ކައިވެނީގެ މައުލޫމާތު ރޮނާލްޑޯ އާއިލާއަށް އެންގީ އެންމެ ފަހު ވަގުތު

ދުނިޔޭގެ މަޝްހޫރު ފުޓުބޯޅަ ތަރި ކްރިސްޓިއާނޯ ރޮނާލްޑޯ އާއި އޭނާގެ ލޯބިވެރިޔާ ޖިއޮޖީނާ ރޮޑްރިގޭޒް ޕޯޗުގަލްގައި ހުންނަ އެމީހުންގެ ގަނޑުވަރުގައި ސިއްރިޔާތުގައި ކުރި ކައިވެނީގެ މައުލޫމާތު، ރަސްމިއްޔާތު ފެށެން އެންމެ ތިރީސް ސިކުންތަށް ވެފައި ވަނިކޮށް އާއިލާއަށް އެންގުމާ ގުޅިގެން ގިނަ ބައެއްގެ ސަމާލުކަން އެކަމަށް ހުއްޓިއްޖެއެވެ. 

މި މަހުގެ އެގާރަ ވަނަ ދުވަހު "ކުއިންޓާ ޑާ މަރީނާ"ގައި ހުންނަ ރޮނާލްޑޯގެ ގެކޮޅުގައި ބޭއްވި މި ހަފުލާގައި ބައިވެރިވެފައިވަނީ ދެމަފިރިންގެ ދަރިންނާއި އިތުރު ހަތަރު ހެކިންކަން، މީޑިއާތަކަށް ތިލަވެފައިވާ ކައިވެނީގެ ސެޓްފިކެޓުން ވަނީ ހާމަވެފައެވެ. އެންމެ ގާތް މީހުންނަށް ވެސް ނޭނގި މި ރަސްމިއްޔާތު ބާއްވާފައި ވަނީ ވަރަށް އާދައިގެ ގޮތަކަށެވެ.

ޕޯޗުގަލްގެ ޓީވީ ޕްރެޒެންޓަރެއް ކަމަށްވާ ކްރިސްޓީނާ ފެރޭރާ ބުނެފައިވާ ގޮތުގައި، މިހާ ބޮޑު ސިއްރެއްގެ ގޮތުގައި މިކަން ކުރިއަށް ގެންދިއުމާއި އާއިލާގެ އެއްވެސް މެމްބަރަކަށް ދައުވަތު ދީފައި ނުވުމަކީ މައްސަލަތަކެއް އުފެދިދާނެ ކަމެކެވެ. އޭނާ އިތުރަށް ފާހަގަކުރި ގޮތުގައި ރޮނާލްޑޯގެ ގާތްތިމާގެ މީހުންނަށް މި އުފާވެރި ޚަބަރު ދީފައިވަނީ ހަފުލާ ފެށުމުގެ ހަމަ ކުޑަ ހިނދުކޮޅެއް ކުރިންނެވެ. މި ޕްރޮގްރާމްގައި ވާހަކަދެއްކި އެހެން ފަރާތަކުން ވަނީ، މިކަމުގެ ސަބަބުން އާއިލާއަށް ހިތްދަތިކަމެއް ނުލިބޭނެކަމަށް އުއްމީދުކުރާ ކަމަށް ބުނެފައެވެ.

މި ކައިވެނީގައި ރޮނާލްޑޯގެ މަންމަ ޑޮލޯރެސް އަވޭރޯ ބައިވެރިވެފައި ނުވާއިރު، އެ ދުވަސްވަރު އޭނާގެ އަންހެން ކޮއްކޮ އުޅުނީ އާއިލާއާ އެކު މެޑޭރާގައި ކަމަށް ރިޕޯޓުތައް ބުނެއެވެ. ޖިއޮޖީނާއާއި ރޮނާލްޑޯގެ މަންމައާ ދެމެދު ނުތަނަވަސްކަމެއް އުޅޭކަމަށް އަޑުފެތުރިފައިވީ ނަމަވެސް، ޑޮލޯރެސް ވަނީ ސޯޝަލް މީޑިއާގައި ހިތެއްގެ ނިޝާނެއް ހިއްސާކޮށް މި ދެމަފިރިންނަށް ހެޔޮއެދޭކަން ދައްކުވައިދީފައެވެ. އިންސްޓަގްރާމް މެދުވެރިކޮށް ދެމަފިރިން ވަނީ ކައިވެނިކުރިކަން ރަސްމީކޮށް އާންމުންނަށް އިއުލާނުކޮށްފައެވެ.

އާއިލާގެ ބައިވެރިވުމެއް ނެތި، ކުއްލި ގޮތަކަށް މި ހަފުލާ ބޭއްވި ސަބަބާ މެދު ސަޕޯޓަރުންނާއި މީޑިއާތަކުން ދަނީ ތަފާތު ގޮތްގޮތަށް ވާހަކަދައްކައި، ގިނަ ސުވާލުތަކެއް އުފައްދަމުންނެވެ.