ލެޖެންޑަކަށް އެންމެ އެކަށީގެންވާ ރަން ބޫޓެއް

ޕޯޗްގަލްގެ ތަރި ކްރިސްޓިއާނޯ ރޮނާލްޑޯގެ ޝަރަފްގައި ނައިކީއިން ނެރުނު ރަން ބޫޓަކީ ސޯޝަލް މީޑިއާގައި ވަރަށް އަވަހަށް ޓްރެންޑިންގް މައުޟޫއަކަށް ވެގެންދިޔަ އެއްޗެކެވެ. ސަޕޯޓަރުން މި ބޫޓު ސިފަކޮށްފައިވަނީ ރޮނާލްޑޯގެ ކެރިއަރަށް ދެވުނު "އައިކޮނިކް"، "އެލީޓް" އަދި "ފުރިހަމަ އިހުތިރާމެއް" ގެ ގޮތުގައެވެ.

ގިނަ ބަޔަކު ވަނީ ރަން ކުލައިގެ ރަމްޒީ މާނައަށް އަލިއަޅުވާލާފައެވެ. އަދި އެއީ އޭނާ ވޯލްޑް ކަޕްގައި ހެދި ރެކޯޑްތަކާއި ދުނިޔޭގެ ފެންވަރުގައި އޭނާގެ އޮތް ނުފޫޒާ ގުޅުވާފައެވެ.

މުޅި ދުނިޔެއިން ލިބެން ހުންނާނީ އެންމެ 2,026 ޖޯޑު ބޫޓު

މުބާރާތް ބާއްވާ އަހަރަށް ނިސްބަތްކޮށް، "ގޯލްޑް ސްކޯޕިއަން" އެޑިޝަންގެ ބޫޓު މުޅި ދުނިޔެއިން ލިމިޓެޑް އެޑިޝަނެއްގެ ގޮތުގައި ނެރެނީ އެންމެ 2,026 ޖޯޑެވެ. މި ބޫޓު ލިބެން ހުންނާނީ ނައިކީ އެސްއެންކޭއާރްއެސް ރިޒާވް (Nike SNKRS Reserve) މެދުވެރިކޮށެވެ. އަދި ޕްރީ-އޯޑަރުތައް ހުޅުވާލާނީ ޖޫން 27، 2026 ގައެވެ.

320 ޑޮލަރަށް ވިއްކާ މި ބޫޓަކީ ކަލެކްޓަރުންގެ މެދުގައި ބޮޑު މަގުބޫލުކަމެއް ލިބޭނެ އެއްޗެއް ކަމަށް ބެލެވެއެވެ. ހާއްސަކޮށް ރޮނާލްޑޯގެ ތާރީޚީ ރެކޯޑާ މި ބޫޓު ގުޅިފައިވުމުންނެވެ.

ރޮނާލްޑޯގެ ރެކޯޑްތައް މުގުރާލުމުގެ ދަތުރު ކުރިއަށް

އުޒްބެކިސްތާނާ ދެކޮޅަށް އެންމެ ފަހުން ކުޅުނު މެޗުގައި ރޮނާލްޑޯ ޖެހި ދެ ލަނޑާ އެކު، އޭނާ ވޯލްޑް ކަޕްގައި ޖެހި ލަނޑުގެ އަދަދު ވަނީ 10އަށް އަރާފައެވެ. މިއާ އެކު އޭނާ ވެގެން ގޮސްފައިވަނީ ޕޯޗުގަލްގެ ތާރީޚުގައި ވޯލްޑް ކަޕްގައި އެންމެ ގިނަ ލަނޑު ޖެހި ކުޅުންތެރިޔާއަށެވެ. އެއީ ޔޫސެބިއޯގެ ގިނަ ދުވަސްވީ ރެކޯޑް މުގުރާލުމަށް ފަހުއެވެ. އަދި އޭނާއަކީ ވޯލްޑްކަޕްގައި ގޯލް ޖެހި ޕޯޗްގަލްގެ އެންމެ ޒުވާންކުޅުންތެރިޔާގެ އިތުރުން އެންމެ ދުވަސްވީ ކުޅުންތެރިޔާ ވެސް މެއެވެ.

މީގެ އިތުރުން، އޭނާ ވަނީ ތަފާތު ހަ ވޯލްޑް ކަޕެއްގައި ލަނޑު ޖެހި ފުރަތަމަ ކުޅުންތެރިޔާގެ ޝަރަފު ހޯދައި، ފުޓްބޯޅައިގެ އެންމެ ބޮޑު މައިދާނުގައި އޭނާގެ ލެޖެންޑަރީ މަގާމު އިތުރަށް ވަރުގަދަކޮށްފައެވެ.