"ފީފާގެ އާ ޕްލޭން ކޮންމެހެން ބާތިލްކުރަން ޖެހޭ"

ފީފާގެ މުބާރާތްތަކުން ވިޔަފާރީގެ މަންފާ ހޯދުމަށް އަމިއްލަ ފަރާތްތަކަށް ހިއްސާ ވިއްކާލަން ހުއްޓާލުމަކީ މުއައްސަސާގެ މިނިވަންކަމާއި ނަޒާހަތްތެރިކަން ދެމެހެއްޓުމަށް ޓަކައި ކޮންމެހެން އަޅަންޖެހޭ ފިޔަވަޅެއް ކަމަށް ފީފާގެ ޗީފް އޮފް ގްލޯބަލް ފުޓްބޯލް ޑިވެލޮޕްމަންޓް އާސެން ވެންގާ ދާދިފަހުން ވިދާޅުވެއްޖެއެވެ.

ފީފާގެ ރައީސް ޖިއާނީ އިންފަންޓީނޯ އިސްވެ ހުންނަވައިގެން ވޯލްޑް ކަޕް ފަދަ ބޮޑެތި މުބާރާތްތައް ހިންގުމަށް ވަކި ކުންފުންޏެއް އުފައްދައި، ބޭރުގެ އިންވެސްޓަރުންނަށް އެތަނުގެ ހިއްސާ ވިއްކާލުމަށް އޮތީ ތައްޔާރުވެފައެވެ. މި ބަދަލާ އެކު، ފީފާގެ 211މެންބަރު ގައުމަށް، ކޮންމެ ގައުމަކަށް 40މިލިއަން ޑޮލަރުގެ މާލީ އެހީތެރިކަމެއް ދިނުމަށް އިންފަންޓީނޯ އޮތީ ވައުދުވެވަޑައިގެންފައެވެ. ނަމަވެސް، ޔޫރަޕުގެ ފުޓްބޯޅައިގެ މައި އިދާރާ (ޔުއެފާ)ގެ 55ގައުމުން ފީފާގެ ހުރިހާ ހަރަކާތަކުން ވަކިވާނެކަމުގެ ބިރު ދެއްކުމާއެކު، މި މަޝްރޫއު ވަނީ އަނބުރާ ގެންދަން މަޖުބޫރުވެފައެވެ.

މިކަމާ ގުޅިގެން ނެރުއްވި ބަޔާނެއްގައި، 2019ވަނަ އަހަރުން ފެށިގެން ފީފާގައި އިސް ދައުރެއް އަދާކުރައްވަމުން އަންނަ ވެންގާ ވިދާޅުވީ، އިންވެސްޓްމަންޓް ޕްލޭނާ ގުޅޭ އެއްވެސް މައުލޫމާތެއް އޭނާއަށް ކުރިން ލިބިވަޑައިގެންފައި ނުވާ ކަމަށާއި، އެކަން އެނގިވަޑައިގަތީ މީޑިއާގެ ޒަރީއާއިން ކަމަށެވެ. އަދި ފީފާއަކީ ދެފުށް ފެންނަ، އިތުބާރު ހުރި ގޮތަކަށް ހިންގާ މިނިވަން ތަނަކަށް ވާންޖެހޭނެތީ، އެ ޕްލޭން ކެންސަލް ކުރުމާ މެދު އެއްވެސް ސުވާލެއް އުފެދެން ނެތްކަން އާސެނަލްގެ ކުރީގެ ކޯޗު ފާހަގަކުރެއްވިއެވެ. ފާހަގަކޮށްލެވޭ ގޮތުގައި، ޔުއެފާއިން ފީފާއަށް ފޮނުވި ގާނޫނީ އިންޒާރުގެ ސިޓީގައި ނަން ހިމެނުނު 18އޮފިޝަލުންގެ ތެރޭގައި ވެންގާ ވެސް ހިމެނެއެވެ.

މި މައްސަލަގަނޑުގެ ތެރޭގައި ފީފާގެ އިސް މަގާމަކުން އިސްތިއުފާ ދެއްވި ހަމައެކަނި ބޭފުޅަކީ އިންފަންޓީނޯގެ ސީނިއާ އެޑްވައިޒަރު ކާލޯސް ކޯޑެއިރޯއެވެ. އޭނާ މަގާމުން ވަކިވެވަޑައިގަންނަވަމުން ވިދާޅުވީ، މިއީ ފުޓްބޯޅައިގެ މުސްތަގުބަލު ރަހުނުކޮށް، މުޅި ކުޅިވަރަށް ދެވޭ ވަރަށް ބޮޑު ގެއްލުމެއް ކަމަށެވެ.

މީގެ އިތުރުން، އިންފަންޓީނޯގެ އެންމެ އަރިސް އެއް ބޭފުޅާ ކަމަށްވާ، އަދި މިހާރު ފީފާގެ ސެކްރެޓަރީ ޖެނެރަލްގެ މަގާމުގައި ހުންނެވި މެޓިއަސް ގްރާފްސްޓްރޯމް ވެސް ވަނީ މުވައްޒަފުންނަށް ފޮނުއްވި މެސެޖެއްގައި މި ކަމަށް ފާޑުވިދާޅުވެފައެވެ. ފާއިތުވި ހަފުތާއަކީ ބަލައިގަންނަން ދަތި އުނދަގޫ ދުވަސްތަކެއްކަން ފާހަގަކުރައްވައި، އޭނާ ވިދާޅުވީ، ހިތާމަވެރި ކަންތައްތަކެއް ހިނގި ނަމަވެސް އެ މަޝްރޫއު މިހާރު އެއްކޮށް ހުއްޓާލާފައިވާ ކަމަށެވެ. އަދި ސިޔާސީ ހަމަނުޖެހުންތަކުން މުވައްޒަފުން ސަލާމަތްކޮށްދޭނެކަމުގެ ޔަގީންކަން ދެއްވަމުން، ގްރާފްސްޓްރޯމް ވަނީ ފީފާގެ އަސްލު މަގުސަދު ކަމަށްވާ ފުޓްބޯޅަ ކުރިއެރުވުމާއި މެންބަރު ގައުމުތަކަށް ހިދުމަތްކުރުމުގައި ސާބިތުވެ ތިބުމަށް އެދިވަޑައިގެންފައެވެ.