ރޮނާލްޑޯއަށް ޕާސްކުރަން މަޖުބޫރުކަމެއް ނޯވޭ :ކޮންސެއިސާއޯ

ވޯލްޑް ކަޕްގެ ފުރަތަމަ މެޗުގައި ތަޖުރިބާކާރު ސުޕަސްޓާރުގެ ދައުރާ މެދު ފާޑުކިޔުންތައް އަމާޒުވެފައިވީ ނަމަވެސް، ކްރިސްޓިއާނޯ ރޮނާލްޑޯއަށް ބޯޅަ ޕާސްކުރަން ކުޅުންތެރިންނަށް އެއްވެސް ޕްރެޝަރެއް ނެތް ކަމަށް ޕޯޗުގަލްގެ ވިންގާ ފްރެންސިސްކޯ ކޮންސެއިސާއޯ ބުނެފިއެވެ.

ޑިމޮކްރެޓިކް ރިޕަބްލިކް އޮފް ދަ ކޮންގޯއާ ދެކޮޅަށް ކުޅެ 1-1އިން އެއްވަރުވި މެޗަށް ފަހު، އުމުރުން 41 އަހަރުގެ ރޮނާލްޑޯގެ ދުވެލި މަޑުވުމުގެ ސަބަބުން ޕޯޗުގަލްގެ ފުރުސަތުތަކަށް ނޭދެވޭ އަސަރެއް ކުރަމުންދާ ކަމަށް ބުނެ ފާޑުކިޔުންތެރިން ވަނީ ސުވާލު އުފައްދާފައެވެ.

ނަމަވެސް ކޮންސެއިސާއޯ ބުނީ، އެހެން ކުޅުންތެރިން އެއަށް ވުރެ ރަނގަޅު މަގާމެއްގައި ތިއްބާ، ރޮނާލްޑޯއަށް ބޯޅަ ދޭން ކުޅުންތެރިންނަށް މަޖުބޫރުވާ ކަމަށް ބުނާ ވާހަކައަކީ ހަގީގަތެއް ނޫން ކަމަށެވެ.

“އަހަރެމެންނަކަށް އޭނާއަށް ބޯޅަ ދޭންޖެހޭ ކަމުގެ އިހުސާސެއް ނުކުރެވޭ،” ކޮންސެއިސާއޯ ބުންޏެވެ. “އަހަރެން ބޯޅަ ދެނީ އެންމެ ރަނގަޅު މަގާމެއްގައި ހުރި އަދި މާކް ނުކޮށް ހުންނަ ކުޅުންތެރިޔަކަށް.”

ކޮންސެއިސާއޯ ބުނީ ރޮނާލްޑޯއަކީ ވެސް “ސްކޮޑުގެ އާދައިގެ މެންބަރެއް” ކަމަށާއި، ޓީމެއްގެ ގޮތުގައި ކުރިއަށް ދިއުމަށް “ކޮންމެ ކުޅުންތެރިއެއްގެ ބޭނުން ވެސް ހިފަންޖެހޭ” ކަމަށެވެ.

“ކްރިސްޓިއާނޯއަކީ އޭނާގެ ކެރިއަރާއި އުމުރުން 41 އަހަރުގައި ވެސް އޭނާގެ ކިބައިގައި ހުރި ކުޅުމުގެ ޝައުގުވެރިކަމުގެ ސަބަބުން ނަމޫނާއެއް... ލީޑަޝިޕާއި އޭނާ ޖަހާ ލަނޑުތަކުގެ ސަބަބުން އޭނާއަކީ މިސާލެއް،” ޔުވެންޓަސްގެ ކުޅުންތެރިޔާ ނޫސްވެރިންގެ ބައްދަލުވުމެއްގައި ބުންޏެވެ.

“ލަނޑު ޖެހުމުގައި އޭނާއާ އެއްވަރުގެ އެހެން ކުޅުންތެރިއަކު ނެތް... އޭނާ މިތަނުގައި ހުރީ އެހެން ކޮންމެ ކުޅުންތެރިއަކާ އެއްގޮތަށް ޓީމަށް އެހީތެރިވާން.”

އެ މެޗުގައި ރޮނާލްޑޯ ފެނުނީ ކުރީލައިންގައި މާ ބޮޑު ނުފޫޒެއް ނުފޯރުވުނު، ވަރަށް ބޮޑަށް ބުރަކޮށް މަސައްކަތް ކުރަން ޖެހުނު ކުޅުންތެރިއެއްގެ ގޮތުގައެވެ.

އޭނާ ބޯޅައިގައި ފައި ޖެއްސީ އެންމެ 25 ފަހަރު ކަމަށްވާއިރު، މިއީ ބޮޑު މުބާރާތެއްގައި ޕޯޗުގަލްއަށް މުޅި މެޗު ކުޅުނުއިރު އޭނާ އެންމެ މަދުން ބޯޅަ ހޯދި މެޗެވެ.

އޭނާއާ އެންމެ ވާދަވެރި ލިއޮނަލް މެސީއާ އަޅާބަލާއިރު މިއީ ވަރަށް ބޮޑު ތަފާތެކެވެ. އުމުރުން 38 އަހަރުގެ މެސީ ވަނީ އޭގެ އެއް ދުވަސް ކުރިން ހެޓްރިކެއް ހަދައި، އެންމެ ފަހުގެ ޗެމްޕިއަން އާޖެންޓީނާއަށް އަލްޖީރިއާ އަތުން 3-0 އިން މޮޅުކޮށްދީފައެވެ.

ޕޯޗުގަލް އަންގާރަ ދުވަހު ހިއުސްޓަންގައި ގްރޫޕް ކޭގެ ދެވަނަ މެޗުގައި އުޒްބެކިސްތާނާ ދެކޮޅަށް ނުކުންނައިރު، މުބާރާތުގައި ކުރިއަށް ދިއުމަށް އެ ޓީމަށް ތިން ޕޮއިންޓް ވަރަށް މުހިންމެވެ.

“އަހަރެމެންނަށްވުރެ ބޮޑަށް މިކަމާ ދެރަވާނެ ބަޔަކު ނޫޅޭނެ. އަހަރެމެންގެ މަސައްކަތް އެންމެ ފުރިހަމައަށް ނުކުރެވޭކަން އަހަރެމެންނަށް އަމިއްލައަށް އިހުސާސް ކުރެވުނު،” ކޮންސެއިސާއޯ ބުންޏެވެ.

“ކަންތައްތައް ރަނގަޅަށް ނުދާނަމަ، ޕްރެޝަރާއި ފާޑުކިޔުންތައް އިތުރުވާނެ. އަހަރެމެން ބޭނުންވަނީ އަހަރެމެންގެ ފެންވަރު ދައްކާލައި، ކުރިއަށް އޮތް މެޗުން މޮޅުވާން.”

ޑީއާރް ކޮންގޯއާ އެއްވަރުވި މެޗަށް ފަހު، ފްރާންސްގެ ކުރީގެ ފޯވާޑް ތިއަރީ އޮންރީ ވަނީ ރޮނާލްޑޯއަކީ އަމިއްލަ އެދުން ބޮޑު ކުޅުންތެރިއެއް ކަމަށް ތުހުމަތުކޮށްފައެވެ.