ޖަޕާނާ ދެކޮޅަށް ކުޅެން މިހާރު އެއްވެސް ޓީމަކަށް ފަސޭހައެއް ނުވާނެ: ކޯޗު މޮރިޔާސޫ

ފީފާ ވޯލްޑް ކަޕް ފުޓްބޯޅަ މުބާރާތުގެ ގްރޫޕް އެފްގައި ސްވިޑްންއާ ވާދަކޮށް 2-2އިން އެއްވަރުވި މެޗާ އެކު، މުބާރާތުގެ ގަދަ 32ޓީމުގެ ބުރުން ޖަޕާނަށް ޖާގަ ލިބިއްޖެއެވެ.

މި ބުރުގައި ބްރެޒިލްއާ ދެކޮޅަށް ނުކުންނަން ޖެހިފައިވާއިރު، ޖަޕާނުގެ ކޯޗު ހަޖީމޭ މޮރިޔާސޫ ބުނީ މިހާރު އެއްވެސް ޓީމަކަށް ޖަޕާނާ ދެކޮޅަށް ކުޅެން ފަސޭހަ ނުވާނެ ކަމަށެވެ.

ސްވިޑްންއާ ދެކޮޅަށް ކުޅުނު މެޗަށް ފަހު ވާހަކަދައްކަމުން މޮރިޔާސޫ ބުނީ، މީގެ ކުރިން ބްރެޒިލްއަށް ޖަޕާނަކީ ފަސޭހަ ޓީމަކަށް ވެދާނެ ކަމަށާއި ނަމަވެސް މިދިޔަ އަހަރު ކުޅުނު ރަހުމަތްތެރިކަމުގެ މެޗުގައި ބްރެޒިލް ބަލިކޮށް، އެކަން މިހާރު ބަދަލުވެފައިވާކަން ސާބިތުކޮށްދީފައިވާނެ ކަމަށެވެ. ބްރެޒިލްއަކީ ދުނިޔޭގެ ފެންވަރުގެ މޮޅު ކުޅުންތެރިން ތިބި ޓީމެއްކަމުން އެޓީމަށް ފުރިހަމައަށް އިހުތިރާމްކުރާ ކަމަށާއި، އެހެންނަމަވެސް ދަނޑުމަތީގައި ނަތީޖާ ނުކުންނާނެ ގޮތް އެކަކަށް ވެސް ނޭނގޭނެ ކަމަށް އޭނާ ބުންޏެވެ. އަދި ޖަޕާނަށް ވެސް މޮޅުވުމުގެ ފުރުސަތު އޮތް ކަމަށް ގަބޫލުކޮށް، މެޗަށް ތައްޔާރުވާނީ އެ ވިސްނުމުގައި ކަމަށް އޭނާ ހާމަކުރިއެވެ.

ޖަޕާނުގެ ފުޓްބޯޅައަށް އައިސްފައިވާ ކުރިއެރުންތަކަށް އަލިއަޅުވާލަމުން މޮރިޔާސޫ ބުނީ، މީގެ ކުރިން ނެދަލަންޑްސް، ޖަރުމަނުވިލާތް އަދި ބްރެޒިލްގެ ގިނަ ކޯޗުންތަކެއް ޖަޕާނުގައި މަސައްކަތް ކޮށްފައިވާ ކަމަށެވެ. އަދި އެ ފަރާތްތަކުގެ ސަބަބުން ޖަޕާނުގެ ފުޓްބޯޅައަށް ވަރަށް ބޮޑެތި ހެޔޮ ބަދަލުތަކެއް އައިސްފައިވާކަން އޭނާ ފާހަގަކުރިއެވެ. ސްވިޑްންއާ ދެކޮޅަށް ކުޅުނު މެޗާ ގުޅޭގޮތުން އޭނާ ބުނީ، ފުރަތަމަ ލަނޑު ޖަހައި ލީޑު ނެގި ނަމަވެސް، ސްވިޑްންގެ ވަރުގަދަ ފޯވާޑް ލައިނުން ލަނޑެއް ޖެހުމުން ޖަޕާން ޕްރެޝަރަށް ދިޔައީ ކަމަށެވެ.

މި މެޗަށްފަހު ސްވިޑްންގެ ކޯޗު ގްރަހަމް ޕޮޓަރ ބުނީ، ގްރޫޕްގެ ތިންވަނަ ޓީމުގެ ގޮތުގައި 4ޕޮއިންޓާ އެކު ގަދަ 32ގެ ބުރުން ޖާގަ ލިބުނު ނަމަވެސް، ދެން ވާދަކުރަންޖެހޭނެ ޓީމެއް އަދި ނޭނގޭ ކަމަށެވެ. އެހެންކަމުން މިވަގުތު ޓީމު އޮތީ ސުވާލުމާކެއްގެ ތެރޭގައި ކަމަށާއި، މި ވަގުތު ކުރެވެން އޮތް ކަމަކީ ކުޅުންތެރިން ރިކަވަރވެ، ކުރިއަށް އޮތް މެޗަށް ތައްޔާރުވުން ކަމަށް ޕޮޓަރ ބުންޏެވެ.