2038ވަނަ އަހަރުގެ ފީފާ ވޯލްޑް ކަޕް އަލުން އެމެރިކާގައި ބޭއްވޭނެ ގޮތަށް ކަންކަން އިންތިޒާމު ކުރުމަށް ދުނިޔޭގެ ފުޓްބޯޅައިގެ މައި އިދާރާ (ފީފާ)އިން މަސައްކަތް ކުރަމުންދާ ކަމުގެ ބޮޑެތި ތުހުމަތުތަކެއް ވަނީ ފެންމަތިވެފައެވެ.
މި ތުހުމަތުތައް އަމާޒުވީ އާދިއްތަ ދުވަހުގެ ރޭ ނިމުނު ވޯލްޑް ކަޕް ފައިނަލް މެޗުގެ ޕްރޮމޯޝަނެއްގައި އެމެރިކާގެ ރައީސް ޑޮނަލްޑް ޓްރަމްޕް ފޮކްސް ނިއުސްއަށް ދެއްވި އިންޓަވިއުއަކާ ގުޅިގެންނެވެ. އެ އިންޓަވިއުގައި ޓްރަމްޕް ވިދާޅުވީ އޭނާގެ ރައީސްކަމުގެ ދައުރު ހަމަވުމުގެ ކުރިން އެމެރިކާގައި އަލުން ވޯލްޑް ކަޕެއް ބޭއްވުމުގެ ފުރުސަތު ހޯދަން ޖެހޭ ކަމަށެވެ.
ޓްރަމްޕްގެ ވާހަކަފުޅުގައި ފީފާގެ ރައީސް ޖިއާނީ އިންފަންޓީނޯއަށް ސީދާ އިޝާރާތް ކުރައްވައި ވިދާޅުވީ، "އަހަރެމެން އަލުން މިކަން ކުރަންޖެހޭ. އަދި އަހަރެން މަގާމުގައި ހުއްޓައި މިކަން ކުރަން ޖެހޭނެ. ޖިއާނީއަށް މި ވާހަކަ އިވޭތަ؟"ކަމަށެވެ.
ޓްރަމްޕްގެ ދެވަނަ ދައުރު ޖެނުއަރީ 2029ގައި ހަމަވާއިރު، އެމެރިކާގެ ގާނޫނުއަސާސީން ތިންވަނަ ދައުރަކަށް ފުރުސަތެއް ނުދެއެވެ. ނަމަވެސް، އިންފަންޓީނޯއާ އޮންނަ ގާތް ގުޅުމުގެ ސަބަބުން، ޓްރަމްޕްގެ ދައުރު ނިމުމުގެ ކުރިން 2038ގެ ބިޑް މަރުހަލާ ފީފާއިން އަވަސްކޮށްދީފާނެ ކަމަށް ބެލެވެއެވެ.
އެމެރިކާ، މެކްސިކޯ އަދި ކެނެޑާ ގުޅިގެން ބޭއްވި ވޯލްޑް ކަޕުން ފީފާއަށް ވަނީ ފަސް ބިލިއަން ޑޮލަރުގެ ރެކޯޑް އާމްދަނީއެއް ލިބޭނެ ކަމަށް އަންދާޒާ ކުރެވިފައެވެ. މެޗުތަކުގެ ޓިކެޓާއި ބްރޮޑްކާސްޓިން ރައިޓްސް ވެސް ބޮޑު އަގުގައި ވިއްކިއިރު، އެމެރިކާގެ އިނގިރޭސި ކޮމިޔުނިޓީގެ ރައިޓްސް އެއްވެސް ބިޑަކާ ނުލައި ދިނީ ޓްރަމްޕްގެ ރިޕަބްލިކަން ޕާޓީއަށް ތާއީދުކުރާ ފޮކްސް ސްޕޯޓްސްއަށެވެ. އެމެރިކާގެ މާކެޓުން ލިބުނު ބޮޑު ތަރުހީބާ އެކު، ފީފާގެ ހޮސްޕިޓަލިޓީ ޕާޓްނަރެއްގެ އިސް ވެރިޔަކު ވެސް ވިދާޅުވީ ފީފާއިން ބޭނުންވަނީ ވީ އެންމެ އަވަހަކަށް އެނބުރި އެމެރިކާ އަށް އަންނަން ކަމަށެވެ.
އާންމުކޮށް 12އަހަރު ތެރޭ އެއް ގައުމަކަށް ދެ ފަހަރު މުބާރާތް ނުދިން ނަމަވެސް، ފީފާގެ އާ ގަވާއިދުތަކުގެ ދަށުން މިހާރު އެކަން ކުރެވިދާނެއެވެ. އަދި 2030ގެ ވޯލްޑް ކަޕް ތިން ބައްރެއްގައި ބާއްވަން ނިންމުމުން، އަށް އަހަރު ފަހުން 2038ގައި އަނެއްކާ ވެސް އުތުރު އެމެރިކާ އަށް ފުރުސަތު ލިބޭނެއެވެ. ވޯލްޑް ކަޕަށް 100އަހަރު ފުރުން ފާހަގަކުރަން 2030ގެ މުބާރާތް ސްޕެއިން، ޕޯޗުގަލް އަދި މޮރޮކޯގެ އިތުރުން ދެކުނު އެމެރިކާގެ އުރުގުއޭ، އާޖެންޓީނާ އަދި ޕެރަގުއޭގައި ބާއްވަން ވަނީ ނިންމައިފައެވެ.
މީގެ ކުރިން 2034ގެ މުބާރާތް ސައުދީ އަރަބިއާ އަށް ދިނުމަށްޓަކައި ވެސް ފީފާއިން ވަނީ 2024ވަނަ އަހަރުގެ އޮކްޓޯބަރު މަހު ކުއްލިއަކަށް ބިޑް ހުޅުވާލައި، 25ދުވަސް ތެރޭ އެ ގައުމަށް މުބާރާތް ދޭން ނިންމައިފައެވެ. އަންނަ އަހަރުގެ އިންތިހާބުގައި އިންފަންޓީނޯ އަނެއްކާވެސް ހޮވޭނެ ކަމަށް ބެލެވޭއިރު، އޭނާގެ ގާތް އެކުވެރިޔާ ޓްރަމްޕްގެ ހުވަފެންތައް ހަގީގަތަކަށް ހަދައިދިނުމަށް ފީފާއިން ބިޑް މަރުހަލާ އަވަސްކޮށްދިނުމަކީ އެކަށީގެންވާ ކަމެކެވެ.
އުތުރު އެމެރިކާ ބައްރުން އެމެރިކާއާ ވާދަކުރެވޭނެ ހަމައެކަނި ގައުމަކީ ތިން ފަހަރު މުބާރާތް ބޭއްވި މެކްސިކޯއެވެ. ނަމަވެސް، މެކްސިކޯއިން 2031ގެ އަންހެނުންގެ ވޯލްޑް ކަޕަށް ބިޑް ކުރާތީ، ފިރިހެން މުބާރާތަށް ކުރިމައްޗެއް ނުލާނެއެވެ. އެހެންކަމުން އެމެރިކާ އަށް އެކަނި ބިޑް ކުރުމުގެ ފުރުސަތު ފަހިވެގެންދާނެއެވެ. ޓްރަމްޕް ވިދާޅުވީ އެމެރިކާއިން ލިބުނު ބޮޑު އާމްދަނީގެ އަދަދުތަކަށް ބަލައި، ވަގުތުން އަލުން މުބާރާތް ބޭއްވުމަށް އެދޭނެ ކަމަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.