ރައީސް ސޮއިކުރެއްވި ވޯލްޑްކަޕް ބޯޅައެއް އުއްޗުއަށް ހަދިޔާކޮށްފި

ރާއްޖޭގެ މަޝްހޫރު ވިޔަފާރިވެރިޔާ ޗަމްޕާ މުޙައްމަދު މޫސާ (އުއްޗު)އަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސޮއިކުރައްވާފައިވާ ފީފާ ވޯލްޑް ކަޕްގެ ރަސްމީ މެޗު ބޯޅައެއް ކުޅިވަރާ ބެހޭ ވުޒާރާގެ ފަރާތުން ހަދިޔާކޮށްފިއެވެ.

ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާގެ ފަރާތުން އުއްޗުއަށް މި ބޯޅަ ހަވާލުކޮށްދެއްވީ އެ ވުޒާރާގެ ސްޓޭޓް މިނިސްޓަރު އިބްރާހިމް އާމިރުއެވެ.

ކުޅިވަރާ ބެހޭ ވުޒާރާއިން ހާމަކުރި ގޮތުގައި، އުއްޗުއަށް އެރުވި ބޯޅައަކީ ރައީސް ޑރ. މުޢިއްޒު ސޮއިކުރެއްވުމަށް ފަހު އެ ވުޒާރާއަށް ހަދިޔާކުރެއްވި ބޯޅަތަކުގެ ތެރެއިން ބޯޅައެކެވެ. މީގެ ކުރިން އެ ވުޒާރާއިން ވަނީ ރާއްޖޭގެ ފުޓްބޯޅައިގެ ލެޖެންޑުންނަށް ވެސް ރައީސް ސޮއިކުރައްވާފައިވާ މިފަދަ ބޯޅަތަކެއް ހަދިޔާކޮށްފައެވެ.

އުއްޗުއަކީ ރާއްޖޭގެ ކުޅިވަރުގެ ދާއިރާ ކުރިއެރުވުމަށް، ވަކިން ޚާއްޞަކޮށް ފުޓްބޯޅައަށް ބޮޑެތި އެހީތަކެއް ވެދެއްވަމުން އަންނަ ބޭފުޅެކެވެ. މިގޮތުން ޤައުމީ ފުޓްބޯޅަ ޓީމުގެ ކުޅުންތެރިންނަށް ފައިސާގެ އިނާމު ދެއްވުމާއި، ރާއްޖޭގެ އެކި ކަންކޮޅުތަކުގައި ބާއްވާ ކުޅިވަރު މުބާރާތްތައް ސްޕޮންސަރު ކޮށްދެއްވުމުގައި އުއްޗު އަންނަނީ މުހިންމު ދައުރެއް އަދާކުރައްވަމުންނެވެ.

މިއަހަރުގެ ފީފާ ވޯލްޑް ކަޕްގެ ފޯރި ގަދަކުރުމަށްޓަކައި ކުޅިވަރާ ބެހޭ ވުޒާރާއިން އިސްނަގައިގެން ގްރޭޓާ މާލޭ ސަރަހައްދުގައި ގިނަ ހަރަކާތްތަކެއް އަންނަނީ ހިންގަމުންނެވެ. އޭގެ ތެރޭގައި އާންމުންނަށް ބޮޑު ސްކްރީނުން މެޗުތައް ބެލޭނެ އިންތިޒާމު ހަމަޖެއްސުމާއި، ކޮންމެ ހުކުރު ދުވަހެއްގެ ހަވީރު ޔޫތު ހަބްގައި ބާއްވާ ހާއްސަ ގޭމިން ކާނިވަލް ހިމެނެއެވެ.