އެ ކުލަބާއެކު ވާހަކަތައް ފަށާފައެވެ. ސިޓީގެ ކޯޗެއްގެ ގޮތުގައި މިހާރު ހުރީ ކުރިން ޗެލްސީގައި އެންޒޯއަށް އިރުޝާދުދިން އިޓަލީގެ ކޯޗު އެންޒޯ މަރެސްކާއެވެ. ކުޅުންތެރިޔާ ވިއްކާލުމަށް ޗެލްސީން 120މިލިއަން ޕައުންޑުގެ އަގެއް ކިޔާފައިވާއިރު، މި ފައިސާ ދެއްކުމަށް ދިން ސުންގަޑި ހުކުރު ދުވަހުގެ ނިޔަލަށް ހަމަވިއިރު ވެސް ސިޓީން އެއްވެސް ޖަވާބެއް ދީފައެއް ނުވެއެވެ. އިނގިރޭސި މީޑިއާތަކުން ލަފާކުރާ ގޮތުގައި މިއީ ޓްރާންސްފާ ބާޒާރު ބަންދުވުމުގެ ކުރިން އެންމެ ފަހު ވަގުތު އަގުހެޔޮކޮށް އޭނާ ގެންދިއުމަށް ސިޓީން ރާވާފައިވާ ރޭވުމެކެވެ.
ސަޕޯޓަރުންގެ ރުޅިވެރިކަން އިންތިހާއަށް ގޮސްފައިވާ މި މައްސަލައިގެ ތެރެއިން ފާހަގަކޮށްލަންޖެހޭ ކަމަކީ، އެންޒޯ އެންމެ ފުރަތަމަ ޗެލްސީއާ ގުޅުނީ 2022ވަނަ އަހަރުގެ ވޯލްޑް ކަޕްގައި އޭނާ ދެއްކި ތަފާތު މޮޅު ކުޅުމުގެ ސަބަބުން ކަމެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.