ވޯލްޑް ކަޕަށް ފަހު ފުރަތަމަ ފަހަރަށް މިއަދު އެތުލެޓިކޯ މެޑްރިޑްގެ ފަރިތަކުރުންތަކަށް ނުކުމެ، ސްޕެއިންގެ ގަދަބާރު ބާސެލޯނާއަށް ބަދަލުވުމުގެ ހުއްދަ ހޯދުމަށް ޓަކައި ކޯޗު ޑިއެގޯ ސިމިއޯނޭ އާއި ކްލަބުގެ މެނޭޖްމަންޓަށް ޕްރެޝަރުކުރުމުގެ މަސައްކަތް ފޯވާޑް ހޫލިއަން އަލްވަރޭޒް ފަށައިފިއެވެ.
ފަރިތަކުރުންތަކުގައި ބައިވެރިވުމުގެ މައިގަނޑު މަގުސަދަކީ ކްލަބާ އެކު ކުރިއަށް އޮތް ސީޒަނުގައި މެޗުތައް ކުޅުމުގެ ބަދަލުގައި، ބާސެލޯނާއިން ހުށަހަޅާފައިވާ 100މިލިއަން ޔޫރޯގެ ބިޑު ގަބޫލުކުރުމަށް އެތުލެޓިކޯއަށް ބާރުއެޅުމެވެ. އަލްވަރޭޒް ބޭނުންވާ ފަދަ ރަނގަޅު ހުށަހެޅުމެއް ލިބިއްޖެ ނަމަ ކްލަބް ދޫކޮށް ދިއުމުގެ ފުރުސަތު އޭނާގެ އެއްބަސްވުމުގެ ދަށުން ލިބިދޭއިރު، އެކަމަށް އެދި ކްލަބަށް ރަސްމީކޮށް ހުށަހަޅަންޖެހެނީ ސީދާ ކުޅުންތެރިޔާ އަމިއްލައަށެވެ. މިއަދު ޓްރޭނިންގއަށް ނުކުމެ އޭނާ ބޭނުންވަނީ އެ ހައްގުގެ ބޭނުން ހިފާށެވެ.
އެތުލެޓިކޯއިން މީގެ ކުރިން ބުނަމުން އައީ އަލްވަރޭޒަކީ ވިއްކާލާނެ ކުޅުންތެރިއެއް ނޫން ކަމަށެވެ. ނުރުހުމުގައި ހުރި ކުޅުންތެރިއަކު މަޑުކުރުވަން ބޭނުންނުވި ނަމަވެސް، ވާދަވެރި ކްލަބަކަށް އޭނާ ދޫކޮށްލަން އެތުލެޓިކޯއިން ދެކޮޅުހަދައެވެ. އަދި ގަވާއިދާ ހިލާފަށް ބާސެލޯނާއިން ކުޅުންތެރިޔާއާ މުއާމަލާތްކޮށްފައިވާ ކަމަށް ބުނެ، އެ ކްލަބުން ވަނީ ފީފާއަށް މައްސަލައެއް ވެސް ހުށަހަޅާފައެވެ.
އަލްވަރޭޒްގެ ޝައުގުވެރިކަން ހުރީ ހަމައެކަނި ބާސެލޯނާއަށް ކަމަށްވާއިރު، އެހެން ޓީމަކަށް އޭނާ ވިއްކާލުމުގެ ބާރު އެތުލެޓިކޯއަށް ލިބިގެނެއް ނުވެއެވެ. މި ސަބަބުތަކާ ހުރެ، ކުރިއަށް އޮތް ތިން ހަފުތާވެގެންދާނީ މި ޓްރާންސްފާގެ ފޯރި އެންމެ ގަދަވެގެންދާނެ ދުވަސްތަކަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.