"އުންމީދަކީ މިރޭގެ މެޗަކީ އަހަރެންގެ ފަހު މެޗަށް ނުވުން"

2026ވަނަ އަހަރުގެ ފީފާ ވޯލްޑް ކަޕަކީ ކްރިސްޓިއާނޯ ރޮނާލްޑޯގެ ކާމިޔާބު ބައިނަލްއަގުވާމީ ކެރިއަރުގެ ފަހު ވޯލްޑް ކަޕްކަން އޭނާ ކަށަވަރުކޮށްދީފިއެވެ.

ގަދަ 16 ގެ ބޮޑު މެޗުގައި ސްޕެއިނާ ދެކޮޅަށް ޕޯޗުގަލް ނުކުންނަ މެޗްގެ ޕްރެސްގައި ރޮނާލްޑޯ ބުނީ މި ވޯލްޑްކަޕްގެ ދެން ހުރި ހުރިހާ ވަގުތެއްގެ އުފާ ފުރިހަމައަށް ހާސިލްކުރަން ބޭނުންވާ ކަމަށާއި އުއްމީދަކީ މިރޭގެ މެޗް އެއީ ވޯލްޑްކަޕްގެ ފަހު މެޗްކަމުގައި ނުވުންކަމަށެވެ.

"އަހަރެން ބޭނުންވަނީ އަހަރެންގެ ފަހު ވޯލްޑް ކަޕްގެ އުފާ އެންމެ ފުރިހަމައަށް ހާސިލްކުރަން،" ރޮނާލްޑޯ ބުންޏެވެ.

 "އުންމީދަކީ މާދަމާގެ މެޗަކީ އަހަރެންގެ ފަހު މެޗަށް ނުވުން."

ވޯލްޑް ކަޕްގެ ކުއާޓާ ފައިނަލުން ޖާގައެއް ހޯދުމަށްޓަކައި، ހޯމަ ދުވަހު ޑެލަސްގައި ޕޯޗުގަލް ނުކުންނާނީ އަވަށްޓެރި ވާދަވެރި ސްޕެއިން ގައުމީ ފުޓްބޯޅަ ޓީމާ ދެކޮޅަށެވެ.

މި މެޗަކީ ޔޫރަޕްގެ ފުޓްބޯޅައިގެ ދެ ބާރުގެ ކުރިމަތިލުމެކެވެ. ނޮކްއައުޓް ބުރުގައި ދެއްކި މޮޅު ކުޅުމާއެކު ސްޕެއިން މި މުބާރާތަށް ނުކުތީ އެންމެ ފޭވަރިޓުންގެ ގޮތުގައެވެ.

އުމުރުން ދުވަސްވީ ނަމަވެސް، ރޮނާލްޑޯ ދަނީ އޭނާގެ އެންމެ ވަރުގަދަ އެއް ވޯލްޑް ކަޕް ކެމްޕޭން ކުރިއަށް ގެންދަމުންނެވެ.

އޭނާ ވަނީ މި މުބާރާތުގައި ތިން ލަނޑު ޖަހާފައެވެ. އޭގެ ތެރޭގައި ވޯލްޑް ކަޕްގެ ނޮކްއައުޓް މެޗެއްގައި އޭނާ ޖެހި ފުރަތަމަ ލަނޑު ހިމެނެއެވެ. އެއީ ގަދަ 32ގެ ބުރުގައި ކްރޮއޭޝިއާ އަތުން 2-1އިން ޕޯޗުގަލް މޮޅުވި މެޗުގައި ޖެހި ޕެނަލްޓީއެކެވެ.

މި މުބާރާތުގެ ކުރީކޮޅު، އޭނާ ވަނީ ފީފާ ވޯލްޑް ކަޕްގެ ތަފާތު ހަ މުބާރާތެއްގައި ލަނޑު ޖެހި ފުރަތަމަ ކުޅުންތެރިޔާގެ ޝަރަފް ހޯދައި، އެންމެ މަތީ ފަންތީގައި ގިނަ ދުވަހު ދެމިހުރުމުގެ އާ ރެކޯޑެއް ގާއިމްކޮށްފައެވެ.

ފަސް ފަހަރު ބެލޮންޑިއޯ ހޯދާފައިވާ ކުޅުންތެރިޔާ ބުނީ، ވޯލްޑް ކަޕް ތަށި އުފުލާލުމަކީ އޭނާގެ ކެރިއަރު މީހުން ހަނދާންކުރާނެ ގޮތް ކަނޑައަޅާނެ ކަމެއް ނޫން ކަމަށާއި، ކްލަބާއި ގައުމީ ޓީމާ އެކު އޭނާގެ ހުރިހާ ހުވަފެންތަކެއް މިހާރު ވެސް ހާސިލްވެފައިވާ ކަމަށެވެ.

"މިރޭ ކޮންމެ ގޮތެއް ވިޔަސް، އަހަރެން ދާނީ ހިތްހަމަޖެހުމާ އެކު — ސައްތައިން ސައްތައެއް ނޫން، ހާހުން ސައްތަ ހިތްހަމަޖެހުމާ އެކު — ސަބަބަކީ ފުޓްބޯޅައަށް އަހަރެންގެ ހުރިހާ އެއްޗެއް ދީފިން،" ރޮނާލްޑޯ ބުންޏެވެ.

ރޮނާލްޑޯ ވޯލްޑް ކަޕްގައި ފުރަތަމަ ކުޅުނީ 2006 ވަނަ އަހަރުއެވެ. އަދި އޭގެ ފަހުން ބޭއްވި ކޮންމެ މުބާރާތެއްގައި އޭނާ ވަނީ ކުޅެފައެވެ — އެއީ 2006، 2010، 2014، 2018، 2022 އަދި 2026 އެވެ.

އޭނާ ވަނީ ޕޯޗުގަލް ގައުމީ ޓީމަށް 232 މެޗު ކުޅެދީ، ފިރިހެން ފުޓްބޯޅައިގެ ރެކޯޑް އަދަދެއް ކަމަށްވާ 146 ލަނޑު ޖަހާފައެވެ. އަދި ޔޫއެފާ ޔޫރޯ 2016ގައި ޕޯޗުގަލްއަށް ފުރަތަމަ ބޮޑު މުބާރާތް ކާމިޔާބުކޮށްދިނުމުގައި ކެޕްޓަންކަން ކޮށްދީފައިވާއިރު، 2019 އަދި 2025 ގެ ޔޫއެފާ ނޭޝަންސް ލީގު ވެސް ވަނީ ކާމިޔާބުކޮށްފައެވެ.

މި ނިންމުމާއެކު، 2030 ވަނަ އަހަރުގެ ފީފާ ވޯލްޑް ކަޕް ޕޯޗުގަލް، ސްޕެއިން އަދި މޮރޮކޯ ގުޅިގެން ބޭއްވި ނަމަވެސް، އެ މުބާރާތުގައި ރޮނާލްޑޯ ނުފެންނާނެއެވެ.

އޭގެ ބަދަލުގައި، 2026 ވަނަ އަހަރުގެ މުބާރާތް ވެގެންދާނީ ފުޓްބޯޅައިގެ ތާރީޚުގައި ދުށް އެންމެ މޮޅު ބައިނަލްއަގުވާމީ ކެރިއަރުގެ ފަހު ބާބަށެވެ.

މިހާރު ރޮނާލްޑޯގެ އަމާޒަކީ މި ވަދާއީ ދަތުރު އިތުރަށް ދިގު ދެމިގެން ދިޔުމެވެ.

އޭނާގެ ފަހު ވޯލްޑް ކަޕް މެޗަށް ވެދާނެ މެޗެއްގައި ސްޕެއިނާ ދެކޮޅަށް ނުކުންނައިރު، ޕޯޗުގަލްގެ ލެޖެންޑް ބުނީ އޭނާގެ ކިބައިގައި އަދިވެސް ހުރީ ފާއިތުވި ދެ ދަހަރަށް ވުރެ ގިނަ ދުވަހު އޭނާ ދެމެހެއްޓި ފޯރިއާއި ޝައުގުވެރިކަން ކަމަށެވެ.