ބައިނަލްއަގުވާމީ މުބާރާތްތަކުގައި ވާދަނުކުރެވޭ ގޮތަށް ވޯލްޑް އެތުލެޓިކްސްއިން ރަޝިއާގެ އެތުލީޓުން ސަސްޕެންޑްކޮށްފައި އޮތް އޮތުން ދެމެހެއްޓުމަށް މި މަހުގެ ކުރީކޮޅު ނިންމި ނިންމުމަކީ ތަފާތުކުރުން ބޮޑު ނިންމުމެއް ކަމަށް ބުނެ، ރަޝިއާގެ އެތުލެޓިކްސް ފެޑެރޭޝަނުން އެ މައްސަލަ ކޯޓް އޮފް އާބިޓްރޭޝަން ފޯ ސްޕޯޓް (ކާސް)ގައި އިސްތިއުނާފުކޮށްފިއެވެ.
ޔޫކްރެއިންގެ ހަނގުރާމައާ ގުޅިގެން ރަޝިއާ އަދި ބެލަރޫސްގެ ކުޅުންތެރިން ބާކީކުރުމަށް މީގެ ކުރިން އަޅާފައިވާ ފިޔަވަޅުތައް، މި މަހުގެ ތިންވަނަ ދުވަހު ބޭއްވި ވޯލްޑް އެތުލެޓިކްސް ކައުންސިލްގެ ބައްދަލުވުމުގައި ވަނީ އަލުން ތަންފީޒުކުރަން ނިންމާފައެވެ. މިކަމާ ނުރުހުން ފާޅުކޮށް ރަޝިއާގެ ފެޑެރޭޝަނުން މިއަދު އާންމުކުރި ބަޔާނެއްގައި ފާހަގަކޮށްފައިވަނީ، މިއީ އެ ގައުމުގެ ހައްގުތަކަށް އަރައިގަނެ، ބޭއިންސާފުން ނިންމާފައިވާ ނިންމުމެއް ކަމަށާއި އެހެންކަމުން ކުޅިވަރާ ބެހޭ ބައިނަލްއަގުވާމީ އެންމެ މަތީ ކޯޓަށް އެ މައްސަލަ މިހާރު ވައްދާފައިވާނެ ކަމަށެވެ.
އިންޓަރނޭޝަނަލް އޮލިމްޕިކް ކޮމިޓީ (އައިއޯސީ)އިން ރަޝިއާގެ އޮލިމްޕިކް ކޮމިޓީއަށް ދީފައިވާ ސަސްޕެންޝަނަށް މިދިޔަ އަންގާރަ ދުވަހު ބައެއް ލުއިތައް ދީފައިވީ ނަމަވެސް، އެތުލެޓިކްސްގެ މައި އިދާރާގެ ހަރުކަށި ނިންމުމާއެކު ރަޝިއާގެ ދުވުންތެރިންނަށް ބައިނަލްއަގުވާމީ ޓްރެކްތަކަށް ނުކުތުމުގެ ދޮރު އަދިވެސް ވަނީ ބަންދުވެފައެވެ. އައިއޯސީގެ ލުއިތަކަކީ އޮލިމްޕިކްގެ ހަރަކާތްތަކާ ރަޝިއާ އަލުން ގުޅުމަށް ލިބުނު ފެހި ސިގްނަލެއް ކަމުގައި ގިނަ ބަޔަކު ދެކެއެވެ.
މި ފިޔަވަޅުތަކުގެ ސަބަބުން، 2024ވަނަ އަހަރު ފަރަންސޭސިވިލާތުގެ ޕެރިހުގައި ބޭއްވި އޮލިމްޕިކްސްގެ އިތުރުން ކުރިއަށް އޮތް މިލާނޯ ކޮރްޓީނާ ވިންޓަރ ގޭމްސްގައި ވެސް ރަޝިއާގެ އެތުލީޓުން ވާދަކުރަން ޖެހިފައި ވަނީ އެ ގައުމުގެ ދިދައިގެ ބަދަލުގައި، ވަކި ފަރާތަކަށް ނުޖެހޭ "ނިއުޓްރަލް" އެތުލީޓުންގެ ގޮތުގައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.