އިނގިރޭސި ޓީމުގެ މެޗު ބަލާލަން ވަރަށް ހިތްގައިމު

ތޯމަސް ޓުޗެލްގެ ޓީމުން ވަރުގަދަ އިންޒާރެއް އިދިކޮޅު ޓީމުތަކަށް ދިނުމާ އެކު، އިނގިރޭސި ސަޕޯޓަރުން ޑެލަސް ސްޓޭޑިއަމުން ނުކުތީ އުފާވެރިކަމުން ފުރިގެންވާ ހިތްތަކަކާއެކުގައެވެ.

ހެރީ ކޭން އޭނާގެ އިނގިރޭސި ޓީމުގެ ކުޅުންތެރިން ގާތު ބުނީ "ސިކުނޑި މިނިވަންކޮށް" ބަހައްޓައި، ވޯލްޑް ކަޕުން ކުރިމަތިވާ ޕްރެޝަރުތަކާ ކުރިމަތިލުމަށެވެ. އަދި ކުޅުންތެރިން އޭނާގެ ބަސް ގަބޫލުކުރީ ޕޮސިޓިވް ގޮތެއްގައެވެ.

ކްރޮއޭޝިއާ އަތުން އިނގިރޭސިވިލާތް 4-2 އިން މޮޅުވި ފުރަތަމަ މެޗަކީ ފޯރިގަދަ އެޓޭކިން ކުޅުމަކާއި ކަންބޮޑުވާންޖެހޭ ފަދަ ބަލިކަށި ޑިފެންސެއް ފެނިގެންދިޔަ މެޗެކެވެ. ނަމަވެސް މި ބޮޑު ދަނޑުން ނުކުމެގެން ދިޔަ ސަޕޯޓަރުންގެ މޫނުމަތިން ފެނުނު ހިނިތުންވުމުން ބުނެދެނީ މުޅިން ތަފާތު ވާހަކައެކެވެ.

ފަހުގެ ތާރީޚުގައި އިނގިރޭސިވިލާތުގެ މެޗުތައް ބަލަން ގިނަ ފަހަރަށް ފޫހިވެއެވެ. ޔޫރޯ 2024ގެ ފައިނަލަށް ދިއުމާއި ހަތަރު އަހަރު ކުރިން ގަތަރުގައި ބޭއްވި ވޯލްޑް ކަޕްގެ ކުއާޓާ ފައިނަލަށް ދިޔައިރު ވެސް މެއެވެ. އިނގެރޭސީން އެ ދެ މުބާރާތުގައި ކުރިއަށް ދިޔަ ނަމަވެސް، އެޓީމުގެ ކުޅުން ފެނުނީ ވަރަށް ފޫހިކޮށެވެ.

ސަރ ގެރެތު ސައުތުގޭޓްގެ މޮޅު ރެކޯޑުން ނަތީޖާ ނެރެވޭކަން ސާބިތުކޮށްދިން ނަމަވެސް، އެއީ ބަލާ ހިތްވާފަދަ ފޯރިގަދަ ކުޅުމަކާއެކު ކުރެވުނު ކަމެއް ނޫނެވެ.

މި މެޗު އެހެންނެއް ނޫނެވެ. މިއީ ފޫހި މެޗެއް ނޫނެވެ. ނަމަވެސް މިއީ ޓުޗެލް އެންމެ ގަޔާވާނެ ގޮތަށް ކަންކަން ހިނގި މެޗެއް ނޫންކަން ޔަގީނެވެ.

މިއީ އެންމެ ސިކުންތަކަށް ވެސް ނަޒަރު ވަކިކޮށްލަން ނުކެރޭނެ ފަދަ މެޗެކެވެ. ފުރަތަމަ ހާފުގައި ޓުޗެލްގެ ރުޅިވެރިކަން ފެނުމަށް ފަހު، ދެވަނަ ހާފުގައި ފެނުނު ވަރުގަދަ އެޓޭކުތަކާ އެކު، ޓީވީ ޕަންޑިތެއްގެ ގޮތުގައި މަސައްކަތް ކުރަމުންދިޔަ އޭނާގެ ގައުމުގެ ޔާގަން ކްލޮޕް ފެނުމުން ޓުޗެލް ގޮސް ވަނީ އޭނާގެ ގައިގައި ބައްދާލައިފައެވެ.