އާ ގަވާއިދުގެ ދަށުން ރަތް ކާޑު ދެއްކި ފުރަތަމަ ކުޅުންތެރިޔަކަށް އެމްބޯލޯ

މިފަހަރުގެ ވޯލްޑް ކަޕްގައި އަލަށް އަމަލުކުރަން ފެށި "މިސްޓޭކަން އައިޑެންޓިޓީ" (އޮޅުމަކުން ކާޑު ދެއްކުން) އާ ގަވާއިދުގެ ދަށުން ރަތް ކާޑު ދައްކައި ދަނޑުން ފޮނުވާލި ފުރަތަމަ ކުޅުންތެރިޔަކަށް ސްވިޒަލޭންޑްގެ ބްރީލް އެމްބޯލޯ ވެއްޖެއެވެ.

މެޗުގެ ފުރަތަމަ ހާފުގައި ރީނދޫ ކާޑެއް ދައްކާފައި ވަނިކޮށް، އެމްބޯލޯއަށް ދެވަނަ ރީނދޫ ކާޑަކާއެކު ރަތް ކާޑު ދެއްކީ ކުއާޓާ ފައިނަލުގައި އާޖެންޓީނާ އަތުން ސްވިޒަލޭންޑް ބަލިވި މެޗުގެ 72 ވަނަ މިނެޓުގައި، ފައުލްއެއް ވީކަމަށް ހެދިގެން ވެއްޓުމުން (ސިމިއުލޭޝަން) އެވެ.

ފުރަތަމަ މި ކާޑު ދެއްކީ އާޖެންޓީނާގެ ލިއަންޑްރޯ ޕްރެޑޭސް ކުރި ފައުލަކަށް ކަމަށް ބަލައި އޭނާއަށެވެ. ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް)އިން މެދުވެރިވެ، ރެފްރީ ޔޮއާއޯ ޕިންހެއިރޯއަށް މޮނިޓަރު ބެލުމަށް އިރުޝާދު ދިނެވެ.

ވީޑިއޯ ރިވިއު ބެލުމަށް ފަހު، ރެފްރީ ނިންމީ އެމްބޯލޯ އަމިއްލައަށް ވެއްޓުނީ (ޑައިވް ކުރީ) ކަމަށެވެ.

އެންމެ ފަހުގެ ދުނިޔޭގެ ޗެމްޕިއަނުންނާ ދެކޮޅަށް ކުޅެ، ސްވިޒަލޭންޑުން ނަތީޖާ ހަމަހަމަކުރިތާ އެންމެ ފަސް މިނެޓު ފަހުން ރަތް ކާޑު ދެއްކުމުން ސްވިޒަލޭންޑްގެ ފޯވާޑް ހުރީ ވަރަށް ބޮޑަށް މާޔޫސްވެފައެވެ.

އުމުރުން 29 އަހަރުގެ އެމްބޯލޯ ކެންސަސް ސިޓީގެ ދަނޑުން ފޭބީ ރޮމުންނެވެ. އޭނާއަށް ހިތްވަރު ދިނީ އޭނާގެ ޓީމުގެ ކުޅުންތެރިންނެވެ.

"ޔަގީނުން ވެސް ރީނދޫ ކާޑެއް ދައްކަން ޖެހޭ އެއްވެސް ސަބަބެއް ނެތް،" ސްވިޒަލޭންޑްގެ ކޯޗު މުރާތު ޔަކިން ބުންޏެވެ.

"އެއީ އެއްވެސް ގެއްލުމެއް ނެތް ހާލަތެއް. ރެފްރީ ޖެހޭނީ ކުޅުން ކުރިއަށް ގެންދަން ދޫކޮށްލަން."

"އަހަރެމެންނަށް އަދަބު މިލިބުނީ ގަބޫލުކުރަން ދަތި ގަވާއިދެއްގެ ސަބަބުން. އަހަންނަކަށް މިއެއް ނުވިސްނޭ. ބޭނުމެއް ނެތް ކަމެއްގައި އެމީހުން މެދުވެރިވުމަކީ ވަރަށް ހިތްދަތި ކަމެއް. މިއީ ފުޓްބޯޅައާ އެއްވެސް ގުޅުމެއް ހުރި ގަވާއިދެއް ނޫން."

"މިކަމުގެ ސަބަބުން އަހަރެމެންގެ މެޗު ހަލާކުވެގެން ހިނގައްޖެ. އަހަރެމެން މިއަށް ބޯލަނބަން ޖެހޭނެ، އެކަމަކު މިގޮތަށް ބަލިވުމަކީ ވަރަށް ވޭންދެނިވި ކަމެއް."

ނަމަވެސް، ފްރާންސްގެ ރެންސްއަށް ކުޅޭ އެމްބޯލޯއަށް، މެޗު ދިރާސާކުރި ފަރާތްތަކުގެ މާބޮޑު ހަމްދަރުދީއެއް ނުލިބުނެވެ.

"އަހަރެން ހަމްދަރުދީވަނީ އެމްބޯލޯގެ ޓީމުގެ ކުޅުންތެރިންނަށް، އޭނާއަކަށް ނޫން. އޭނާގެ ސަބަބުން ޓީމަށް ސެމީ ފައިނަލަށް ދިއުމުގެ ފުރުސަތު ގެއްލުނީ،" މޭޖާ ލީގު ސޮކާގެ ކުރީގެ ފޯވާޑް ބްރެޑްލީ ރައިޓް-ފިލިޕްސް އައިޓީވީގައި ބުންޏެވެ.

ޖަމެއިކާގެ ކުރީގެ ގައުމީ ކުޅުންތެރިޔާ ޖޯބީ މެކްއަނަފް ބުނީ ބްރީލް އެމްބޯލޯ އަމިއްލަ ނަފްސު ވެސް ދަށްކޮށްލީކަމަށާއި އޭނާގެ ޓީމުގެ ކުޅުންތެރިން ވެސް މާޔޫސްކޮށްލީ ކަމަށެވެ.

"ސްލޯ މޯޝަންގައި ބަލާއިރު ހުރިހާ ކަމެއް ވެސް ފެންނާނީ މާ ގޯސްކޮށް. އެންމެ ފަހުން އޭނާއަށް ރީނދޫ ކާޑު މިލިބުނީ އަމިއްލައަށް ވެއްޓުމުން. ފަހަރުގައި އޭނާއަށް ހީވީ ކުޅުންތެރިޔާގެ ގައިގައި މާ އަވަހަށް ލައިގަންނާނެ ކަމަށް، އެކަމަކު އެހެންނެއް ނުވި."

"އެއީ ސިމިއުލޭޝަނެއް (އަމިއްލައަށް ވެއްޓުމެއް)، އެކަމަކު ވެސް އޭނާއާ މެދު ހަމްދަރުދީ ނުވެއެއް ނުހުރެވޭނެ."

އިތުރު ވަގުތުގެ ތެރޭގައި 10 ކުޅުންތެރިންނާ އެކު ކުޅުނު ސްވިޒަލޭންޑްގެ މައްޗަށް އާޖެންޓީނާ ކުރިހޯދީ 3-1އިންނެވެ. ސެމީ ފައިނަލުގައި އާޖެންޓީނާ ބައްދަލުކުރާނީ އިންގްލެންޑާއެވެ. 

"މި ޓީމުގައި ވަރަށް ބޮޑު ޖޯޝެއް އެބަހުރި. އެއް ކުޅުންތެރިއަކު މަދުކޮށް ކުޅެން ޖެހުނު ނަމަވެސް، އަހަރެމެން ހުރިހާ އެނާޖީއެއް ނެރުނިން. ހުރިހާ ކުޅުންތެރިންނާ މެދުވެސް އަހަރެން ވަރަށް ފަޚުރުވެރިވޭ،" ޔަކިން ބުންޏެވެ.

އާ ގަވާއިދަކީ ކޮބާ؟

ފީފާއިން ވަނީ މި މުބާރާތަށް ގިނަ ބަދަލުތަކެއް ގެނެސްފައެވެ. އޭގެ ތެރެއިން އޮޅުމަކުން ކާޑު ދެއްކުމުގެ މައްސަލައަށް ހާއްސަ ގަވާއިދެއް ހެދުމަށް އެދުނީ ރެފްރީންގެ އިސްވެރިޔާ ޕިއެރްލުއިޖީ ކޮލީނާއެވެ.

މި ގަވާއިދު ބުނާގޮތުން، ކުޅުންތެރިއަކަށް ކާޑެއް ދައްކާ ނުވަތަ ދަނޑުން ފޮނުވާލާއިރު، އެ ފައުލް ހަގީގަތުގައި ކޮށްފައި ވަނީ އިދިކޮޅު ޓީމުގެ ކުޅުންތެރިއެއް ނަމަ، އެ ނިންމުން ބަދަލުކުރެވިދާނެއެވެ.

އެ ފައުލަށް ޕަރެޑޭސްއަށް ކާޑު ނުދެއްކި ނަމަ، މި ގަވާއިދުގެ ބޭނުމެއް ނުޖެހުނީހެވެ. އަދި އެމްބޯލޯ ދަނޑުމަތީގައި ހުރީހެވެ.

މި ގަވާއިދުގެ ބޭނުން އެންމެ ފުރަތަމަ ހިފީ މި މުބާރާތުގެ ކުރީކޮޅު، އެމެރިކާގެ ޑިފެންޑަރު ޓިމް ރީމް ހިލޭ ޖެހުމެއް ދީ، މިގޭލް އަލްމިރޮންއަށް ފައުލްކުރި ކަމަށް ބަލައި ރީނދޫ ކާޑެއް ދެއްކި ވަގުތުއެވެ.

ހިލޭ ޖެހުން ޖެހި ފަހުން، ނެދަލެންޑްސްގެ ރެފްރީ ޑެނީ މަކެލީއަށް ވީއޭއާރްއިން ސްކްރީން ބެލުމަށް އެންގުމުން އޭނާ ވަނީ ނިންމުން ބަދަލުކޮށްފައެވެ. މިއީ މީގެ ކުރިން ރެފްރީންނަށް ހުއްދަ އޮންނަ ކަމެއް ނޫނެވެ.

ރީމްއަށް ދެއްކި ކާޑު ބާތިލުކުރުމަށް ފަހު، މަކެލީ ވަނީ ނިއުކާސަލް ޔުނައިޓެޑްގެ ކުރީގެ ފޯވާޑް އަލްމިރޮން އަމިއްލައަށް ވެއްޓުނު ކަމަށް ނިންމައި އޭނާއަށް ރީނދޫ ކާޑެއް ދައްކާފައެވެ.