އިންގްލެންޑް ސިއްސުވާލުމަށް ފަހު އާޖެންޓީނާ ވޯލްޑް ކަޕްގެ ފައިނަލަށް!

އެމެރިކާގެ އެޓްލާންޓާ ސްޓޭޑިއަމްގައި ރޭ ކުޅުނު 2026ވަނަ އަހަރުގެ ފީފާ ވޯލްޑް ކަޕްގެ ފޯރިގަދަ ސެމީ ފައިނަލްގައި، ފަހަތުން އަރައި 2-1ގެ ނަތީޖާއަކުން އިންގްލެންޑް ބަލިކޮށް، މުބާރާތުގެ އެންމެ ފަހުގެ ޗެމްޕިއަން އާޖެންޓީނާ އިން ޖެހިޖެހިގެން ދެވަނަ ފަހަރަށް ފައިނަލުގެ ޖާގަ ކަށަވަރުކޮށްފިއެވެ.

މެޗު ބެލުމަށް ވަން 68,239ސަޕޯޓަރުންގެ ކުރިމަތީގައި ދެވަނަ ހާފުގެ 55ވަނަ މިނެޓުގައި މޯގަން ރޮޖާސްގެ އެހީތެރިކަމާ އެކު އެންތަނީ ގޯޑަން ވަނީ އިންގްލެންޑަށް ލީޑު ނަގައިދީފައެވެ. މި ލަނޑާ އެކު 1966ވަނަ އަހަރަށް ފަހު ފުރަތަމަ ފަހަރަށް ފައިނަލަށް ދިއުމުގެ އުއްމީދު އިންގްލެންޑަށް އާލާވި ނަމަވެސް، ކެޕްޓަން ލިއޮނެލް މެސީގެ ތަޖުރިބާއާއި މޮޅު ކުޅުމުގެ ސަބަބުން މެޗުގެ އޮއިވަރު ވަނީ މުޅިން ބަދަލުވެފައެވެ. އެގޮތުން މެޗު ނިމެން ފަސް މިނެޓަށް ވެފައި ވަނިކޮށް މެސީ ތަނަވަސްކޮށްދިން ފުރުސަތަކުން އެންޒޯ ފެނާންޑޭޒް ނަތީޖާ ހަމަހަމަކޮށްދިން އިރު، އާޖެންޓީނާ މޮޅުވި ލަނޑު އިތުރު ވަގުތުގެ ދެވަނަ މިނެޓުގައި ބޮލުން ކާމިޔާބުކޮށްދިނީ ބަދަލު ކުޅުންތެރިޔާ ލައުޓާރޯ މާޓިނޭޒްއެވެ. މި ލަނޑު ޖެހުމަށް ވެސް އޭނާއަށް އެހީތެރިވެދިނީ މެސީއެވެ.

މި ކާމިޔާބީއާ އެކު އާޖެންޓީނާއަށް ވަނީ ވޯލްޑް ކަޕްގެ ތާރީޚުގައި ތަށި ދިފާއުކުރާ ތިންވަނަ ޤައުމުގެ ޝަރަފު ހޯދުމުގެ ފުރުސަތު ހުޅުވިފައެވެ. މީގެ ކުރިން މިކަން ހާސިލުކޮށްފައިވަނީ ހަމައެކަނި 1938ގައި އިޓަލީ އަދި 1962ގައި ބްރެޒިލްއިންނެވެ. މީގެ އިތުރުން މިއީ މެސީގެ ކެރިއަރުގައި އޭނާ ކުޅޭނެ ވޯލްޑް ކަޕްގެ ތިންވަނަ ފައިނަލެވެ. މިއީ ބްރެޒިލްގެ ކުރީގެ ކުޅުންތެރިޔާ ކަފޫ ފިޔަވައި އެހެން ކުޅުންތެރިއަކަށް ހާސިލުކުރެވިފައިވާ ކަމެއް ނޫނެވެ. އަންނަ އާދީއްތަ ދުވަހުގެ ރޭ ނިއު ޔޯކް ނިއު ޖާޒީ ސްޓޭޑިއަމްގައި ކުޅޭ ފައިނަލްގައި ދެކުނު އެމެރިކާގެ ޗެމްޕިއަން އާޖެންޓީނާ ނުކުންނާނީ ޔޫރަޕްގެ ޗެމްޕިއަން ސްޕެއިންއާ ދެކޮޅަށެވެ. މިއީ ރަސްމީ މުބާރާތެއްގައި ސްޕެއިންއާ ދެކޮޅަށް މެސީ ކުޅޭނެ ފުރަތަމަ ފަހަރެވެ.

އަނެއްކޮޅުން، ކޯޗު ތޯމަސް ޓުޗެލްގެ އިރުޝާދުގެ ދަށުން ކުޅެމުންދިޔަ އިންގްލެންޑަށް މި ނަތީޖާގެ ސަބަބުން ވަނީ ފުން ހިތާމައަކާ ކުރިމަތިލާން ޖެހިފައެވެ. ޚާއްސަކޮށް އެ ޓީމުގެ މުހިންމު ދެ ތަރިން ކަމަށްވާ ކެޕްޓަން ހެރީ ކޭން އާއި ޖޫޑް ބެލިންހަމް އަށް މި މެޗުގައި އެދެވޭ ކުޅުމެއް ދެއްކިފައެއް ނުވެއެވެ. މެޗުގެ ފުރަތަމަ ހާފުގައި ގިނަ ފައުލްތަކެއް ފެނިގެންދިޔައިރު، އާޖެންޓީނާއިން ވަނީ ފަހު ހާފުގައި ކުޅުން ވަރުގަދަކޮށް ގިނަ ހަމަލާތަކެއް އުފައްދާފައެވެ. އޭގެ ތެރެއިން އެލެކްސިސް މެކް އެލިސްޓާ ފޮނުވާލި ނުރައްކާތެރި ހަމަލާއެއް ގޯލުގެ ދަނޑިއަށް ވެސް އަމާޒުވިއެވެ.

ސެމީން ބަލިވުމާ އެކު އިންގްލެންޑް ދެން ޖެހޭނީ ހޮނިހިރު ދުވަހުގެ ރޭ މަޔާމީގައި ކުޅޭ ތިންވަނަ ހޮވާ މެޗުގައި ފްރާންސާ ދެކޮޅަށް ނުކުންނާށެވެ.