އެމެރިކާއަށް ދަތުރުކުރުމުގެ ހުރަސްތަކާ ގުޅިގެން އީރާނުން ޝަކުވާ ހުށަހަޅަނީ

ފީފާ ވޯލްޑް ކަޕް 2026ގައި އެމެރިކާގައި ކުޅޭ މެޗުތަކަށް ދަތުރުކުރުމުގައި ކުރިމަތިވަމުންދާ ހަރުކަށި ހުރަސްތަކާ ގުޅިގެން، ފުޓްބޯޅައިގެ މައި އިދާރާ (ފީފާ)އަށް ރަސްމީކޮށް ޝަކުވާ ހުށަހަޅަން އީރާނުގެ ފުޓްބޯޅަ ފެޑެރޭޝަނުން ނިންމައިފިއެވެ.

ވިސާގެ ދަތިތަކާއި އެމެރިކާއާ ދެމެދު އޮތް ސިޔާސީ ނުތަނަވަސްކަމުގެ ސަބަބުން، އީރާނު ޓީމު މިވަގުތު ތިބީ މުބާރާތް ބާއްވާ އަނެއް ގައުމު ކަމަށްވާ މެކްސިކޯގައެވެ. އެހެންކަމުން އެމެރިކާގައި ކުޅޭ ގްރޫޕް ސްޓޭޖުގެ ތިން މެޗަށްވެސް އެ ޓީމަށް ދަތުރުކުރަން ޖެހެނީ މެކްސިކޯއިންނެވެ.

އެމެރިކާގެ ކަމާބެހޭ އިދާރާތަކުން ނިންމާފައިވަނީ މެޗު ފެށުމުގެ 24ގަޑިއިރު ކުރިން ނޫނީ އީރާނު ޓީމަށް އެމެރިކާއަށް އެތެރެނުވެވޭނެ ކަމަށެވެ. އަދި މެޗު ނިމޭ ދުވަހު އެ ގައުމުން ބޭރުވާން ޖެހޭނެ ކަމަށްވެސް ވަނީ އަންގާފައެވެ. މި ނިންމުމާ ގުޅިގެން އީރާނުގެ ކޯޗު އާމިރު ގަލެނޮއީ ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. އޭނާ ބުނި ގޮތުގައި މިއީ މި ފަދަ ބޮޑު މުބާރާތެއްގައި ޓީމަކަށް ކުރިމަތިވާނެ އެންމެ ބޮޑު ބޭއިންސާފެވެ.

އީރާނުގެ ފުޓްބޯޅަ ފެޑެރޭޝަނުން މިއަދު ނެރުނު ބަޔާނެއްގައި ބުނީ، މިފަދަ ހަރުކަށި ހުރަސްތަކަކީ މުބާރާތުގައި ބައިވެރިވާ ހުރިހާ ޓީމަކަށް ހަމަހަމަ ފުރުސަތުތަކެއް ދިނުމުގެ އުސޫލާ މުޅިން ޚިލާފު ކަމެއް ކަމަށެވެ. އަދި މީގެ ސަބަބުން ޓީމުގެ ތައްޔާރީތަކަށް ނޭދެވޭ ބޮޑެތި އަސަރުތަކެއް ކުރާނެ ކަމަށްވެސް ބަޔާނުގައިވެއެވެ. ކޯޗު ގަލެނޮއީ ހާމަކުރި ގޮތުގައި، މި ދަތިތަކުގެ ސަބަބުން ނިއުޒިލެންޑާ ދެކޮޅަށް ކުޅެ 2-2 އިން އެއްވަރުވި މެޗުގައިވެސް ޓީމަށް ބޮޑެތި ގޮންޖެހުންތަކެއް ކުރިމަތިވިއެވެ.

ކުޅުންތެރިންގެ ފިޒިކަލް އަދި ޓެކްނިކަލް ފެންވަރު އެންމެ ރަނގަޅު ހާލަތުގައި ބެހެއްޓުމަށްޓަކައި، ކޮންމެ މެޗެއްގެ ދެ ދުވަސް ކުރިން އެ ސިޓީއަކަށް ގޮސް، މެޗަށްފަހު އަނެއް ދުވަހު އެނބުރި ދިއުމަށް ކޯޗު ރޭވި ނަމަވެސް، ފުރަތަމަ މެޗަށް އެމެރިކާއިން އެ ހުއްދަ ދީފައެއް ނުވެއެވެ. ގްރޫޕް ޖީގައި ހިމެނޭ އީރާނުން ދެން ކުޅޭ މެޗުގައި މި މަހުގެ 21ވަނަ ދުވަހު ލޮސް އެންޖެލިސްގައި ބެލްޖިއަމްއާ ދެކޮޅަށް ނުކުންނައިރު، ގްރޫޕްގެ ފަހު މެޗުގައި މި މަހުގެ 27ގައި ސިއެޓްލްގައި ބައްދަލުކުރާނީ މިސްރާއާއެވެ.