ނޮކްއައުޓް ބުރަށް ދިއުމުގެ އުންމީދު ސެނެގާލުން އާކޮށްފި

އެއް ކުޅުންތެރިއަކު މަދުކޮށް މެޗްގެ ބޮޑުބައި ކުޅުނު އިރާގު 5-0 ގެ ތަފާތަކުން ބަލިކޮށް ވޯލްޑް ކަޕްގެ ނޮކްއައުޓް ބުރަށް ދިއުމުގެ އުންމީދު ސެނެގާލުން ބޮޑުކޮށްފިއެވެ.

ގްރޫޕް އައިގެ ތިންވަނަ ސެނެގާލް (ލަޔަންސް އޮފް ޓެރަންގާ) ހޯދީ ތިން ޕޮއިންޓާއެކުގައެވެ. މިއާ އެކު ތިންވަނަ ހޯދި ޓީމުތަކުގެ ތަރުތީބުން އެޓީމު ފަސްވަނައަށް ޖެހިލި ނަމަވެސް، ގަދަ 32ގެ ޖާގައެއް ކަށަވަރުކުރުމަށް އެހެން މެޗުތަކުގެ ނަތީޖާ ނިކުންނަ ގޮތަކަށް އެޓީމަށް އިންތިޒާރު ކުރަން ޖެހޭނެއެވެ.

ފްރާންސް އަދި ނޯވޭ އަތުން ވީ ބަލިތަކުން އަރައިގަތުމަށް ޓޮރޮންޓޯގައި ކުޅުނު މި މެޗުގައި ސެނެގާލުން ފުރިހަމަ ކުޅުމެއް ދެއްކިއިރު، މި ނަތީޖާއާ އެކު ތިންވަނަ ހޯދި ޓީމުތަކުގެ ތާވަލުގެ ނުވަވަނައަށް ސްކޮޓްލޭންޑް ވަނީ ވެއްޓިފައެވެ. މި ބުރުން ދެން އޮތް ބުރަށް ދާނީ އެންމެ މޮޅު އަށް ޓީމެވެ.

މެޗު ވަރަށް އަވަހަށް ފެށި ސެނެގާލުން ވަނީ އެންމެ ހަތަރު މިނެޓުގެ ތެރޭގައި ލީޑު ނަގާފައެވެ. ކޯނަރަކުން އަބްދުލާޔޭ ސެކް ބޮލުން ފޮނުވާލި ބޯޅަ، ސަންޑަލޭންޑްގެ މިޑްފީލްޑަރު ހަބީބް ދިއާރާގެ ގައިގައި ޖެހި މިސްރާބު ބަދަލުވެގެން ގޮސް ވަނީ އިރާގުގެ ގޯލްކީޕަރު އަހުމަދު ބާސިލް ފަހަތަށް ޖައްސާލުމަށް ފަހު ގޯލުގެ ތެރެއަށެވެ.

އިރާގަށް އިތުރު މައްސަލަތަކެއް ކުރިމަތިވީ އޭގެ ނުވަ މިނެޓު ފަހުން، ޕެނަލްޓީ އޭރިއާގެ ރޮނގުމަތިން ސާޑިއޯ މާނޭއަށް ހުރަސްއެޅުމުގެ ސަބަބުން ޑިފެންޑަރު ރެބިން ސުލާކާއަށް ރެފްރީ އެންތަނީ ޓޭލާ ރަތް ކާޑު ދެއްކުމުންނެވެ. ވީޑިއޯ އެސިސްޓަންޓް ރެފްރީ (ވީއޭއާރް) ބެލުމަށް ފަހު ރެފްރީ ނިންމީ އެއީ ގޯލެއް ޖެހުމަށް ލިބުނު ސާފު ފުރުސަތަކަށް ހުރަސްއެޅުން ކަމަށެވެ.

ލިބުނު ހިލޭ ޖެހުމުން މާނޭ ފޮނުވާލި ހަމަލާ ކީޕަރު ބާސިލް ދިފާއުކުރިއިރު، ގޯލުގެ ތަފާތު ރަނގަޅުކޮށް ދެން އޮތް ބުރަށް ދިއުމުގެ ފުރުސަތު ބޮޑުކުރުމަށް ގިނަ ގޯލުތަކެއް ބޭނުންވެފައިވާ ޕާޕޭ ތިއޯގެ ޓީމަށް ފުރަތަމަ ހާފުގައި އިތުރު ހަމަލާއެއް ގޯލާ އަމާޒުކޮށް ފޮނުވާލެވިފައެއް ނުވެއެވެ.

ނަމަވެސް، މެންޗެސްޓަރ ޔުނައިޓެޑްގެ ކުރީގެ މިޑްފީލްޑަރު ޒިދާން އިގްބާލް އަތުން އޭރިއާގެ ބޭރުން ބޯޅަ ގެއްލުމުގެ ފައިދާ ނަގައި، ލަމީން ކަމާރާ ތަނަވަސްކޮށްދިން ފުރުސަތަކުން އިސްމާއިލާ ސާރް ވަނީ 56 ވަނަ މިނެޓުގައި ލަނޑެއް ޖަހައި ނަތީޖާ 2-0 އަށް ބަދަލުކޮށްލާފައެވެ.

އޭގެ ތިން މިނެޓު ފަހުން، ބަދަލު ކުޅުންތެރިއެއްގެ ގޮތުގައި ކުޅެން އެރިތާ ކުޑަހިނދުކޮޅެއްގެ ތެރޭގައި ޕާޕޭ ގޭ ވައަތުން ފޮނުވާލި ބާރު ހަމަލާ ގޯލުގެ މަތީ ކަނަށް ވައްދާލައިގެން ސެނެގާލްގެ ލީޑު ފުޅާކޮށްދިނެވެ.

ވިޔަރެއާލްގެ ޑިފެންސިވް މިޑްފީލްޑަރު ގޭ ވަނީ 71 ވަނަ މިނެޓުގައި އޭނާގެ ދެވަނަ ލަނޑު ކާމިޔާބުކޮށްފައެވެ. އަދި އޭގެ ފަހުން ބަދަލު ކުޅުންތެރިއެއްގެ ގޮތުގައި ކުޅެން އެރި އިލިމާން އެންޑިއާއީ ޖެހި ލަނޑާއެކު ސެނެގާލުން 5-0 ގެ މޮޅެއް ކަށަވަރުކުރިއިރު، އެޓީމުން އުންމީދު ކުރަނީ މި ނަތީޖާއާއެކު ނޮކްއައުޓް ބުރުގެ ޖާގައެއް ލިބޭނެ ކަމަށެވެ.