ސްޕެއިން ހުއްޓުވުމަކީ އާޖެންޓީނާއަށް އޮތް ބޮޑު ގޮންޖެހުމެއް: ލޮޕެޓެގީ

ވޯލްޑް ކަޕްގެ ފައިނަލްގައި އާޖެންޓީނާއިން ސްޕެއިނާ ދެކޮޅަށް ނުކުންނައިރު، ސްޕެއިންގެ ޓެކްނިކަލް އަދި ޕާސިންގ ގޭމް ހުއްޓުވުމަށް ޕްރެސްކުރުމަކީ ދަނޑުމަތީގައި ނުހަނު އުނދަގޫވާނެ ކަމެއްކަމަށް، ސްޕެއިންގެ ގައުމީ ޓީމުގެ ކުރީގެ ކޯޗު ހުލެން ލޮޕެޓެގީ އިންޒާރުދީފިއެވެ. 

މީގެ ކުރިން 2018ވަނަ އަހަރު މެޑްރިޑްގައި ކުޅުނު އެކުވެރިކަމުގެ މެޗެއްގައި ލޮޕެޓެގީގެ އިރުޝާދުގެ ދަށުން ސްޕެއިނުން ވަނީ 6-1ގެ ތަފާތު ބޮޑު ނަތީޖާއަކުން އާޖެންޓީނާ ބަލިކޮށްފައެވެ. ނަމަވެސް، ލިއޮނެލް މެސީ ނުކުޅޭ އެ މެޗާއި ކުރިއަށް އޮތް ވޯލްޑް ކަޕް ފައިނަލާ އެއްވެސް ވަރަކަށް އަޅާނުކިޔޭނެކަން އޭނާ ފާހަގަކުރިއެވެ. ދުނިޔޭގެ އެންމެ ޝަރަފުވެރި ތަށްޓަށް ކުޅޭ ފައިނަލް މެޗަކީ މުޅިން ތަފާތު ޕްރެޝަރެއް އޮންނާނެ ކުރިމަތިލުމެއްކަމަށް އޭނާ ބުންޏެވެ.

ސެމީ ފައިނަލްގައި ފްރާންސް އަތުން 2-0އިން ސްޕެއިން މޮޅުވި މެޗަށް އަލިއަޅުވާލަމުން ލޮޕެޓެގީ ބުނީ، އިދިކޮޅު ޓީމުން ކިތަންމެ ވަރަކަށް ޕްރެސްކުރަން އުޅުނަސް ސްޕެއިންގެ ކުޅުންތެރިން ބޯޅަ ހިފަހައްޓައިގެން އުފައްދާ ކުޅުމުގެ ތެރެއިން އެކަން ކާމިޔާބު ނުވާނެ ކަމަށެވެ. އެގޮތުން ފްރާންސް ފަދަ ނުރައްކާތެރި އެޓޭކިންގ ޓީމަކަށް ވެސް މެޗުގެ 80ވަނަ މިނެޓާ ހަމައަށް ސްޕެއިންގެ ގޯލާ އަމާޒުކޮށް އެންމެ ހަމަލާއެއް ވެސް ނުފޮނުވުނުކަން އޭނާ ހަނދާންކޮށްދިނެވެ. 

ސްޕެއިންގެ ޓީމަށް ޕްރެސްކުރުން އުނދަގޫވަނީ ހަމައެކަނި އެ ޓީމުން ކުޅޭ ފޯމޭޝަންގެ ސަބަބުން ނޫންކަމަށާއި، ކޮންމެ ކުޅުންތެރިއެއްގެ ގައިގައި ހުންނަ އަމިއްލަ ހުނަރާއި މެޗު ރީޑްކުރުމުގެ ގާބިލްކަމުގެ ސަބަބުން ކަމަށް ލޮޕެޓެގީ ބުންޏެވެ. ގޯލްކީޕަރާއެކު ފަހަތުން ކުޅުން ބިނާކުރުމަކީ ސްޕެއިންގެ އެންމެ ބޮޑު އެއް ހަތިޔާރެވެ. އެހެންކަމުން އެކަކު ނުވަތަ ދެމީހަކު ޕްރެސްކޮށްގެން ސްޕެއިން ނުހުއްޓުވޭނެ ކަމަށާއި، އެކަމަށް ޓަކައި މުޅި ޓީމު އެއްފަހަރާ ވަރަށް ރަނގަޅު ވަގުތެއްގައި ހަރަކާތްތެރިވާން ޖެހޭނެކަން އޭނާ ފާހަގަކުރިއެވެ.

މީގެ އިތުރުން އާޖެންޓީނާއަކީ ވެސް މެދުތެރެއިން ބޯޅަ ހިފަހައްޓައިގެން ކުޅުމުގެ ހުނަރު ލިބިފައިވާ ޓީމެއްކަން ފާހަގަކޮށް، މުޅި މެޗުގެ ނަތީޖާ ނެރުމުގައި ދެ ޓީމުގެ "ވާދަވެރި ރޫހު"މުހިންމު ދައުރެއް އަދާކުރާނެކަމަށް ލޮޕެޓެގީ ދެކެއެވެ. އުމުރުން 39އަހަރުގެ މެސީއާ ގުޅޭގޮތުން އޭނާ ބުނީ، މެސީގެ ކުޅުމުގެ ސްޓައިލަށް މިހާރު ބޮޑެތި ބަދަލުތަކެއް ގެނެސްފައިވާ ކަމަށާއި، ބޯޅައާ ނުލައި ހުސް ޖާގަތަކަށް ވަނުމާއި އެހެން ކުޅުންތެރިންނަށް ފުރުސަތު ތަނަވަސްކޮށްދިނުމުގައި މެސީ މިހާރު މާ ނުރައްކާތެރި ކަމަށެވެ.

ސްޕެއިންގެ ކުޅުމަކީ މުޅި ޓީމު އެކުވެގެން ކުރިއަށްޖެހި، އަދި އެކީގައި ފަހަތަށް ފައިބާ ނިޒާމެއްކަމަށް ވުމުން، އާޖެންޓީނާއިން ދަނޑުގެ ވަކި ދިމާލެއް ބަންދުކުރި ނަމަވެސް އަނެއް ފަޅިން ޖާގަ ހޯދައިގެން ނުރައްކާކުރާނެކަމުގެ ޔަގީންކަން ލޮޕެޓެގީ ދިނެވެ. އޭނާ ގަބޫލުކުރާ ގޮތުގައި ސްޕެއިނުން އަބަދުވެސް ކުޅޭނީ އެމީހުންގެ އަމިއްލަ ސްޓައިލަށް އިތުބާރުކޮށްގެން، ވަރަށް ހަމަޖެހިލައިގެންނެވެ.