2026ވަނަ އަހަރުގެ ފީފާ ވޯލްޑް ކަޕްގައި ތާއީދު ކުރަނީ އާޖެންޓީނާއަށް ކަމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހާމަކޮށްފިއެވެ.
އޭނާ ބުނި ގޮތުގައި މި ތާއީދަކީ އެ ގައުމުގެ ފުޓްބޯޅަ ލެޖެންޑް ލިއޮނަލް މެސީއަށް ވުރެ ބޮޑަށް، އާޖެންޓީނާގެ ރައީސް ހާވިއޭ މިލެއިއާ އެކު އޮތް ގާތް ގުޅުމުގެ ސަބަބުން ކުރާ ތާއީދެކެވެ.
"މޯޖޯ ޕޮޑްކާސްޓް"ގައި ވާހަކަދައްކަމުން ނަތަންޔާހޫ ބުނީ އާޖެންޓީނާއަށް އޭނާ ތާއީދުކުރަނީ މިލެއިއަކީ "ހަގީގީ ސުޕަސްޓާރެއް"ކަމަށްވާތީ ކަމަށާއި، އާޖެންޓީނާގެ ރައީސަކީ އިސްރާއީލުގެ އެންމެ ގާތް އެއް އެކުވެރިޔާ ކަމަށެވެ. އޭނާގެ މި ވާހަކަތަކުން ހާމަވަނީ ކުޅިވަރުގެ ގުޅުމަށް ވުރެ ބޮޑަށް ދެ ގައުމުގެ ސަރުކާރުގެ މެދުގައި އޮތް ސިޔާސީ ގުޅުން ވަރުގަދަވަމުންދާ ކަމެވެ.
ނަތަންޔާހޫގެ މި ވާހަކަތައް އައިސްފައި ވަނީ 2026ވަނަ އަހަރުގެ ފީފާ ވޯލްޑް ކަޕްގައި އެންމެ ފަހުގެ ޗެމްޕިއަން އާޖެންޓީނާއިން ކުރިއަރަމުންދާ ދަނޑިވަޅެއްގައެވެ. އަދި އެ ގައުމަކީ މި މުބާރާތް ކާމިޔާބުކުރާނެ ކަމަށް އެންމެ ބޮޑަށް ބެލެވޭ އެއް ގައުމެވެ.
މިލެއިގެ ރައީސްކަމުގައި އިސްރާއީލާއި އާޖެންޓީނާގެ ގުޅުން ވަރަށް ބޮޑަށް ވަނީ ވަރުގަދަވެފައެވެ. އަދި ބައިނަލްއަގުވާމީ އެކި މައްސަލަތަކުގައި ދެ ގައުމުގެ ލީޑަރުން ދަނީ ދެގައުމުން ދެގައުމަށް ތާއީދުކުރާކަން ހާމަކުރަމުންނެވެ. ވޯލްޑް ކަޕްގައި އާޖެންޓީނާއަށް ނަތަންޔާހޫ ތާއީދުކުރުމުން ދައްކުވައިދެނީ އެ ސިޔާސީ ގުޅުން ކުޅިވަރުގެ މައިދާނަށްވެސް ފެތުރިގެން ގޮސްފައިވާ މިންވަރެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.