ހއ. އަތޮޅު ޗެމްޕިއަންކަން އިހަވަންދޫން ކާމިޔާބުކޮށްފި

އެފްއޭއެމް ފުޓްސަލް އެޓޯލް ޗެމްޕިއަންޝިޕް 2026ގެ ހއ. އަތޮޅުގެ ފައިނަލް މެޗުގައި ފިއްލަދޫއާ ވާދަކޮށް 5-0ގެ ތަފާތުބޮޑު ނަތީޖާއަކުން މޮޅުވެ، މުބާރާތުގެ އަތޮޅު ޗެމްޕިއަންކަން އިހަވަންދޫއިން ހޯދައިފިއެވެ.

މިއީ މި މުބާރާތުގެ ތާރީޚުގައި އަތޮޅު ޝީލްޑެއް ހަވާލުކުރެވުނު ފުރަތަމަ ފަހަރު ކަމަށްވާއިރު، މި ތާރީޚީ ޝަރަފު ލިބިގެންދިޔައީ ޖޭ ސްޕޯޓްސް އެކެޑެމީގެ ނަމުގައި ނުކުތް އިހަވަންދޫ ޓީމަށެވެ. މި އަހަރުގެ މުބާރާތުގައި ހއ. އަތޮޅުން ބައިވެރިވެފައިވަނީ ހަމައެކަނި އިހަވަންދޫއާއި ފިއްލަދޫ ކަމަށްވާތީ، ޗެމްޕިއަންކަން ކަށަވަރުވެގެންދިޔައީ އިހަވަންދޫގައި ކުޅެވުނު ފޯރިގަދަ ފައިނަލް މެޗުންނެވެ. 

މުޅި މެޗުގައި ވެސް އިހަވަންދޫ ޓީމުގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، އެޓީމަށް ކުޅެމުންދާ ބިދޭސީ ކުޅުންތެރިޔާ، މިސްރުގެ އަޙްމަދު އަލްސަޢީދު ޢަލީ ޙަމީދުގެ ނުފޫޒު މެޗުގައި ވަރަށް ބޮޑަށް ފެނިގެންދިޔައެވެ. އޭނާ ވަނީ މޮޅު ކުޅުމަކާ އެކު ހެޓްރިކް ހަދައި، ޓީމުގެ މޮޅުގައި އިސް ދައުރެއް އަދާކޮށްފައެވެ. މެޗުގެ ފުރަތަމަ ލަނޑު ނުވަވަނަ މިނެޓުގައި މުޙައްމަދު ސާނިއު ކާމިޔާބުކޮށްދިންއިރު، ފުރަތަމަ ހާފު ނިމުމުގެ ކުރިން އަލްސަޢީދު ވަނީ ލީޑު ފުޅާކޮށްދީފައެވެ. އެހެންކަމުން ފުރަތަމަ ހާފު ނިމުނީ 2-0އިން އިހަވަންދޫ ކުރީގައި އޮވެގެންނެވެ.

ދެވަނަ ހާފުގައި އިހަވަންދޫގެ އެޓޭކުތައް އިތުރަށް ވަރުގަދަކުރިއެވެ. ނަތީޖާއެއްގެ ގޮތުން އަލްސަޢީދު ވަނީ ބާރު ހަމަލާއަކުން އެޓީމުގެ ތިންވަނަ ލަނޑު ޖަހައި މެޗުގެ ކޮންޓްރޯލް ހޯދާފައެވެ. އޭގެ ފަހުން ސާނިއު އޭނާގެ ދެވަނަ ލަނޑު ޖަހައި ނަތީޖާ 4-0އަށް ބަދަލުކުރިއެވެ. މެޗުގެ 34ވަނަ މިނެޓުގައި އަލްސަޢީދު ވަނީ އޭނާގެ ތިންވަނަ ލަނޑު ކާމިޔާބުކޮށް ހެޓްރިކް ފުރިހަމަކޮށްފައެވެ.

ފައިނަލުން ބަލިވި ނަމަވެސް، މުބާރާތުގެ އުސޫލު އޮންނަ ގޮތުން ފިއްލަދޫއަށް ވެސް ޒޯން ބުރުން ޖާގަ ލިބޭނެއެވެ. ނޯތު ޒޯން 1ގައި ހއ. އަތޮޅުގެ ފަރާތުން މި ދެ ޓީމު ވާދަކުރާނީ ހދ. އަތޮޅާއި ށ. އަތޮޅުން ފައިނަލަށް ދަތުރުކުރާ ޓީމުތަކާއެވެ.